Kae ʻOua Ke Tau Toe Fakataha Mai
Ko e hā pea Ko e hā Hono ʻUhinga pea ʻoku Fēfē hono Fai ha Fakamoʻoni
Mei he “Ko e Fakamoʻoni Fakatāutahá,” Ngaahi Akonaki ʻa e Kau Palesiteni ʻo e Siasí: Sipenisā W. Kimipolo, 2006, 88, 92–94.
Ko e taimi kotoa pē ʻokú ke fai ai hoʻo fakamoʻoní, ʻoku fakamālohia ia.
ʻE lava ke maʻu ʻe he tokotaha kotoa pē ʻi māmani ha fakahā, ʻa e fakahā tatau pē ko ia naʻe maʻu ʻe Pitá [vakai, Mātiu 16:13–17]. ʻE hoko ʻa e fakahā ko iá ko ha fakamoʻoni, ko hano ʻiloʻi ʻoku moʻui ʻa Kalaisi, ko Sīsū Kalaisi ʻa e Huhuʻi ʻo e māmaní. ʻE lava ke maʻu ʻe he tokotaha kotoa pē ʻa e ʻilo fakapapau ko ʻení, pea ko e taimi te ne maʻu ai ʻa e fakamoʻoni ko ʻení, ʻe maʻu ia mei he ʻOtuá kae ʻikai mei he akó ʻataʻatā pē. Ko e moʻoni ʻoku mahuʻinga ʻa e akó, ka kuo pau ke ō fakataha pē ʻa e akó mo ha lotu lahi mo e ngāue, pea ʻe hoko mai leva ʻa e fakahā ko ʻení. …
Ko e taha e ngaahi houalotu fakamoʻoni ʻo e ngaahi fakatahaʻanga lelei taha ʻi he uōtí ʻi he māhiná kotoa, ʻo kapau ʻokú ke maʻu ʻa e Laumālié. Kapau ʻokú ke ongoʻi taʻeoliʻia ʻi ha houalotu fakamoʻoni, ʻoku ʻi ai e meʻa ia ʻoku fehalaaki ʻiate koe, ka ʻoku ʻikai ko e kakai kehé. Te ke lava ʻo tuʻu pea fai hoʻo fakamoʻoní pea te ke pehē ko e fakatahaʻanga lelei taha ia ʻi he māhiná; ka ʻo kapau te ke tangutu pē ʻo lau e ngaahi fehalaaki fakakalamá mo kataʻi ʻa e tangata ʻoku ʻikai siʻi lava ʻo lea leleí, te ke taʻeoliʻia, pea ʻi he taʻeoliʻia ko iá te ke mole ai mei he puleʻangá. …
ʻOku fakataha ʻa e Kau Palesitenisī ʻUluakí mo e Toko Hongofulu Mā Uá fakataha mo e Kau Taki Māʻolungá kātoa ʻi he temipalé ʻi he māhina kotoa pē. ʻOku nau fai ʻenau fakamoʻoní mo fefakahāʻaki ʻenau feʻofaʻakí ʻo hangē pē ko kimoutolú kātoa. Ko e hā ʻoku fie maʻu ai ke fai ha houalotu fakamoʻoni ʻa e Kau Taki Māʻolungá? Ko e ʻuhinga tatau pē ʻoku fie maʻu ai e houalotu fakamoʻoní. ʻOku mou pehē te mou kei maʻu ʻa hono mahuʻinga kakato hoʻomou fakamoʻoní kapau te mou taʻe fakahoko ia ʻi ha māhina ʻe tolu, pe ono, pe hiva, pe hongofulu mā ua?
ʻOku manavasiʻi e niʻihi ia ʻo hotau kakai leleí naʻa kuo motuʻa e ngaahi lea ʻoku nau ngāue ʻakí ʻo nau feinga ai ke mavahe mei heʻenau ngaahi fakamoʻoní ʻo nau lea ʻaki ha ngaahi meʻa ʻoku ʻikai fekauʻaki ia mo e ongoongoleleí. ʻOua naʻa ʻi ai ha taimi te ke hohaʻa ai ʻi hoʻo ngāue ʻaki e ngaahi lea tatau pē ʻi hoʻo fakamoʻoní. ʻOku lea peheni ʻa e Palesiteni ʻo e Siasí ʻi he taimi ʻokú ne fai ai ʻene fakamoʻoní, “ʻOku ou ʻilo naʻe uiuiʻi ʻa Siosefa Sāmita ʻe he ʻOtuá, ko ha fakafofonga fakalangi. ʻOku ou ʻilo ko e Kalaisí ʻa Sīsū, ko e ʻAlo ʻo e ʻOtua moʻuí.” Vakai ki ai, ko e meʻa tatau pē ʻoku mou lea ʻakí kātoa. Ko e fakamoʻoní ia. …
ʻOku ʻikai ko ha akonaki e fakamoʻoní; ʻoku ʻikai ko ha malanga e fakamoʻoní (ʻoku ʻikai ko hoʻo ʻi aí ke ekinaki ki hono toé); ʻoku ʻikai ko haʻo fakamatala ki haʻo folau naʻe fai. Ko hoʻo ʻi aí ke fai hoʻo fakamoʻoní. ʻOku fakaofo ʻa e meʻa te mou lava ke lea ʻaki ʻi hoʻomou fakamoʻoní ʻi ha sekoni ʻe 60, pe 120, pe 240, pe ko e hā pē taimi kuo tuku atú, ʻo kapau te mou nofo taha pē ki he fakamoʻoní. ʻOku mau fie ʻilo ki he meʻa ʻoku mou ongoʻí. ʻOku mou ʻofa moʻoni nai he ngāué? ʻOkú ke fiefia nai ʻi hoʻo ngāué? ʻOkú ke ʻofa nai ʻi he ʻEikí? ʻOkú ke fiefia nai ʻi hoʻo hoko ko e mēmipa ʻo e Siasí?
… ʻOua te ke tangutu ʻi he houalotu ʻaukaí ʻo lohiakiʻi pē koe mo ke pehē, “Mahalo pē he ʻikai ke u fai ʻeku fakamoʻoní he ʻahó ni. Mahalo he ʻikai lelei ia ki he kāingalotu kehé he kuo lahi ʻaupito e ngaahi faingamālie ia kuó u maʻú.” Fai hoʻo fakamoʻoní. Pea ʻoku lōloa feʻunga pē ʻa e miniti ʻe tahá ke ke fakamoʻoni ai.
ʻOku ʻi ai hoʻo fakamoʻoni! Ko e moʻoni, ʻoku fie maʻu ke langaki mo hiki hake pea fakatupulaki ia; pea ko e meʻa ia ʻokú ke faí. Ko e taimi kotoa pē ʻokú ke fai ai hoʻo fakamoʻoní, ʻoku fakamālohia ia.