Soifua Maloloina Faaletino: Pa’ū o Pauna ma le Upu o le Poto

Carol E. Wolf, Iuta, ISA

I le 60 ma ona tupu o o’u tausaga, sa atili faigata ai ona ou feosofai. Sa toeitiiti a 300 pauna (136 kg) lo’u mamafa. Sa tau leai so’u malosi ma se lavatia ma na oo lava ina aumai se pemita i paka a tagata e le atoatoa le malosi ina ia mafai ona ou paka latalata atu ai i faleoloa.

Sa tonu loa ia te a’u ua oo i le taimi e faapa’ū ai ni pauna. Sa ou susue i le Mataupu Faavae ma Feagaiga 89 ma tatalo atu i le Tama Faalelagi, “Fesoasoani mai ia ou malamalama i le mea tonu o loo ta’u mai e lenei [mau] ia te a’u.” I le aluga o se vaitaimi umi, na faapea ona amata ai ona i ai se faauigaga fou o upu taitasi. E ui lava ou te le inu ava malosi, lauti, po o le kofe, ma ou te le ulaula, ae sa ou le malamalama i le savali atoa. Na ou iloa o le Upu o le Poto o se taiala o le soifua maloloina, ae ou te le’i mafaufau muamua lava i ai o se ituaiga o olaga.

Mo le taimi muamua lava, na ou lagonaina moni ai e mafai ona ou suia le sitaili o lo’u olaga. Sa ou faatuina se sini moni ia faapa’ū ni pauna se 50 (23 kg) i totonu o le 50 vaiaso.

Sa ou mataituina tele le malosi o [calories] ma niutirene o a’u meaai. Sa ou sailiili i aoga faalesoifua maloloina o mea uma na ou aiina. A o ou aiina meaai maloloina, sa ou lagonaina le faamalieina. Sa leai ni meaai na ou momoo i ai. Na foliga mai ua iloa e lo’u tino mea sa ia manaomia. O meaai le maloloina sa masani ona ou fiafia i ai ua le toe mananaia. Sa tuu lo’u ai mea suamalie. I le aluga o taimi, sa tuu ai lo’u faitauina o le tele o le malosi o [calories] ae ai meaai e maua i laauiti, e pei ona fai mai le Upu o le Poto “o mea uma e fua mai, pe e i totonu o le eleele po o luga o le eleele” (MF&F 89:16). Sa ou ausia la’u sini ma na sili atu. I le silia teisi ma le 23 masina, ae ua pa’ū le silia ma le afa o le mamafa o lo’u tino. Ua 12 fua o ofu ua laitiiti ai! Ua silia ma le tolu tausaga o o’u tausisia lena mamafa.

Ua ou lagona le maloloina. Ua le toe i ai ni faafitauli i le tausisia o le tulaga e tatau ona i ai le suka pe a ou fiaai, ma ou te le manatua le taimi mulimuli na tiga ai lo’u ulu. Ua le toe manaomia ona inu ni a’u vai po o ni fualaau. A o saofaga le pa’ū o pauna i le aotelega o o’u faalogona i le ola manuia, ua faapena foi ma le sitaili fou o lo’u olaga.

O le puleaina o mea ou te aia o se vaega o le faatoilaloina o le tagata o le lalolagi (tagai Mosaea 3:19). O le taunuuga o lena mea, ua faaleleia ai lo’u iloatino faaleagaga, ua mafai ai ona ou maua le folafolaga e faapea, “o le a [ou] maua le poto ma oa silisili o le malamalama, o oa natia lava” (MF&F 89:19). O le lafoai o meaai e le maloloina e faigofie ma vave ona maua mo le poto o se fesuiaiga lelei lea.

E sili ona ou faafetai i se Tama Faalelagi agaalofa o le na faafofoga i la’u augani faatauvaa ma tuuina mai ia te a’u se vaaiga manino i le Upu o le Poto. Ua ou iloa o le Upu o le Poto o le faaaliga. Ua ou iloa e mafai ona suia ai olaga.