Faamalosia e ala i le Afioga a le Atua
Saunia e Elder Yoon Hwan Choi
O Le Fitugafulu
Ina ua ou iloa le ala e faaaoga ai upu a perofeta, na suia lou olaga mai le mea na ou manao ia avea ai au i le mea e finagalo le Alii e avea ai au.
Ao ou tuputupu ae i Korea, na faataga e lou tama lana fanau e auai i le lotu o la latou lava filifiliga, ae e masani i taimi o le aiga i le afiafi matou te le autasi e uiga i talitonuga faalelotu. Ona o lenei fefinauaiga, na manao ai lou tama ia autasi lo matou aiga i talitonuga faalelotu. Ona o lou uso laitiiti na alu i fonotaga a le Ekalesia a Iesu Keriso o le Au Paia o Aso e Gata Ai faatasi ma le tamaloa o lou aiga, na amata ai e lou tama ona auai i fonotaga faatasi ma i laua e aoao atili e uiga i le Ekalesia. Na ou auai foi ma na faagaeetia i gaoioiga malie a le Mutuale ma le ala na faamalosia ai e le polokalama a le seminare tagata talavou faaleagaga.
Ina ua 16 ou tausaga, na matou papatiso ma ou matua, ma isi tagata e toa 23 o le aiga ma na auai mai tagata o le aiga i le Ekalesia i totonu o le fitu masina.
Ina ua matou auai i le Ekalesia, na matou tautino atu e toaaga atoatoa ma faaauau ona aoao e uiga i aoaoga faavae o le talalelei. Na matou faia lenei mea e ala i le suesue i tusitusiga paia i le faatuatua i aso uma, faatasi ai ma le faitauina o le tele o isi tusi a le Ekalesia ma tusi lesona. I le totonu o ni nai tausaga na sosoo ai, na ou aoao ai ni mataupu faavae se lua e uiga i le tumau malosi i le Ekalesia:
-
Suesue tusitusiga paia i le seminare, lotu, ma le aiga.
-
Faalogo ma mulimuli i le fautuaga a le perofeta.
Malosiaga i Tusitusiga Paia
I le faaopoopo ai i le suesueina o tusitusiga paia i le aiga, na ma auai ma le faamaoni ma lou uso i le seminare ma le Mutuale. I na aso, na fai a matou Aoga Sa i le taeao, ma le sauniga faamanatuga i le afiafi. Ona o le mamao o lo matou falelotu, na matou nonofo ai i le fale sa, auai i le vasega a le seminare, ma olioli i le feasiasi ma le faatasi ai ma tagata o le Ekalesia seia uma le sauniga faamanatuga. Sa toatele tagata talavou na auai i le Ekalesia i Korea i lena taimi, ma ao matou aoao faatasi ma maua le loto fiafia i gaoioiga, na matou vavalalata ma i latou.
Na valaaulia au e auauna atu i lau korama a le Perisitua Arona ma na galulue felatai ma tamaitai talavou o e na auauna i a latou vasega. Na matou aoao pe faapefea ona tausia ma tatalo mo i latou na matou taitaia faapea foi ma le ala e fuafua ai gaoioiga faatasi ma faaaoga ma le poto lo matou taimi.
I le aluga o le vaiaso, ou te suesue i tusitusiga paia mo le seminare ae lei faia au meaaoga. Pe a ou le lava tele e fai au meaaoga pe ua i ai ni luitau i le aoga, ou te tatala lau tusi lesona o le seminare, suesue, ma tatalo. Na ou iloa pe a ou faia lena mea, e mafai ona ou faafouina lou mafaufau ma sili atu ai le taulai atu i au meaaoga. O loo ou faia pea lenei mea i lou olaga. I le aso, soo se taimi lava e i ai sou taimi faigata, ou te faitau pea au tusitusiga paia po o lauga o le konafesi aoao e faafou ai lou mafaufau.
O le tele o tamaiti aoga i le aoga maualuga i Korea e faaalu le tele o lo latou taimi e o ai i le aoga ma suesue i le leva o le po. Na matou iloa afai matou te faaalu le taimi mo le seminare ma gaoioiga a le Mutuale, na matou lagonaina le faafouina ma na faamanuiaina e faia le mea e sili atu ia matou meaaoga. O lesona na ou aoaoina iina na fesoasoani foi ia te au i isi tulaga ao ou i ai pea i le aoga.
I se tasi aso i le aoga, na aoao ai e se tasi o ou faiaoga se lesona e uiga ia Iuta, ISA, i la matou vasega o le suesueina o tulaga o le lalolagi ma fai mai nisi o mea e uiga i le Ekalesia na sese. Na ou mafaufau, “Pe tatau ona ou faasaoina o ia i luma o tagata uma, pe tatau ona ou alu atu ia te ia faalilolilo pe a uma le vasega?” I lena taimi, na oo mai upu a lou faiaoga seminare i lou mafaufau. Na fai mai o ia, “Aua le finau pe faatiga i soo se tasi pe a fai e se tasi ni mea sese e uiga i le Ekalesia.”
Na ou lagona e tatau ona ou tumau i le filemu ma faaaloalo i le taimi o le vasega. Ina ua ou talanoa ma ia mulimuli ane, na ou tau atu ia te ia o au o se tagata o le Ekalesia, ma na ou faasaoina o ia i mea sese na ia aoaoina i le vasega. Na ia fai mai, “Ou te lei iloa o oe o se Mamona. Faafetai mo le tauina mai ia te au.” Mulimuli ane na ia faasaoina lana aoaoga ina ia tuuina atu faamatalaga sao, ma na ia faia pea au ma le faaaloalo. Na ou faafetai mo le fautuaga na aoaoina ai au e ala i lou faiaoga seminare.
Militeli po o le Misiona?
Ao ou laitiiti, na ou manao ia avea ma taitai i le ami. Na ou fuafua e talosaga mo le aoga a le militeli ina ia faaleleia ai lau sini. O le uiga o lena filifiliga e faapea, na ou le faamoemoe e auauna atu i se misiona aua sa ou iloaina o lena polokalama i le aoga mo tagata o le militeli o le a le faatagaina se tasi mo soo se gaoioiga faalelotu.
Ona ou maua lea o le avanoa e alu ai i konafesi i Seoul, Korea—o se aafiaga na suia ai le faasinomaga o lou olaga. I le taimi o le konafesi, na ou faalogo ai i le fautuaga a Peresitene Spencer W. Kimball (1895–1985) i le autalavou ia:
-
auai i le seminare,
-
auauna atu i se misiona faamamaluina,
-
faaipoipo i le malumalu, ma
-
galue agai i le faaeaga.
Na ou iloa o lana fautuaga na sao, ma na ou manatuaina le fuaiupu e faapea, “E lē mavae atu lava lau upu, ae o le a faataunuuina uma lava, pe i lou lava leo po o i le leo o au o auauna, ua tutusa lava” (MF&F 1:38).
Ina ua ou faalogo o saunoa le perofeta e uiga i le taua o le auauna atu i se misiona o se faamuamua i le olaga, na ou iloa ua tatau ona ou tuu atu lou faatuatua i le Alii, auauna atu i se misiona, ma tuuese lau miti ia avea ma se taitai au, ma manatua ia “saili muamua le malo o le Atua, ma lana amiotonu; ona faaopoopoina lea o na mea uma ia te outou” (Mataio 6:33).
E ui ou te lei toe fuafua e auai i le aoga a le militeli, o le auauna mo le tolu tausaga o se fitafita sa manaomia pea mo alii talavou uma. Faatoa atoa lou tasi le tausaga o auauna atu i le Misiona a Korea Busan ae ou maua le faatonuga mai le malo o Korea e lipoti atu mo tiute faamiliteli. Na ou auauna atu mo le tolu tausaga i le ami, ma ina ua ou foi mai, na ou manao e faauma lau misiona. Ona valaauina lea o au i le Misiona a Korea Seoul ma auauna atu ai mo le isi tausaga iina.
“E Te Valea?”
Ina ua ou foi mai lau misiona, na faamanuiaina au e ala i le mulimuli i le fautuaga mai perofeta. Mo se faataitaiga, ina ua uma lau misiona, na ou filifili e faaipoipo, e ui lava e lei uma lau aoga. I Korea, o le aganuu e tatau ona manuia i tulaga tautupe ma uma lau aoga ae lei faaipoipo ma amata se aiga. Ae na ou iloa na manaomia lou mulimuli i le fautuaga a le perofeta ma galue agai loa i le faaipoipoga. Na ma fetaui ma lou toalua ao ma i ai i le polokalama a le autalavou ma na avea ma se uo lelei ae ou te lei alu i le misiona, o lea na ma masani lelei ai lava. Na ma faaipoipo ae faatoa ou foi mai i le fale, e ui lava na fai mai ana uo, “E te valea? E leai sau tupe.”
Na ma faia le faafeagai o le aganuu masani ona sa ma iloa na manaomia lo ma mulimuli i le fautuaga a le Alii. Na faamanuiaina o ma olaga i le mulimuli i le fautuaga a le perofeta, ma na ma oo i ni aafiaga semanu ma te le oo lava i ai i se isi tulaga.
O le fautuaga a le Alii ia faia mea uma ma le poto ma le faatulagaga lelei (tagai Mosaea 4:27) e i ai taimi e ese mai aoaoga a le lalolagi, ae afai tatou te usiusitai i le faatulagaga a le Alii, o le a oo ina suia o tatou olaga mo le mea e sili atu. Ou te loto faafetai mo le perofeta soifua, o le e taitaia i tatou i le ala a le Alii i le aso. Ou te iloa “a tatou maua se faamanuiaga mai le Atua, e maua i le usiusitai i lena tulafono ua faavae ai i luga” (MF&F 130:21).