O Leo o Le Au Paia o Aso e Gata Ai
Teuina o Meaai: Sisi Tuuapa ma Totogi o le Mokesi
Yvonne Aston, Atumotu o Channel, Malo Aufaatasi
Ata na tusia e Stan Fellows
Ina ua ou faaipoipo, sa amata ona ou filiga e teu meaai. Sa ma mananao ma lo’u toalua e faaputu se sapalai tele, ae sa le mafai ona ma faataua uma mai i le taimi e tasi, o lea sa tonu ai o le a ma faatauina mai se mea faasili i vaiaso uma lava. Sa ma vaavaai mo ni tau faapitoa i mea e masani ona ma faatauina mai, ae maise lava meaai tuuapa.
E ese lo’u fiafia ou te tilotilo i la’u kapoti e vaai ai i si a’u faaputuga laitiiti o meaai tuuapa ma meaai matutu ua faasolosolo lava ina tele. I se tasi taimi sa ma faia ai le mea sese o le faatau mai o sisi tuuapa, lea sa [ma] inoino tele i lona [tofo], ae sa faamalosi lava lo’u toalua e ai ia apa i vaiaso taitasi seia oo lava ina uma. Ina ua feololo le tele o a ma meaai na teu, sa amata loa ona ma aai mai ai, ma malilie e toe sui mai aitema taitasi na ai i ni aitema se lua pe sili atu.
E le’i umi ae fai si tumu o le ma kapoti, o lea sa ma faatauina mai ai ni aitema e teu mo a ma taifau ma pusi. Sa amata foi ona ma teuina laulaau ma laulaau faamanogi meaai, o saito na teu i pepa ua mimiti ese le ea, vaiinu ma fagu suamalie, ma soo se mea sa ma faaaogaina i aso uma sa le o ni meaai, e pei o fasimoli, mea faamanogi, ma vailaau ta lavalava.
Ona ma faatauina lea o se fale, ae e fetaui lava le sauni atu e faamautu le faatauga o le fale, ma le oso maualuga o le totogi o le mokesi. Na toeitiiti atoa le tausaga o ma ola i ma meaai na teu ina ia aloese ai mai le aveesea o le fale.
O le teuina o meaai i le taimi lenei, ua o se vaega masani o le tapenaina o le fale. Matou te faaaogaina ma ua faamanuiaina ai i aso uma lava. Ou te matuai faafetai ona sa ma faalogo le fautuaga musuia mai perofeta a le Alii, aua o lona uiga, o le taimi nei, e mafai ona ou fetilofa’i ma le loto faafetai i lo’u fale mafanafana ma nofogofie.