Ua na o le fesoasoani mai le Atua
Saunia e Elder Timothy J. Dyches
O Le Fitugafulu
Pe a tatou iloaina tatou te faalagolago i le Atua, tatou te iloa foi o loo naunau o Ia e fesoasoani ia i tatou.
O lo’u tausaga faaiu i le aoga maualuga na aumaia ai se luitau ou te le faamoemoeina. E lei leva ona amata le aoga, ae tofia au e lou faiaoga o lauga e auai i se talanoaga faafinauga. Sa matou suesue, faataitai, ma tauva, ma sa ou aoaoina ma le lotomaualalo le tele o lesona taua.
I ni masina mulimuli ane, ma le fa vaiaso ao lumanai le tauvaga lauga a le setete, sa na ona faailoa mai lava e lo’u faiaoga ia te au faatoa ia faauluina foi lo’u igoa e tauva i le tauvaga lauga e nao le 30 minute e saunia ai. Sa amata ona ia faamalamalama mai faapea i le aso muamua o le a ou manaomia e tuuina atu e le itiiti ifo ma le tolu lauga eseese e tai fitu minute i luma o se au faamasino.
Ma sa i ai se isi faafitauli—o autu o lauga o le a tofia e piki mai i ni mataupu i le taimi lava lena, ma na o le 30 minute e saunia ai. Sa ou ofo lava; ou te lei vaai muamua lava i se tauvaga lauga puupuu faapea.
O le sauniuniga i vaiaso o totoe, i le faitauina o le tele o tusiga e faatatau i faafitauli o aso nei ou te mafaia, sa ou lagona lava le lofituina i le masalosalo ma le popole patino. I le aso o le tauvaga, sa ou fesili atu i taitai, “Ua uma ona ou seiina lau autu, ae pe mafai ona ou alu i totonu ma faalogo mo se lua minute i se tasi o loo faia moni lava se lauga?” Na latou tali mai, “E na o le 30 au minute. Afai e te manao e faaalu ai e faalogo, pule a oe.”
Fesili atu mo se Fesoasoani
O le taimi muamua lava lena, sa ou alu ai ma faalogologo mo ni nai minute e sili ona taua. Sa ou iloaina sa manaomia ona ou nofo toatasi ma tatalo i lo’u Tama Faalelagi. Sa ou iloa atu se togalaau tuufua i le lotoa o le iunivesite i autafa o se vaituloto e mafai ona nao au ai lava, i ou tulivae.
Ou te aioi atu i le Tama Faalelagi mo se fesoasoani. Sa le o se tatalo ia manumalo—o se tatalo faatauanau mo le fesoasoani a le Agaga Paia ina ia ou mafai ona faia se mea ou te lei faia muamua ma ia manuia mai i lenei luitau. Sa ou iloaina sa ou manaomia le fesoasoani a le Atua.
Sa tali mai le Tama Faalelagi i la’u tatalo. Sa ou manatuaina mea sa ou suesueina ma sa mafai ona fesootai atu mea moni ma uunaiga. Faatasi ai ma autu fou taitasi e pikiina, ou te muamua lava alu e tatalo. Ona ou alu ai lea e galue. Na matuai ofo lava i le aso na sosoo ai i lou oo atu i le taamilosaga faaiu.
Sa atiina ae lo’u faatuatua i le Atua i totonu o la’u molimau, ma o lo’u faatuatua na tuputupu ae malosi a o ou lagonaina o Ia ua latalata mai. Ou te faafetai i le Tama Faalelagi mo le fesoasoani sa ou mauaina, aua ina ua uma ona faia mea uma e mafai ona ou faia, na Ia faia le mea e sili atu mo au nai lo le mea e mafai ona ou faia e au lava ia (tagai i le 2 Nifae 25:23).
I lo’u olaga faalegaluega, sa ou fomai tipitipi mo taliga, isu, ma le faai. I se tasi taimi i Reno, Nevada, ISA, sa valaauina a’u e fesoasoani ï se vaega o galulue i le falemai mo tamaiti tigaina ao latou togafitia se pepe tama augapepe na vave tele ona fanau mai. O lena alii laitiiti na faatoilaloina nisi o luitau faigata i nai masina muamua o le olaga ma lava ai le malosi e alu ai i le fale ma ona matua ma le aiga.
Ae paga lea, ina ua mavae le i ai i le aiga mo le lua masina, o lenei ua toe foi mai i le falemai ma se siama matuia i lona māmā agavale, ma sa le manuia vailaau malolosi.
O tagata tomai faapitoa mo le vaega tigaina sa masalosalo o le pepe na manavaina se mea lea na mau i lona māmā, ae sa le o faaalia mai i soo se faaata. Ona o lona tulaga ua tigaina tele, na latou fautuaina ou te vaai atu i totonu o ona māmā ao moe o ia i le potu tipitipi.
I le taimi matou te le’i maua le tekinolosi e vaai mamao lelei ai i lalo i ala ea laiti o tamaiti laiti. A o matou galulue ai e tape le siama mai lona māmā agavale, mo sina taimi puupuu lava sa ou vaai ai i le mea sa ia manavaina i totonu—o se fasi valigao samasama malosi, o loo lavea e matuai mamao ese mai lava e le mafai e soo se meafaigaluega ona aumaia.
O se tausimai i le potu tipitipi ma iloaina le ogaoga o le tulaga ma ta’ua ai sa ia vaaia se meafaigaluega umi, ma lauiti na faaaoga i le aveeseina o maa o fatugao mai ni nofoaga vaiti. Sa vave ona ia aumaia se tasi, o se ato e fai i uaea e lauiti ma fegauigauiai ma taamilomilo e mafai ona matala le taamilomilo e lava lelei pe a faaaogaina e aumai ai se tamai maa e aunoa ma le faaleagaina o vaega o siomia ai. Ae faapefea ona oo i ai?
“Ou te le Mafaia Lenei Mea na o Au”
Sa ou fesili atu i le fomai o le vaigase e faaauau pea ona galue i le matou mai laitiiti mo sina taimi, ao ou alu atu i le tulimanu o le potu tipitipi. “Tama Faalelagi, ou te le mafaia lenei mea nao au.” Na oo mai le manatu i lo’u mafaufau: “E te fai le mea sili. E mafai ona ta faia faatasi lenei mea.”
Sa ou faataitaia mo ni nai taimi le tatala ma faamau le ato e fai i uaea i o’u lima i ni tulaga eseese. I le matuai faaeteete lava, na aveina atu le ato e fai i uaea e le meafaigaluega seia oo tonu atu i le valigao. Faatasi ai ma ni gaoioiga agavaivai maaleale, sa oo atu i lalo, matala, ona faatagaina lemu lava lea e tapuni. O lenei la ua manino ma mama le ala ea.
I le aveesea ai o le vali gao, o le tamaitiiti sa vave ona toe manuia ma malosi. Sa tea o ia i tua i totonu o le vaiaso ma se fagu laitiiti o loo i ai se faamanatu e lanu samasama malosi.
Ou te iloa sa ou mauaina le fesoasoani faalelagi, e moni lava ia te au e pei lava o se lima alofa na taialaina lou lava lima.
Ou te tuuina atu molimau faatauvaa o le fautuaga ma le taitaiga e tuuina mai e le Tama Faalelagi. E i ai taimi faatoa mafai ona e faia se mea e tatau ona e faia i le fesoasoani a le Atua. I ia taimi faapea, i taimi uma, “e manatua o ia o ou ala uma ona faatonuina ai lea e ia ou lava ala” (Faataoto 3:6).