Ia I Ai i le Mea e Ao ona Tatou I Ai
Saunia e Elder Randy D. Funk
O Le Fitugafulu
Ata na tusia e Mark Robison
LUGA: ATA NA TUSIA E Mark Robison; TAUMATAU: ATA NA TUSIA E Alyssa Tallent
Sa ou nofo i Manti, Iuta, ISA, ina ua 11 o’u tausaga. I le amataga o le tausaga, sa aumai ai e lo’u faiaoga Peraimeri se tama’i to’i manaia e mafai ona e tata fafie ai.
“O ai lava e sili ona tele ana sau i le Peraimeri i le tausaga lenei, e avea ma ia le to’i,” sa ia fai mai ai. O le taimi lava lena sa ou filifili ai e sau i vaiaso uma. I le faaiuga o le tausaga, sa ou mauaina ai le to’i!
E le’i leva ae oo mai lo’u aso fanau e 12 [ai o’u tausaga]. Sa faauuina a’u o se tiakono. I le vaitaimi foi lea, sa siitia atu ai lo’u aiga i Madison, Wisconsin, ISA. Sa ou misia a’u uo, ae sa ou fiafia e faia ni uo fou. Sa sili atu le tele o Madison nai lo o Manti. Sa toatele foi la’u aoga fou. Sa le’i toatele ai ni tagata o le Ekalesia. I se tasi aso na valaaulia ai a’u e ni tamaiti lauiloa i se pati. Peitai, sa faia le pati i le po lava lea e tasi sa fai ai se gaoioiga a le Ekalesia. Sa ou aoaoina mai i lau aafiaga i le Peraimeri e tutupu mea lelei pe a ou faamaoni i le auai i au sauniga o le Lotu. Sa ou faafetai ia i latou mo le valaauliaga o a’u, ma sa ou faamatala i ai le pogai na le mafai ai ona ou alu.
O le aso na sosoo ai ina ua uma le pati, sa talanoa ai tagata uma i le aoga e uiga i ai. Sa inu a latou ava malosi i le pati, ma o tagata uma lava sa o ai, sa oo i ni faafitauli se tele. Sa ou matuai faafetai lava ona sa ou i ai i le nofoaga sa tatau ona ou i ai.
Ou te faafetai foi ona sa ou alu i le Peraimeri ma isi fonotaga a le Ekalesia a o ou tuputupu ae. Sa ou aoaoina ai ni lesona taua e uiga i le talalelei. Ma sa ou maua ni taimi malie ma fiafia i gaoioiga. E faamanuia i tatou e le Tama Faalelagi pe a tatou taumafai ia tatou i ai i nofoaga e tatau ona tatou i ai, ma fai mea e tatau ona tatou faia. Na te faamalosia o tatou faatuatua. Na te puipuia i tatou mai faaosoosoga ma agasala.
E faamalosia e le Tama Faalelagi lo tatou faatuatua ma faamanuia i tatou pe a tatou taumafai ina ia i ai i le mea e tatau ona tatou i ai ma faia mea e tatau ona tatou faia.
I le Mataupu Faavae ma Feagaiga 88:63, na fetalai mai Iesu, “Faalatalata mai ia te au ma o le a Ou faalatalata atu ai ia te outou.”
A o tatou auai i a tatou sauniga o le Ekalesia, e aofia ai le sauniga faamanatuga, e atili ona tatou vavalalata i le Tama Faalelagi ma Iesu Keriso. Tatou te aoao upumoni e taua e taiala ai a tatou faaiuga i le aluga o le vaiaso, e oo i taimi tatou te le o i ai i le lotu po o le siomia e isi o e tutusa a tatou talitonuga. A e ola amiotonu, o le a fesoasoani le Agaga Paia ia te oe e iloa le nofoaga e tatau ona e i ai ma mea e manaomia ona e faia.