O Leo o Le Au Paia o Aso e Gata Ai
Tupe: Polesi, Falaoa, ma le Araisa ma Pi
Ua taofia le igoa, Hawaii, ISA
Ata na tusia e Stan Fellows
O le aoga na faauu mai ai lou toalua sa taugata lava, o lea sa matou tulimatai atu ai i se galuega o le a fesoasoani e totogi uma ai a matou aitalafu. Sa ofoina mai ia i maua ni isi o tulaga ae sa sili atu ona ma fiafia i se tulaga o se polofesa i le kolisi i Hawaii. E ui i lea, ina ua taunuu mai le ma konakarate, sa maualalo ifo le totogi nai lo o le mea na matou talanoaina. Sa logoina i maua e faapea sa i ai se aiaiga fou ma o le fetuutuunaiga sa le o se mea lea e filifili ai. Sa ma lagona le mautinoa i le galuega fou o lea sa ma saini ai lava le konakarate.
Sa matou fiafia lava i Hawaii, sa fiafia lou toalua i lana galuega, ma sa faamanuiaina i matou o se aiga. Sa foliga mai sa sologa lelei mea i le totogiina o le ma aitalafu a le tagata aoga, seia oo ina logoina i maua e le kamupani kata fai aitalafu, o le ma pasene fou o le a 14 pasene nai lo o le 3 pasene na i ai i lea taimi. Sa ma finau atu sa totogi i taimi uma i le taimi sao a maua peimeni ma na uma ai ona totogi le tele o le aitalafu. Peitai sa lei suia le tala a le kamupani.
O le mea muamua, sa ma faia nisi o auala fou e maua ai ni tupe, fesiitai a maua paleni i kata fai aitalafu eseese e selo pasene ia tului mo ni taimi pupuu. Ona amata ai lea ona tuutuu i lalo tupe faaalu. Sa matuai tele se faaitiitia o le paketi o a matou meaai, lavalava ma napekini [o tamaiti] mo le matou aiga e toafitu. Sa matou ola i a matou meaai na teu. O taeao uma lava sa ai ai a matou polesi; o aoauli uma sa ai ai a matou falaoa e fai i le fale; ae o afiafi uma sa ai ai a matou araisa ma pi. Sa leai ni mea taugata e pei o pata, susu fou, po o vai suamalie. A uma ona totogi la matou sefuluai ma tupe faaalu masani, ona alu uma lea o le matou tupe maua i le totogiga faauma o a matou kata fai aitalafu.
O le ono masina mulimuli ane, sa uma ai ona matou totogia le 90 pasene o le matou aitalafu! Ua faateleina e le Alii la matou tupe maua i auala faavavega. Sa mafai ai ona matou vave totogiina uma le aitalafu na totoe, ma matou te matuai faafetai ai lava. O loo faasea pea lau tama teine e uiga i le vaitaimi sa ia aiina le polesi i taeao uma, ae ua ou iloa, o le totogiina o le matou sefuluai ma le usitai i le perofeta, sa faamanuiaina ai i matou i mea tautupe ma le faaletino.