Mwanangau ngke I riki bwa te Bwaeoniia mai Inria
Te tia korokaraki bon mai Telangana, Inria.
I tanrikaaki nakon mwanangau are ngke I riki iai bwa “ataeinimwanen buakonikai” n tio nako man te kaawa i Inria nakon are I a mena iai ngkai n te tai aei ao n ataia bwa maiu ao au onimaki bon te kakai ni koaua.
Kamataata n te tamnei ngke e ataeinimwane iroun Wendy Gibbs Keeler; tamnein Taj Mahal, paisley mai buki, postage stamp © iStock/Thinkstock, Hemera/Thinkstock
I bungiaki n te kawa ae uarereke n te buakonikai are e katobibiaki n te maunga i Mainikun Ghats i Inria. Ngke 18 au namwakaina, ti mwaing nakon te kaawa ae Dangrapalli i etan te karanga ae Kolab. I uotaki inanon te bwaene ngke a rianna au karo. Kaain te kaawa bon 20-25 utu, ake a maeka inanon auti aika a uarereke ao akea te iti iai. Akea ara reirei, onaoraki, ke te tabo ni katei bwati. Ti ken bangabanga imataniwiin te karaanga ni karekea iai nimara te ran. I kabanea au tai ngke I uarereke n takakaro ni maraen te buakonikai, nakonako iaon te waenikoroa iaon te aonenei, ao n uaua inanon te karaanga.
Au bakatibu bon ibonga n te tembora n te aro ae Hindu iaan te uea are Maharaja are uean Bastar mai Jagdalpur. Ma ngke e a moanna ni kakamaku te waaki n tautaeka, tibu te unimwane ao ana utu a birinako nako Kotpad. A kamanoaki n te German Lutherna mition, are e a mwakuri iai bwa te tia tararua ao te tia mwakuri ae te Ayurveda (bwainaoraki man kaai) Bon mai ikai are tibu te unimwane e rineia bwa e na rairaki nakon te aro ni Kiritian.
Tamau e reitanako te onimaki ni Kiritian n riki bwa te tia tataekina te euangkerio ao te guru (tia reirei) Ngke I bungiaki, I aranaki bwa Mangal Dan Dipty (nanona “tamaroa,” “bwaintangira” ao “ota”), bwaibwai ni katein te aro ni Kiritian.
Ngke I uarereke I tataromauri n te aro ae German Lutheran n tainako. Ti nanako n tataro n ikotaki n te maunga n tabetai. N te taina n te bong ae kakarau, ni kabane kaain te kurubu n tataro a bane n rotoroto, ao temanna te tia kabwarabwara e tataro ni bubutia te Uea bwa e na katoka te karau. Ni mimiira ao e toki te karau. Aio moan waakin au onimaki iroun te Atua ao te tataro.
Te Moomon te Aro ni Kiritian?
Imwiin te kawaniua ni koraki, I katoka au reirei ao I nakon te tieminari ibukin teniua te ririki i Kotpad ao I a katabuaki bwa te tia tataekina te euangkerio, n aron au karo. Imwiin tabeua te ririki ni kakaira te bootaki n taromauri inanon ao ni kawan nako Kotpad, I mwaing nako meangin Inria, are I a waaki ni kabonakoi iai booki man te Evangelical Christian Literature society. I a kunea te boki ae atunaki n Is Mormonism Christian? (Te Moomon te Aro ni Kiritian?) Te bwai ae kakaongora nakoiu taekan te boki aei, ao I a baireia bwa N na warekia.
Te boki e rang n rawata iai kabuakakan te Moomon ao ana koaua. Arona naba, a mwaiti mwakoron te boki aei ae kakaongora nakoiu, riki aia reirei n Aron Taian Atua, aron aia taromauri, ao rongorongon te iein ma aika a mwaiti. E ngae n anne, te bwai are e rang anaaki riki iai nanou bon aran aia ekaretia ae aranaki iroun Iesu Kristo. E rang tabetabe nanou ni kan atatai riki.
N te bong teuana ngke I tataro, I namakina te ungannano ni kakaea te Ekaretia ae te Moomon. I ataia bwa Kaawan Salt Lake, Utah, bon ana etekuata te Ekaretia. I baireia bwa N na korea te reta ae atuunaki nakoia “Mwane aika katabeaki n Ana Ekaretia Iesu Kristo Ibukiia Aika Itiaki ni Boong Aika Kaitira, Salt Lake City, Utah, USA.”
Reirei mai iroun te Abotoro
N 1959, kaekaakin au reta, Tari Lamar Williams man aia Aobiti Mitinare n te Ekaretia e kanakoa nakoiu ana kakoaua Iotebwa Timiti, Ana Onimaki te Ekaretia, ao ana Boki Moomon. I kamatebwaiia ni kabane ao e anaaki nanou ibukin koauaiia. E ngae n anne, bon akea mitinare ke kaain te aro aika a na reireinai i Inria.
Ngkanne n Tianuare 1961, Unimwaane Spencer W. Kimball (1895–1985) man te Kooram n Abotoro n te Tengaun ma Uoman e a roko i Delhi. I kabanea tenibong ma ngaia ni mwananga nakon te Taj Mahal i Agra ao nakon te Dharamsala. I ongora ao ni butimwaai ma te kan atatai are I a riki bwa kaanga te ongantari ae onrake ni kabane n te euangkerio ake e reireiakinai. N ana kabanea ni bong, I a tauraoi ni bwabetitoaki. N Tianuare 7, 1961, I bwabetitoaki iroun Unimwaane Kimball n te Karanga are Yamuna; Titita Kimball bon ngaia te tia kakoaua, e ngae ngke a mwaiti taan mataku aika a miiakiniira. I kamatoaki n te tairiki anne.
Boong ake teniua akanne ngke ana Abotoro te Uea e reireinai n akea tokitokina e a tia n riki bwa tabeua kabanea n tamaroa ni bongin maiu. Te maenako e bon kananokawaki ibukina bwa e a tia n riki bwa raraou ae onoti kaain te Moomon.
Te Kan Riki bwa Aomata aika Itiaki
Imwiin nakon Unimwane Kimball, I tibwaua au namakin n rairakiu ma raoraou ao a kaenaenaai. Ma I ataia bwa e koaua te euangkerio ao I aki kona ni kakewea, ngaia are I baireia bwa N na kakaea au mwakuri teuana. I a waakina au bitineti ni karao kunnikai n aron are e waakinna tamau. Inanon waeremwen te tai, I a taia bwa I aki kona n rikirake ni karokoa I karekea riki te wanawana n te reirei. I a roko n te roro ae 20 tabun, ao iangoan te oki rikaaki nakon te reirei e a bon kararaoma, ma I kabanea ruaiwa te ririki imwiina ni karekea te reirei. I karaoa au bitineti n te ingabong ao I kamatebwai n te tairiki. I kabanea au kareke mwane ni kabane iaon te reirei. I kamatoa nanou ni iangoia n tokanikai ao I tataro ibukin te buoka mai karawa. E reke au baatiira tikurii n te psychology, sociology, ao te art man te Uniwetirii ae Agra. N tokina, I a roko n te Uniwetirii ae Meerut ni kamatebwai ibukin te tikurii n te tua.
Inanon moan iteran te ruaiwa n ririki akanne, iai te utu teuana i Delhi aika a Itiaki ni Boong aika Kaitira, ae e mwakuri bwa te tia tei ibukin te U.S. I mwananga nako Delhi ibukin te bootaki n toa ni mweengaia. N 1962, Unimwane Richard L. Evans (1906–71) man te Kooram n Abotoro n te Tengaun ma Uoman e kawariira, ao inanon 1964, Unimwane Gordon B. Hinckley (1910–2008) man te Kooram n Abotoro n te Tengaun ma Uoman e roko. I uringnga ngke I katoka te mwae iaon Unimwane Hinckley ao n anganna au bwaata are I kawakina iai au kabwianibwai, are I kaikoa inanon ririki aika a mwaiti.
I nanokawaki, taai n iraorao akanne—e ngae ngke a ibuobuoki—aki bati n riiriki, ao n tiku i Inria e teimatoa n akea raou tabeman aika a Itiaki. Aio I nanokawaki iai. Ngkai e karaurau n nako te ririki, a tabe n riki kakaitara nakoiu ao aio I a rootaki iai, ao I nooria bwa akea kanoan au bong n taai aika a na roko iaon Inria. I rang tangiria ni karekea te nakoanibonga ao ni maeka ibuakoia aika Itiaki.
N Riki bwa te Bwaeaoniia
Ngke I namakinna bwa e a roko te tai ni kaaniia aika Itiaki, I katoka au kooti iaoan te tua ao I mwananga nako Canada. Ngke I roko i Edmonton, Alberta, I nakon te uoote ae uakaan. I kaitibo ma Bitiobi Harry Smith ao I waekoa n namakina ae I roko n oin au tabo ni butimwaeaki ma te iraorao n te uoote anne. I nakon te Tembora ae Cardston Alberta, e ngae ngke I tuai ni kona ni karekea au entaumente.
I tangiria n roko n te Kaawa ae Salt Lake ni kakubanakoia raoraou aika Unimwaane Kimball ao te Tari Lamar Williams. N tokina, n te tiburing n 1969, waniua te ririki imwiin au bwabetito, I roko n te Kaawa ae Salt Lake ni kaitibo ma Unimwane Kimball. E rang kukurei ao e kabanea teuana ana bong ma ngai.
N tiku n te Kaawa ae Salt Lake, I nako n te tabo ni koroira bwa e na koreaki irau. I tibwa au koaua ma te tia koroira, are bon temanna naba ae rairaki. Temanna te mwane, e tataninga ana tai, e ongra irou ao e tuangai rongorongon mwanangana nako Inria. E kabooa korean irau, kaoai ibukin te katairiki, ao e nikirai i Brigham Young Uniwetirii. I rang mataai n noora te kaawa n reirei. I taekinna ae I kan reita au reirei ikai ma I aki kona ni kabooa. Te mwaane arei e anganano ibukin roou n te mwaiti ae $1,000. I bon rang mimi ao I rang kakaitau.
Mai eta: Tari Dipty ngke e riki bwa ataein te reirei i Inria. Mai nano: Tari Dipty (maing) ma Paul Trithuvadaa, temanna naba te bwaeoaniia ae kaain te Ekaretia mai Inria, n te Tembora Tikuea ni Kaawan Salt Lake. Maing: Beretitenti Spencer W. Kimball karaoa te mwakoro ae moan te kakaawaki ni mwanangan te Tari Dipty ni bwaeoniia.
I a ira te burokuraem n te mwakuri ma te botanaomata n te BYU. N 1972, imwiin au angabeebwa man te BYU, I mwaing nako Salt Lake ni karekea au mwatita tikurii man te Uniwetirii i Utah. Imwiina I mwaing nako California, USA, ao I a karekea au PHD n te clinical psychology, angareirei iaon kooti ni katokan kakeru, ao n te korokaraki. Ngkai I a ritaea ao I maeka ma kainnabau, Wendy, i Nevada, USA.
Iai taai are I rinanon iai te korakai, kakaewenako, ao kataaki. Au taratara iaon te euangkerio ao te kakabwaia n te tembora e buokai n tokanikai iaon kakaewenako inanon maiu.
Ana Babaire A Tamaroa
I tanrikaaki nakon mwanangau are I riki iai bwa “ataeinimwanen te buakonikai” n tionako man te kaawa i Inria nakon are I a mena iai ngkai n te tai aei ao n ataia bwa maiu ao au onimaki bon te kakai ni koaua. Ana katamaroa te Uea nakon maiu bon moan te tamaroa riki nakon are I kantaningaia. Ai tamaroara reken ana burabeti te Uea ae Spencer W. Kimball n reireinai ao n nakonako ma ngai n taai aika rang kakawaki ni mwanangau inanon maiu.
I aki toki n ururing rikaaki n au tai ma Beretitenti Kimball. E kaoai nakoia ni mwanangan aia utu ni kaembwa, bikiniki, ao n te Bong ni Kakaitau ao ni katairiki n te Kiritimati. N taai akanne I ataia bwa bon ana Abotoro ni koaua ao ana burabeti te Uea Iesu Kristo.
I kaitibo ma Beretitenti Kimball te kabanea n tai ngke e a rang aoraki. Ma e teimatoa ni moangare nakoiu ao e inga ma ngai. Bon ngaia au moan reitaki man te LDS, ao I ataia bwa e bon aki kona ni kiitanai.
I kakaitau nakon te Atua ibukiia ara burabeti ao te euangkerio are e kaokaki. Ara Ekaretia bon te katooto mai karawa are e kainnanoia te aonaaba ni bong aikai. Ibukin te Ekaretia I a kona ni karekea au reirei ao ni karikirakea arou n aomata. I kakaitau ibukin te bong anne ao I ataia bwa te tataro e koaua ao I tatauraoi ni kakauongo nakon te bwanaa ae maarara, ao ni ukoukora te Ekaretia. I kakaitau bwa I kariaia bwa e na kateiraoa maiu te Uea. I ataia bwa ngkana ti ukoukora Abanueana ao bwaai ni kabane a na bane n raonaki bwaai nakoira (taraa Mataio 6:33).