I Namakina ae I Aki Tau
Te Ara E Tauaki, Stockholm, Sweden
Kamataata n te tamnei iroun Allen Garns
Ngke I weteaki bwa N na riki bwa te Beretitenti n te Bootaki n Aine, Bon te kairake n tina ngai ae i tatabetabe. I a tia n ikawairake inanon te Ekaretia ni maiuakina maiu are kaineti nakon ana reirei, ma I ataia ae I aki kororaoi ao I raraoma ibukin au konabwai ni buokiia tariu aika kakorakora inanon au uoote.
N te Tabati teuana inanon te ekaretia I namakina te bwarannano. Ni katoabong aine aika a kainnanoai a kawarai ni maroro ma ngai. Tabeman a kainnanoa te ibuobuoki ibukin maiuraoia, ao tabeman a tii kainnanoai bwa N na ongora irouia. Imwiina te Tamnei e wirikirikinai bwa N na aki nakon te boowi n toa ngkana e waaki, ao ni mimiu I kaitibo ma tariu ae aki bati ni kakaonimaki n te kawai n rinnako are e kainnanoa te karaunano ao te ibuobuoki ao e aki kona n tataninga banen te boowi.
Ngke e a bwara te tataro, I a bon rang kua! I tang n au kaa iaon kawaiu nakon mweengau. N au iango ao e kaoti te iango aei: “Taetae nakon te bitiobi!” I namakinna bwa te bitiobi e na iai te bwai ae e na tuangai are N na kona iai ni kabebeteaki n nakoau, ma I aki kan katabea imwiin katabeana ae abwabwaki n te ekaretia. I a tia ni baireia bwa N na aki tareboniia ngkana e tang te tareboon. Bon au bitiobi. E namakina te wirikiriki bwa e na tareboniiai.
I tuanga te bitiobi te korakai are I rinanona ngkai a bane bwaai aika a mwaiti n roko n teuana te tai ao nanokawakiu are I namakinna ngkai I aki kona ni buokiia. E kakauongo ma te taotaonakinnano. E rinanon naba tabeua titiraki ibukin te maiuraoi are e roko inanon te bong arei, ao I namakina te beebete.
Ngke e toki te maroro, I taku, “I taku bwa iai te bwai ae kona tuangai bwa N na kanga n aki namakina te rawawata ae e a riaon au kona.” E kaeka bwa e tangiria n iai te bwai ae e na taekinna ae aron arei, ma e bon aki.
E ngae ngke e aki kaekaaki au titiraki, I namakina te kukurei ngke I katuka te tareboon. I namakinna bwa e a tia ni kaekaai te Uea ni kainnanou ibukin te kairiiri ao te boutoka.
Inanon wiiki ake imwiina te namakin n bon arona naba, ao I tataro bwa N na ota n te bwai are I kainnanoia ni karaoia bwa N na riki bwa te beretitenti n te Bootaki n aine ae tamaroa riki. N te bong teuana, ngke I kakauongo nakon te maungatabu ni kabuta, tabeua taeka are e katika au iango, ao te Tamnei e taetae n nene inanou. I ota bwa I namakina te aki tau ibukina bwa I bon aki tau ibon irou.
Rinanon ana banna ni katoto, au bitiobi e a tia ni kaota nakoiu kakawakin te kakauongo nakon te Tamnei ae Raoiroi. Bon te Tamnei are bon te kiing nakon nakoara n te Ekaretia, tiaki oin ara tarena ke ara konabwai. N te moan tai n te tai ae rang maan, I namakina te rau ao te mweengaraoi.
I bon teimatoa n aki tau ao ngkai I a rang tabetabe ma au utu nakon riki are mai imwaina, ma I aki kakoaua bwa I riai ni karaoa nakoaua ma te kororaoi. Tamara are i Karawa e kona ni katauraoi bwaai nakoiu ake I kainnanoi ni karaoa Ana kantaninga ao ana kona ni kamwaiti riki au konabwai ngkana I teimatoa ni kawakin Ana tua.