Kawakina Au Tabati

Iroun Mackenzie Brown

E maeka te tia korokaraki i Utah, USA.

young woman in sacrament meeting

I rimwi! I kawaekoakoai ni karina kunnikaiu ae tararaoi, n anaa kabaean irau, ni butinako nakon te taromauri, katea au kaa, ao ni kawaekoaai n rinnako. Whew! I kunea te kaintekateka n te tabo n taetae ngkai e teirake te bitiobi ni waakina te bootaki n toa.

N na I taetae naba n te Tabati anne, ngaia are I kawaekoaai n tarai baike I korei ibukin au taetae, ni kakoaua raoi bwa akea te bwai teuana ae I mwaninga. Imwaain ae I taraia, taraan ae e a bwara te bootaki n toa, ao I a nako ni kaea te Reirei n Tabati. Te tokanikai riki teuana n te toa!

Ma bon te tokanikai raoi?

N te wiiki are imwiina I moanna ni miimi. N roko n te Tabati are imwiina, ao ngkai I tekateka n te bootaki n toa, n iangoia bwa tera nanon te toa nakoiu, n te tai ae waeko ao e kaoti te iango teuana: I motinnnanoia ni katoa wiiki bwa N na ururinga Iesu Kristo n taai nako, ma N na kanga n taua raoi ma nanou ni karaoa anne?

I tangiria ni bitaki, ngaia are I iangoia bwa N na karaoa au babaire ni katoa wiiki.

• N te wiiki anne, N na kabanea au tai n iangoa kateiu ao ni bubuti kabwaraan au bure. N na kakoaua raoi bwa N na moantaai n roroko n taromauri bwa I aonga n ongongora nakon te kuna ni kamaanene ao n namakina te Tamnei.

• N tain te toa, N na ururinga Iesu Kristo ao ana Mwakuri ni Kamaiu. N na tataromwaaka n rinanon te bwai ae I karaoia ae eti ao ae e bure. N na bon titirakinai, “te Uea, tera ae I kabwaka iai?” (taraa Mataio 16:24).

• Ni katoa bong imwiin te toa, N na bae n tataro ibukin buokau ni kanakoraoa arou ao n uringa Kristo.

Ngkai I iriira te bwai are I baireia, I rikirake n tangira te toa! I tangiria n tataro nakon te Tama are i Karawa ao ni marooro ma Ngaia ibukin maiu. N aki tabe ma aron kateiu n te wiiki ae nako, I kakaitau n taainako ibukin ana Mwakuri ni Kamaiu Iesu Kristo ao te tai ni bitaki ao n tamaroa riki. Ngkai I reiakinna bwa te toa tiaki tii ibukin te Tabati; bon ibukin ae katoa bong.