Rongorongo ni Kakawari n Reirei
Ara Konabwai n Nakoara ni Karo
Tataromwaaka ni kamatebwaia te bwai n reirei aei ao ukoukoria ni kan ataia bwa tera ae ko na tibwauaia. E kanga ataakin “Te Utu: Te Katanoata nakon te Aonaaba” ni karikirakea am onimaki iroun te Atua ao ni kakabwaiaiia naake ko tararuaiia rinanon te reirei ni kakawari? Ibukin rongorongona riki tabeua, nakon reliefsociety.lds.org.
Onimaki, Utu, Buoka
E kakawaki bwa natin te Atua aika tamnei a bungiaki n te rabwata ao iai aia tai n rikirake nakon te maiu ae akea tokina,” e reirei Unimwaane Dallin H. Oaks man te Kooram n Abotoro n te Tengaun ma Uoman. “Ibukin kakawakin te babaire ni kakukurei ae korakora, I kakoaua bwa kabanea ni kakawaki ni kaubwai iaon te aba ao i karawa bon natira ao ara kariki.”1
Unimwaane Neil L. Andersen man te Kooram n Abotoro n te Tengaun ma Uoman e taku:
“Ti kakoaua te utu, ao ti kakoauaia ataei. …
“‘… E taku te Atua nakon [Atam ao Ewa], Kam na bati ni kariki, ao kam na kabatiaingkami, ao kaona aonaba’ [Karikani B’ai 1:28] …
“Te tua aei e aki manuokinaki ke ni kakeaaki n Ana Ekaretia Iesu Kristo ibukiia aika Itiaki ni Boong aika Kaitira.”2
E ngae ngke ti aki riki bwa kaaro ngaira ni kabane n te maiu aei, ti kona ni kawakiniia ataei n roroia nako. Ti katoong taian kakabwaia n rikira bwa mwakoron ana utu te Tama are i Karawa, ao ti rinanon te kimwareirei ao taian kakaewenako n rikira bwa mwakoron te utu iaon te aba. Ao ibukiia aika mwaiti, te nakoa ni karo e tataninga imwaaia n aki toki.
Rakan riki Booki aika Tabu
Taian Areru 127:3; Mataio 18:3–5; 1 Nibwaai 7:1; Moses 5:2–3
Karakinaia Aomata Aika Maiu
“Bwanaa aika mwaiti n te aonaaba n te bong aei e kakerikaaka kakawakin karikaia ataei ke kauarerekean mwaitia ataei n te utu,” e taku Unimwaane Andersen. “Natiu aine a a kaota nakoiu te webu tiaite te rongorongo are e teakinaki iroun te tina ni Kiritian (ae tiaki kaain ara aro) ma natina aika niiman. E taekinna: ‘[Te rikirake] inanon te katei, e bon rang kaangaanga karekean taraan te nakoa n tina n aron taetaen te baibara. … Ataei akea nneia n te kuura. Akea nneia ni mwamwananga n te aonaaba. Akea nnen aia konabwai n otinako n te bong n am tai ni motirawa. Akea nnem ni kamarurungan rabwatam n te gym (tabo n takakaro). Akea nneia n te mwakuri are ko karekea ke ni kantaningaia bwa ko na karekea.’ Ngkanne e reitia: ‘Te nakoa n tina tiaki te takakaro ni kakakibotu, bon te wewete. Ko aki rikorikoia ataei ibukina ko kunea bwa a rang kakateke riki nakon taian titambwa. Tiaki te bwai ae ko karaoia ngkana ko kabotauiia ma am tai ae tatabetabe. Bon am tai ae e anganiko te Atua ibukina.’”3