Ni kaitara ma te Moantaai n Okira te Mweenga
E maeka te tia korokaraki i Utah, USA.
Te moantaai n okira te mweenga man te mition, e na bon iai bukina ni kaeti ma te marurung, e kona n riki bwa te bwai ae karawawata. Bon ibukiu. Ma ko kona ni karaoa mwanekam ni waakinako, tiaki ni manga rairakinako.
Kamatataaki n te korotamnei iroun Colin Ligertwood
E mena Tamau n te taaun ni mwanangana n ana mwakuri, ngaia are te aomata are e na tii kamaurai ngkana I a otinako man te wanikiba man au mition bon tinau. E koonai ao ti tang.
I karaoa au tutuo ae moan te bati n aron ae I kona, ma taokita akea te kaangaanga ae a kunea. Buutakin arau ni mitinare mai iaou ruaiwa te namwakina ni moantaai bon te bwai ae kaangaanga are I a tia ni karaoia. I namakinna ae I kairua n aki kabanea au mition.
Ae e Nanonaki n Riki bwa te Mitinare
I aki toki ni babaire n taai nako ni kan riki bwa te mitinare. Ngke e nako tariu ae ikawai ibukin ana mition, I kunnikainai kanga ai aron te mitinare ao I kamanena te neimtaeki ae I bon karaoia ngke ti iria ni kaboo ma ngaia. Ngke e katanoataaki te bitaki ni kaeti ma te ririki ni mitinare n 2012, I a bon tibwa tokara au ka 19 n ririki ao n ataia bwa te katanoata anne bon kaekaan au tataro. I mwamwaie inanon te ruu, ni kanoai au beeba n te bong anne, ni kabaea au tai n tutuo, ao n nikiri au beeba ni mitinare inanon te wiiki. I karekea weteau ni mitinare nako California Anaheim Mition uoua te wiiki imwiina ao n roko n te tienta ni kataneiai ibukiia mitinare uoua te namwakaina imwiina.
Ngke I roko n te tabo ni mitinare I kaonaki ma te ingainga n nano (ngkai te mitinare ae boou) ibukin karaoan te mwakuri, ao I aki tangiria bwa e na waeremwe au konabwai. Ngai ma te tia katureinai ti rinanon tabeua reirei ibukina bwa ti rang kukurei n anga reirei. Irou, te riki bwa te mitinare ae bwanin ana tai bon te bwai ae taneiai te aba iai n te aonaaba. I aki nakoraoi ao ni karawawataaki n tabetai, ma akea riki te bwai ae e kakateke riki nakon te riki ni mitinare.
Inanon waniua te namwakaina n au mition, Ngai ma toau ti a anganaki ara bwatika ibukin aki taun te kaa ibukiia mitinare. I bon tuai mani bwabwatika n te tai ae maan ao n aki koaua raoi bwa N na kanga ni karaoia ngkai I kamumuunai, ma I bon kukurei. Imwiin tabeua te wiiki, e boni ngae n anne, I a taonaki n te maraki iaon rarikiu are I a karawawataki iai. I mwanuokina taekana ao I teimatoa ni mwakuri.
E tabe n okioki te maraki ao ni korakora ni karokoa te tairiki teuana e a nikirai toau n ruun te onaoraki ibukin aoraki ma ikoaki aika karina. I karaoa au tutuo ae moan te bati ma akea te kaangaanga ae a kunea taokita.
Imwiin te wiiki anne, I tataro nakon te Tama are i Karawa bwa e na kanakoa te maraki ao ni karekei tabeua kakabwaia man te nakoanibonga, ma e a rikirake riki te maraki. I maraki e ngae ngke aekakira aron tein rabwatau; e teimatoa n iai te maraki. Ma I baireia bwa I aki taneiai iai ao n teimatoa ni waaki nako.
Te bong teuana ao I a bwaka n iteran te kawai, n aki kona riki ni kakamwakuri. I a uotaki nakon te onaoraki ni karaoa te tutuo ma a manga akea naba aia kukune iaona. I kataia ni karaurau ao n tekateka ni kaintekatekan te kai ni bwati ma toau ao n reireiniia aomata ngkai a tataninga aia bwati. I tekateka ni karokoa banen te reirei, n tenaa riau ni katabetabeai man angin te maraki. I riao n te bwai ae I karaoia ni bon nakoiu ao tokina I a manga roko naba n te onaoraki. I nooria bwa N na bae n reitinako ni kaikoakai ngkana I tiku iaon au mition. Imwiin te tatataro ae bati, I karekea te kaeka bwa I riai n okira mweengau n tararua au kaangaanga ni kaeti ma marurungin rabwatau.
Te Mwaneka ni Waaki Nako
Ngke I a nooria bwa I bon a tiku n te mweenga n taainako, I rang n nanokawaki. Ma I kataa au kona ni kateimatoa au onimaki ao kamatebwaian booki aika tabu. E nakoraoi tararuakina irouia au karo, ma tabeman aomata ake a mena irarikiiu a aki ataia bwa a na tera aroia nakon au waaki ae I mena iai inanona ngkai. A teimatoa n titirakinai, ao iai au kangaanga ni kaitara ma te namakin ae karawawata. Temanna te mwaane, e ngae n anne, e tarebooniai n akea kantaningakina ao n tuangai bwa natina te mwaane e moantaai n oki man ana mition n te tai ae a maan n nako. E tuangai bwa te kakatai aei e kona n uruana au onimaki ao kukureiu ao anne e riiriki nakoia tabeman mitinare ake a moantaai n oki. “Tera ae ko riai n uringnga,” e taku, “bwa man teimaanim ni kataa are am kabane ni konaa ni maiuakina te maiu ae raoiroi, bon te mwaneka ni waaki nako n aki tabe bwa terana ae e na riki itinanikun am tararua.”
Anne e a riki bwa reireiau, ao I katan iaona ibukin te ririki are imwiina. Inanon waniua te namwakaina I a kuri n aki kona n nakonako, ma aomata a teimatoa ni motika taekau ngke a ataia bwa I a moantaai n okira mweengau. A taku bwa iai aomata ake a kakaiaki riki aorakia ake a tia ni bane aia tai. A aki ota raoi bwa bukin tera I aki kona ni kabanea au tai, e ngae ngke I rinanon kaangaanga ma aki marurungin rabwatau. E kananokawaki ongoraean aei ngke I rang tangira au mition, ma iai au onimaki bwa iai ana kantaninga te Tama are i Karawa ibukin kataakiu aei are e na riki bwa te mwaneka ni waaki nako.
I a manga moana riki au reirei ao au iraorao. I nooria bwa I a rikirake, ma I nanobuaka teutana n taekan au mition. Ngkanne temanna raoraou e kauringai bwa ana Mwakuri ni Kamaiu te Tia Kamaiu e kona ni kamaoi maraki ao nanobuaka ni kabane. Ma Ana ibuobuoki I a kona ni kukurei ngkana I iangoa au mition.
I katorobubua n tataro nakon Tamau are i Karawa. I tuangnga marakiu ao au konabwai ni kamarurungaki ao ni karauaki nanou. I bubuti ngkana E kona ni kanakoa nanobuakau are I namakinna. Imwiin au tataro, te Uea e anganai te konaa n taraa au mition n aron taraakina Irouna. Au mwakuri n ibuobuoki ao moantaain okiu bon ngaiia mwakoron ana babaire te Uea ni buokai ni karikai nakon are E tangiria te Uea. I kona n noori kakai ake E a tia ni katauraoi man te tai are I okira iai mweengau. Bon te waaki ae kaangaanga, ma ngkai I kona n taraa moantaaiu n okira mweengau ma namakinan te rau, n ataia bwa te Atua e tabetabe nanona ni mweeraoin rabwatau.