Auaunaga i le Ekalesia
O Se Meaalofa Sili Atu
E alala le tusitala i Kalefonia, ISA
Sa le’i na ona aoao o i matou e Uso Reynolds—sa ia alofa ia i matou.
Ata na tusia e Janice Kun
I lo’u tausaga mulimuli i le Peraimeri, sa maua ai se matou faiaoga fou: o Uso Reynolds. Sa sina lona ulu ma maanuminumi [ona foliga], ma sa ia faamatala mai ni tala e uiga i le Pau o le Tamaoaiga ma lana tautua i le militeli a le I.S i le taimi o le Taua Lona II a le Lalolagi. O le taimi maumau sa ou le malamalama i ana tala—sa le manaia ma na tutupu i aso lava la ua leva.
I se tasi taimi sa matou ulavavale ai ma a’u uo i totonu o le vasega. Sa aveese mai a’u e Uso Reynolds ma tautala sa’o mai lava ia te a’u. Sa ia fai mai ou te faia se mea lelei atu, ma fai mai sa manao i le mea sili mo a’u. A o le’i oo i lena taimi, o i matou ma a’u uo sa matou le faalogo [i le faiaoga]. Ae e le’i umi ae matou iloaina se mea taua e uiga ia Uso Reynolds—sa matuai popole alofa o ia ia i matou, ma na pau lava lana fuafuaga ia alofa ia i matou.
Sa faasoa mai i taimi uma e Uso Reynolds lana molimau i le Faaola o Iesu Keriso. Sa i ai se malamalama i ona foliga a’o ia aoaoina i matou e uiga i le mana o le ola i se olaga e totonugalemu ia Keriso. Sa oo ina avea ana tala ma ni aafiaga moni mananaia na faapea ona faaosofia ai o matou vaaiga faalemafaufau ma oo ina matou mananao ai e auauna i le Alii.
Ou te manatua pea se lesona sa ia aoaoina mai e uiga i le Perofeta o Iosefa Samita ma le ala na ia molimau mai ai o Iosefa Samita sa avea foi ma se tama laitiiti na pei o i matou. Faatasi ai ma ona loimata, sa ia ta’u mai ai ia i matou, sa i ai i le Alii ni faamoemoega maualuluga mo i matou, na pei foi ona sa i ai Ona [faamoemoega maualuluga] mo Iosefa. Na fai mai Uso Reynolds, o le a taitasi i matou ma faia ni mea maoae i o matou olaga, e oo lava i le suia o le lalolagi, pe afai o le a matou pei o Iosefa ma faalatalata atu i le Faaola.
O ni nai tausaga mulimuli ane, a o matou i ai ma a’u uo i le aoga maualuga, sa matou iloa ai sa manaomia e Uso Reynolds le faagataina o ana laau apitoti [apricot]. Sa matou faagataina ma le fiafia ana laau, lea sa alu ai ni nai itula o le fepee’i i apefa’i ma le tatipieseina. Sa o se galuega mamafa, ae na matou iloaina o le a taua ia Uso Reynolds.
O le tausaga lava foi lena sa matou iloa ai sa manaomia e Uso Reynolds se seti fou o tusitusiga paia. O ana tusitusiga paia na tuai, maanuminumi itulau, ma toulu ese. Sa tuufaatasi a matou tupe ma faatau mai mo ia se tusi fusi tolu pa’u manaia, sa lolomi ai i luga lona igoa. Sa matou tuuina atu ia te ia i le pati o le Kerisimasi a le matou uarota. O le a le galo lava ia te a’u le susulu o ona foliga ma le ilaila o ona mata i loimata ma le fiafia i le vaaia o i matou o tama o faia se mea sa taua tele ia te ia.
Ina ua ou alu i le kolisi i ni tausaga mulimuli ane, sa ou iloa ai ua maliu Uso Reynolds. Sa ou alu e asi lona faletua ma lona aiga e faasoa atu i ai lo’u faaaloalo loloto ma le talisapaia o ia. Ina ua ou vaai uma i lana fanau ma fanau a lana fanau fiafia, sa ou iloa ai le faamanuiaina o au i le iloaina o lenei tamalii maoae.
“Sa alofa o ia ia te outou,” na fai mai ai Tuafafine Reynolds ma loimata ma se ataata. “Sa alofa moni o ia ia te outou.”
I se lalolagi lea e faigata ai ona taulai atu i mea sa’o, sa faaali mai e Uso Reynolds ia i matou, o le matou sootaga ma le Tama Faalelagi ma Lona alofa e sili atu lava ona taua. Atonu na matou faagataina laau a Uso Reynolds ma tuu atu ia te ia se seti fou o tusitusiga paia, ae sa ia tuuina mai ia i matou se meaalofa sili atu: o se alofa tumau mo le Faaola o Iesu Keriso.