O Mafuaaga e Sefulu Ou Te Fiafia ai i le Tusi a Mamona

Saunia e David Fullmer

E alala le tusitala i Iuta, ISA.

I le avea ai o se molimau lona lua a Iesu Keriso, o lenei tusi ofoofogia ua aoao mai ai mataupu ma aoaoga faavae e le o maua i se isi lava mea.

Ata

Christ appearing to the Nephites

Faamatalaga mai le Ua Asiasi Iesu Keriso i Amerika, saunia e John Scott

Ou Te Fiafia i le Tusi a Mamona I se tulaga lautele, ou te fiafia lava i ai mo le mana o loo i ai i le aumaia o le au faitau “ia latalata i le Atua e ala i le usitaia o ona mataupu, nai lo se isi lava tusi.” Atonu o le mafuaaga lena na faatatau i ai le Perofeta o Iosefa Samita o le “maaauau o la tatou tapuaiga,” ma “e silisili ona sa‘o i loo se isi tusi i le lalolagi.”¹

Ae ou te fiafia foi i le tusi mo ni mafuaaga patino. O ni mafuaaga nei se 10 o le tele o mafuaaga:

O Le Tusi a Mamona …

Sa tusia i se vaitaimi e tasi o le talafaasolopito e faaaoga e le au faitau o le isi [vaitaimi]—o tatou. Tagai Mamona 8:16, 34–35.
O loo faamatala manino mai ai metotia a Lusifelo mo le faasalalauga o mea faataumaoi i aso e gata ai. Tagai 2 Nifae 28:3–29.
Ua tautino mai o vaivaiga faaletagata o se avanoa ia malosi ai, ma o le o mai ia Keriso ma le lotomaualalo, o se mea lea e manaomia. Tagai Eteru 12:27.
Ua faamatalaina le alofa moni o le alofa mama lea o Keriso ma o se meaalofa paia e mafai ona faia i ni laasaga patino ina ia maua ai. Tagai Moronae 7:43–48.
O loo faamanino mai ai le manaomia o le faafeagai i mea uma. Tagai 2 Nifae 2:11–13.
O loo faamatala tonu ma manino ai tulaga e mafai ai e le alofa mutimutivale ona faamalie manaoga o le faamasinotonu. Tagai Alema 34:11–30.
O loo tusifaamaumau ai vaega se lua o tagata na tuu i ai ni faatonuga faapitoa ia suesue i upu a Isaia, o le tasi o ia [vaega] o i tatou. Tagai 2 Nifae 25:4–8; Mamona 8:23.
Ua avea o se soa molimau faatasi ma le Tusi Paia i le sootaga a le Atua ma le tagata, e pei ona muai ta’ua i se valoaga o le Feagaiga Tuai. Tagai Esekielu 37:15–20; 2 Nifae 28:29; 29:3–8.
O loo i ai se folafolaga, afai tatou te faitau ma tatalo e uiga i ai ma se loto faamaoni, ma le faatuatua ia Keriso, o le a faaalia mai e le Alii ia i tatou o Lana lava upu lea. Tagai Moronae 10:4–5.
Ua aoao mai, o puapuaga o le Faaola na tuuina atu ai ia te Ia le malamalama lelei i o tatou tofotofoga ma le tomai e fesoasoani ai ia i tatou a o tatou tauivi ma na [tofotofoga]. Tagai Alema 7:11–13.

E sili i lo na mea uma, ou te fiafia i le Tusi a Mamona ona o lana molimau manino o Iesu o le Keriso. Ou te fiafia i ai mo lana folafolaga o le a iu lava ina togiola uma e le Alii le aiga o Isaraelu pe a latou osia ma tausia feagaiga paia ma Ia. O le Tusi a Mamona o se vavega o ona po nei—o se meaalofa o le alofa ia i tatou mai le Atua lava Ia.