Te Bitaki are e Kona n Reke n te Boowi ni Kauntira n Tia Reirei

Iroun Sandra Cattell

Teuana te kaoti n te boowi ni kauntira n tia reirei e korakora riki bitakina nakon au kawai n anga reirei.

Boowi ni kauntira n tia reirei a buoka Sandra Cattell (inuka) ni kanakoraoa ana konabwai n anga reirei.

I a bon kara, ngaia are ngke I weteaki bwa N na reireiniia ataeinaine, I taku, “Akeao! I miimi bwa e aera ngkai a weteai?”

E korakora mwaitin au katauraoi n te anga reirei ibukin kainnanoia ataeinaine, ao au kantaninga a na tauraoi n tibwai baike a tia n reiakin ao ake a tia ni karaoi ma ngaia inanon te wiiki. Ma ngke I a tabeki au titiraki angin te tai akea te ngoongoo n te tai ae maan imwiina.

Inanon teuana mai buakon ara boowi ni kauntira n tia reirei, e taku temanna te tia reirei e rang kaangaanga irouna ni karekeia kairake bwa a na kakarabakau n tain te reirei. E taku riki temanna te tia reirei, “Eng, ko ataia e raoiroi bwa ko na kariaia ae e na iai te aki ngoongoo.” N tabetai aomata a kainnanoa teutana aia tai n iangoa aia titiraki imwaain kaekaakina.

Anne te kaoti n te boowi ni kauntira n tia reirei e karaoa te bitaki tiaki tii te kawai are I anga reirei iai ma ibukiia naba au ataei. I kabatia iangoakin te taneiai anne. N au reirei are imwiina n te Bootaki n Ataeinaine, I titirakiniia kaain te kiraati tera reirein te euangkerio ake a tia ni kamwakuria inanon te wiiki. N aron ae e taneiai iai te aba, iai te aki ngoongoo. Ma n onea mwiin are e na iai te bwai ae N na taekinna ibukin te aki ngoongoo, I uringa ara marooro ni kauntira n tia reirei ao ni karaurau n taetae, “Akea te bwai ae e na kawaekoaki.”

Te tai are I taekina iai anne, e a moanna ni waaki te marooro. A moanna ataeinanine ni kaoti aia iango ma aia namakin, ao a tibwai tabeua taneiai aika a bebete. I waekoa n tangiria bwa N na karabwa te tia reirei are e a tia n taekina te taeka ae e bebete n te boowi ni kauntira n tia reirei ibukin te aki ngoongoo. I bon miimi bwa e kanga aron kamwakuran teuana te reirei ni karaoa te bitaki ae korakora n te tai ae waekoa.

Ma I aki ataia ni karokoa are imwiina bwa tera te bitaki ae karaoaki n reiakin tabeua taian reirei. Imwiin te taromauri temanna mai buakoia tinaia ataeinaine e tuangai natina te aine bwa I a tia ni weteaki mairoun te Atua.

I aki kona n tuangko bwa kakawakira ongoraean te kaoti anne nakoiu. Ikanne I tabe n iango, “Tera ae iai irou ae N na reireiniia iai ataeinaine aikai” Ma I riai n reireiniia te bwai teuana. I weteaki bwa iai bukina, ao te boowi ni kauntira n tia reirei e buokai ni kakoroa nanon te kantaninga anne.

Tera oin te kantaninga ibukin Boowi ni Kauntira n Tia Reirei?

Ibukina bwa ngaira natin te Atua ni kabane, ane e tauraoi n reiakinaki ao ni maiuakina te euangkerio e na kona n riki n ai aron Tamara are i Karawa. Taan reirei iai tabeia ae e kakakwaki bwa a na reirei aron reiakinan ao maiuakinan te euangkerio.

Ni buokiia taan reirei, te Moan Beretitentii ao te Kooram n Abotoro n te Tengaun ma Uoman a kaoa te uoote ao te mwaanga ni kabuta te Ekaretia ni moana karaoan te boowi ni kauntira n tia reirei. Boowi aikai ni katoa namwakaina a karekeaki angaia taan reirei ao taan kairiiri ni kaai n reiakinaki ngkai a tibwai aia iango ibukin te anga reirei.

Boowi aikai a boou, ma a kaman reke uaaia ae a tamaroa iaoia taan reirei ao taan reireinaki. Akana inanona bon aia taeka kaain te aro ake a kakaitau ao ni kukurei n te boowi ni kauntira n tia reirei.

“Karekean te waaki ni boutoka e kakorakoraai. N tabetai n arora ngkai taan reirei ti namakinna bwa kanga ti tiku n tii ngaira (n akean te boutoka ao bwaai n ibuobuoki). Ma te bitaki anne ngkana iai te kauntira ao te boowi n tibwai korakai, iango, ao namakin, ao ni karekei taian kaeka man te kurubu are e ota n nanon te wewete.” —Preston Stratford
“Boowi ni kauntira n tia reirei e buokai n ataa kakawakin au konabwai ni kabebetea aron te reireiaki.” —Margaret Tueller
“I kukurei ni karekei iango bwa a na kanga taan reirei n reiakinna ni ‘katurua taraakin kainnanoia naake a reireinaki nakon tii katuruan taraakin te anga reirei.’” —Richard Pattee
Maroroakin kawai ni kanakoraoia bwa ti na kanga n tabeki titiraki ao ni kaungai riki kakarabakau ake a tia n rangin ni kakawaki. Ni karekea te kona ni maroroakina taekan te nakoraoi ao te tabeaianga e a tia n anganai naba te atatai.” —Ken Sonnenberg.
E a tia te kauntira ni karaoa tabena ae e rangin tamaroa iaon konabwai n anga reirei are e na karikiira bwa taan reirei aika a nakoraoi. Ngkana ko rangi ni mwaatai n aron te tia reirei, aomata ake n am kiraati a kona ni kakabwaiaaki. Inanon te kauntira n tia reirei, I namakinna naba bwa I rikirake n te maiu n tamnei.” —Brent Nelson
“E rang kakukurei bwa e kona ni karababaaki au iango ibukin kanakoraoan te anga reirei.” —Camille Fronk

N reiakina riki taekan te boowi ni kauntira n tia reirei ao te Anga reirei n ana Kawai te Tia Kamaiu, nakon teaching.lds.org.