Kaeka mairouia Taan Kairiiri n te Ekaretia
Ko na Kanga ni Bubuti Ibukin Kakabwaia n te Tembora
Iroun Unimwaane Ronald A. Rasband
Man te Kooram n Abotoro n te Tengaun ma Uoman
Man te marooro n nebonebo are e karaoaki i Bringham Iuniwetiri ni Beberuare 10, 2009. Bukin taekana ae bwanin n te Taetae n Imatang, nakon speeches.byu.edu.
Tembora bon maneaban Iehova, ike a manga kamatoaki iai ana reirei ara Tia Kamaiu rinanon otenanti aika tabu n aron te bwabetito ibukiia maate ao te mare, are e a katiteuanaia utu n aki toki.
N na bubuti ngkami (kairake ao kairake n ikawai n te Ekaretia) bwa kam na karaoi katei n nebonebo n te tembora—n tatabemani ngkami ke n ami utu—ngkana ko iangoa te bwai ae ko na kabanea am tai iaona ao n anga am iango nakon (inanon maium), ngkana ko katei katooto ni maium aika a matoatoa. I ataia ae a mwaiti mai ibuakomi aika kam a tia ni kaman karaoa aei, ao ibukin anne ngaira taan kairiiri n te Ekaretia ni kabuta ti rangin ni kakaitau nakoimi.
E a tia te Moan Beretitentii ni kanakoa te kakao nakoia kaain te Ekaretia ni kabane, are ni koauana e kaineti nakoim ao nakoiu: “N reken taina ao mwaawan taian tabetabe, a kaungaaki kaain te ekaretia bwa a na oneimwiin tabeua waaki ni kakukurei ma mwakuri n ibuobuoki n te tembora.”
Au kantaninga bwa ti iangoi naba kakabwaia ake a tia ni beritanaki irouia burabeti, taan ni mamata, ao taan kaotioti ngkana ti nakon te tembora ma te kakaonimaki. Mairoun Beretitenti Thomas S. Monson e roko te berita aei: “Nakomai nakon te tembora ao katikui rawawatami iroun te Uea; bubutia te Uea ibukin te ibuobuoki ma rawawatam ao ko na kaonaki ma te anua ae boou ao te aki nanououa n taai aika a na roko. Onimakina te Uea, ao ngkana ko karaoia E na boutokaiko ao n tabeakiniko ao ni kairiko n te mwaneka teuana ma teuana ni kaineti ma te kawai anne are e na kairiko nakon abanuean te Atua ae te tiretio.”1
Te kakabwaia riki teuana ae e irekereke ma te nebonebo n te tembora bon kakoauaan te katanaki ao te rau man kangaanga n te aonaaba ake a katobibira n te tai aei. Tabeua taabo aika kabanea ni mano are e a tia te Tama are i Karawa ni karaoi ibukin ikotakiia ana aomata bon inanon ana tembora te Uea.
Te rongorongo iaon tinanikun oon te tembora are mai i moa e kangai taekana: “E Tabu Ba Ana Bwai Iehova / Maneaban Iehova.” I kakoaua bwa ana tembora ni kabane te Uea bon Umwana aika tabu iaon te aba. I kaoi ngkami ni kabane bwa kam na nako iai n tainako, nakon reken am tai, ao ni bubuti ibukin ao ni karekei am kakabwaia ao katanam ake a tia ni beritanaki nakoim irouia ana burabeti te Atua.