ANGA REIREI N ANA KAWAI TE TIA KAMAIU
Ataakiia Kairake ake Ko Reireiniia
Karaoa am kona n reiakina taekaia kairake ake ko reireiniia ni kona ni buokiia bwa a na rairaki.
Angiina aomata aika kairake iai ungan nanoia ao korakoraia are a kona ni karaoa te anga reirei ao te kairiiiri bwa e na kakukurei. Ma tabeman a bae n rinanona bwa te kakaewenako ngkai a rikirake ao n ikawai riki—bwaai ni kabane ni karaoan te bitaki nakon rabwataia, te rawawata n te reirei, karawawata n aron te katei are e kataia ni kairoroiia man maiuakinan te euangkerio. Kairake a kainnanoia taan reirei ake a ataiia ao n tabeakiniia. A kainnanoia taan kairiiri ake a karikirakea te tabo ae mano ibukiia n reirei ao ni kamwakuri bwaai aike a reiakin.
Aikai bwaai tabeua ake a na bae n rangin ibuobuoki n ataa rongorongoia kairake ngkai ko babaire, ni katauraoi, ao n reireiniia n ana kawaki te Tia Kamaiu.
1. Kairake a tangiria ao ni kainnanoia n reiakina te tua. N te aonaaba are e kaakeai ana kainibaire te euangkerio, kairake a bwarui koaua aika akea tokiia. A tangiria ni kan reireinaki “bwaai aika ngkai, ma aika a na roko” (Iakobwa 4:13). Bwaai aikai a kuneaki n tuan te euangkerio. Ngkai ko anga reirei, kateimatoa am taratara iaon te tua are e kuneaki ni booki aika a tabu, aia reirei burabeti aika a maiu ao abotoro, ao bwaai n reirei tabeua ake a kinaaki n te Ekaretia. Kaungaia kairake ni kamatebwai bwaai n reirei aikai i bon irouia n akea ae e buokiia. Iai korakoran te tua (taraa Aramwa 31:5).
2. Kairake a kataia n ataia bwa antai ngaiia ao tera ae a na karaoia. A kataia n ota bwa antai ngaiia ao ni kan riki bwa aekakira ngaiia. Ngkai a katauraoi ibukin tabeia n taai aika imwaaira, a na bae ni miimi bwa tera are e baireia te Uea ibukiia ao ngkana a kona ni karaoi bwaai ni kabane ake a kantaningaaki iai. Ngkai te karo ke te tia reirei, ko kona ni kaunga te onimakinaki n taekan taai aika a na roko ao n anga te kairiiri ni katauraoi nako iai. Buokiia bwa a na rikirake ni kaan riki ma te Atua ao ni kanakoraoi maiuia iaon ana kainibaire te euangkerio. Reireiniia kakawakin te tembora ao tabeia ni katea uean te Atua.
3. Kairake a ataia ngkana iai taben nanom iai. Ibukiia kairake ni kabaeaki raoi n reiakinan te euangkerio, a kainnanoia bwa a na ataia ae ko tangiriia ao n iai nanom irouia ngkai bon aomata ngaiia. Ongo irouia. Tarai tamaroaia ao kateitei iaon anne. Kabwarabwara onimakinaia iroum ao katauraoa am kakoaua bwa a kakawaki ao ni kainnanoaki.
4. A mwaiti bwaai aika a nano iai kairake. Kairake n tatabemaniia nako bon aomata aika a onoti. Kaniiko n atai bwaai aika a nano iai, kaiinnanoia, ao aia kaangaanga. Aei e bae ni kainnanoa reitakim ma ngaiia n tiaki tain boowi aika baireaki ni katoa tai, n te kiraati, ao waaki ni kakukurei. Karenako bwa ko aonga ni kinaia, ko na karekei atatai ni koauan baika a raba rinanon te Tamnei ibukin kainnanoia are a na kona ni butimwaea am anga reirei nakoia. Ngkai kairake a namakina nanom ae koaua inanon maiuia, a na uki riki nanoia nakon am anga reirei ao am kakoaua.
5. Kairake a kona ni karekei kaekaan aia titiraki. Taan kan reirenaki inanon aia ririki nako iai kukurein nanoia ni kunei atatai aika a raba ni koauan te euangkerio, ma aei e bon onoti kakawakin aei ibukiia ake aia ririki tebwitabun ngkai a karikirakei bonganaia ao aia onimaki. Reirein te euangkerio iai mwiia ae reitinako ngkana a reireinaki iaon aia konabwai ae onoti—ao ni maiu. N oneamwiin are ko na anganiia kairake taian kaeka, ko kona ni kabonganai anga n anga reirei are a na kaoiia ao n anai nanoia ni karekei oin aia kaeka. Aei e na kairiiri nakon te rairaki ae korakora—te kouru ae te kabanea n tamaroa ibukin ana kaetieti ni kabane te euangkerio.
6. Kairake a kona n reirei i bon imarenaia. Kairake iai nanoia ni katauraoi ango iaon bwaai ake a reiakinaki ao ni kukurei n tibwai baike a atai. Man am katooto ao kaetieti, ko kona ni buokiia bwa a na ataia bwa a na kanga n anga reirei n ana kawai te Tia Kamaiu. Ma am kairiiri a na bae ni moanna man te anga reirei iaon mwakoron te reirei ke ni kaira te kabwarabwara ae uarereke. Ngkai a karekei aia atata ao onimakinaia, a kona ni karekei taai n anga te reirei ae bwanin. Ngkana kairake a reiakinaki i bon imarenaia, a ibuobuoki ni kakorakoraia i bon imarenaia ni katarai kairoro mairouia naake a aki tibwai aron bonganaia.
7. Kairake a reiakinaki bwa a na kanga n riki bwa taan kairiiri aika a nakoraoi. Beretitentii n te kiraati ao te kooram iai nakoaia ae tabu ni kairiia aia roro. Ma e ngae ngke a tia n rinanon te kairiiri, a bon kainnanoa kairaia mairoum bwa a na kanga ni kairii boowi, n ibuobuoki n reirei i bon imarenaia, ao ni karaoa te mwakuri. Taai ni kairiiri tabeua a kaoti n te mweenga ngkai kairake a anganaki tabeia aika a uaana.
8. Kairake a reiakinaki mairouia kaaro ao tabeman man katooton maiuia. Mwakoron tabem ae kakawaki ngkai te tia reirei bon am ibuobuoki ni kakorakora te reitaki imarenaia kairake, aia tia kairiiri, ao aia karo. Ko kona ni buokiia kairake ni karekei kaekaan aia titiraki aika mwaiti, ma tabeua aia titiraki e na tamaroa riki ni kaekaaki mairouia aia karo ke taan kairiiri. Kairiia kairake ma te kaetieti bwa a na karekei aia kaeka mairouia aia karo ao ni kaungaiia bwa a na kakorakorai aia motinnano aia utu. Reitaki ni katoa tai ma kaaro ni bwaai ake ko kamatebwai inanon te kiraati ao n tibwai aia tarena, rikirakeia, ao aia anganano aika raraoi ake ko noori irouia natiia mwaane ao natiaa aine. Titiraki bwa tera are ko kona ni karaoia ni buokiia ngkai a reireiniia naitiia.
Ni buokakiia kairake bwa a na rairaki a uaia ni kainnanoaki aia konabwai kaaro, taan kairiiri, aetuwaitia, ao taan tia reirei, n ikotaki ma taan tia reirei n te tieminari. N ikotaki ni kabane kam kona ni karika te taneiai ae e rang uaana riki ibukiia kairake nakon are ko na bon kakoroa nanona ni bon tii ngkoe.