Fānau ʻOku Nau Tuʻu ʻAliʻaliaki
Tuʻu ʻi he Totonú
Mālō e Lelei, ko ʻEvani au! ʻOku ou nofo ʻi ʻAealani, pea ʻoku ou saiʻia ʻi he vaʻinga tā pulú. Ko ha sipoti faka-ʻAilisi ʻoku hangē ko e hokī. Ko e lēsoni ʻoku ou saiʻia taha aí ko e fiká. Ko ha tāpuaki moʻoku ʻeku hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Tuʻu ʻAliʻaliaki ʻi he ʻApiakó
Naʻe houtamaki ha tamasiʻi foʻou ki hoku tuofāfiné ʻi he ʻapiakó. Naʻá ku tuʻu ʻi honau vahaʻá ʻo maluʻi hoku tuofāfiné. ʻOku ou talangofua foki ki he Lea ʻo e Potó. ʻOku tokolahi e tamaiki ʻi he ʻapiakó ʻoku nau inu tī mo kofi. ʻI he taimi ʻoku ʻomai ai ʻe ha taha ha tī, ʻoku ou tala ange, “ʻIkai, mālō pē.”
Lotu mo e Ngaahi Kaungāmeʻá
ʻOku ou ako ʻi ha ʻapiako Katolika. Ko au pē mo hoku tuofāfiné ʻoku kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI he taimi naʻe puke ai ʻeku kui fefiné, ne u kole ki he faiakó pe te u lava ʻo fai ha lotu maʻana. Naʻe ʻapasia ʻa e tokotaha kotoa pē ʻi he kalasí pea punou honau ʻulú. Ne u lotu leʻolahi ʻi muʻa ʻi he kalasí.
Hoko ko ha Faʻifaʻitakiʻanga
ʻOku sio hoku ngaahi kaungāmeʻa ʻi he ʻapiakó ʻoku ou fiefia. ʻOku ou hoko ko ha faʻifaʻitakiʻanga lelei ʻi he ʻikai ke u kapekape pe tākuanoa e huafa ʻo e ʻEikí. ʻOku ou toe hoko ko ha faifaʻitakiʻanga ki hoku fāmilí.
Ko e Tuongaʻane Lahi Lelei Tahá
ʻOku ou taʻumuʻa ke kei fai pē meʻa ʻoku totonú. ʻOku ou tokoni ki heʻeku ongomātuʻá ke tokangaʻi hoku tuofāfiné. ʻI he taimi ʻoku ilifia ai hoku tuofāfiné, ʻoku ou vaʻinga mo kinautolu kae ʻoua leva kuo ngalo ʻenau ilifiá. ʻI he taimi ʻe taha naʻe mamaʻo ai ʻeku ongomātuʻá, naʻá ku fai ha ngaahi talanoa ki hoku tuofefiné kae ʻoua kuó ne mohe.