Stap Oraet Oltaem long saed blong Spirit: Stap Bildim Wan Sip we I No Save Draon
I Kam long Elda Del G. Renlan
Blong Kworom blong Olgeta Twelef Aposol
I kam long wan divosen blong Brigham Yang Yunivesiti, 16 Sept. 2014. Blong ful toktok long Inglis, go long speeches.byu.edu.
Yumi nidim blong no muvmuv long saed blong spirit blong save gotru long laef blong yumi long wol mo gobak sef long hom blong yumi long heven.
Ol smol pikja mo ol foto blong sip oli kam long © lublubachka/Thinkstock, MicheleBolero/Thinkstock, David Harding/Thinkstock
Long stat blong nambaseventin senturi, king blong Swiden, Gustav II Adolf, i givim oda blong oli bildim wan sip we bae oli singaotem Vasa. Sip ia, plante risos blong hem oli plante, speseli ok wud we bae oli bildim sip ia wetem. Gustav Adolf i lukluk long fasin we oli bildim sip ia, mo i traem meksua se Vasa, oli mas bildim we i kasem tingting blong hem.
Afta we ol wok oli stat, Gustav Adolf i givim oda blong oli mekem Vasa i longfala moa. From se oli bildim sapot blong sot saed blong hem wetem ol sas ok wud, king i givim daereksen se bae oli mekem longfala blong hem nomo i go longfala moa, be sot saed blong hem i stap semmak. Nomata we ol man blong bildim sip oli save se, sapos oli mekem olsem bae i mekem se Vasa i no save stap gud long solwota, oli bin fraet blong talemaot long king wan samting we king bae i no wantem harem. Oli mekem folem tingting blong king. Gustav Adolf tu i stanap tu long toktok blong hem se sip ia, bae i no gat wan simpol dek wetem ol masket, be bae i gat trifala dek wetem ol kanon, mo ol kanon we oli moa hevi bae oli stap long dek we i hae antap olgeta. Bakegen, ol man blong bildim sip oli mekem folem tingting blong king, nomata oli save se i no stret.
Long 10 Ogis 1628, Vasa i statem fas trip blong hem. Afta we Vasa i aot nomo long haba, wan strong win i fesem hem mo sip ia i stat blong lei. I no longtaem afta, “sip i tanem ova mo wota i go insaed long ol hol we ol kanon oli stap long hem, mo sloslo, i go daon long solwota, ol sel blong hem mo evri samting i draon.”1 Fas trip blong Vasa i 1280 mita.
Tingting blong Gustav Adolf blong wantem wan saen we i bigbigwan tumas i spolem gud plan blong wanem i sapos blong wan naesfala sip, sip blong wo we i strong moa long taem blong hem. Fasin blong ol man blong bildim sip blong no wantem toktok—from oli fraet se king bae i no glad—i mekem se king i no kasem save mo tingting blong olgeta. Evriwan we i stap oli lusum tingting long gol blong wok ia: blong protektem Swiden mo blong taltalemaot gud blong nesen ia long nara ples. Wan sip we i traem blong go agensem ol loa blong kriesen i wan bot we bae i no save flot.
Blong yumi save gat sakses blong sel tru long laef blong yumi long wol, yumi nidim blong no muvmuv long saed blong spirit blong save fesem ol win we oli kam krosem yumi, o ol taed we oli kam krosem yumi; yumi no mas muvmuv tumas blong save tanem long stret ples mo gobak sef long hom blong yumi long heven. I gat samfala samting we yumi save mekem blong kam antap blong no save muvmuv long saed blong spirit. Bae mi tokbaot fo poen.
Stap Obei long Ol Komanmen blong God
Faswan i blong stap obei long ol komanmen blong God. Semmak olsem we Vasa i bin fesem ol loa blong kriesen, yumi mas fesem ol loa long saed blong spirit. I no gat wan i save ronwe long hemia. Yumi nid blong obei long ol loa long saed blong spirit, we yumi tokbaot se oli ol komanmen blong God.
Blong wok wetem ol loa blong kriesen long taem we oli bin stap bildim sip, maet bae Gustav Adolf i filim se i stopem hem long sam samting, be Vasa bae i no draon bifo misin blong hem i stat sapos hem i bin folem ol loa ia. Be, bae i gat fridom mo moa janis blong mekem wanem we hem i sapos blong mekem.
Yumi tu, taem yumi obei long ol loa blong God, i mekem se yumi holemtaet fridom, moa janis, mo paoa blong kasem ful paoa blong yumi. Ol komanmen oli no stap blong stopem yumi. Be, fasin blong obei i lidim yumi blong no muvmuv tumas long saed blong spirit, mo kasem hapines we i stap longtaem.
Fasin blong obei i joes blong yumi. Jisas i givim daereksen ia: “Luk, mi bin givim long yufala ol komanmen; from hemia obei ol komanmen blong mi” (3 Nifae 15:10). Hem i simpol nomo olsem. Mekem desisen ia. Disaed naoia blong obei mo folem samting i stret we i stret. Bae i no gat wan samting bae i mekem se yu strong moa blong no muvmuv tumas. Bae i no gat wan samting we bae i givim moa fridom blong mekem misin blong yu long laef ia.
Mekem Folem Advaes mo Stap Kam Ol Man o Woman blong Lanem Samting long Ful Laef
Sekenwan, yumi nidim blong luklukgud mo mekem folem ol advaes we oli kam long ol ples we yumi trastem, mo komitim yumiwan blong stap kam ol man o woman we i save lanem samting blong ful laef blong yumi.
Wan long ol hol blong kasem save, i hae tingting we i kam wetem taem yumi ting se yumi save plante, mekem se i nomo gat samting blong lanem bakegen. Yumi evriwan i luk hemia long olgeta man o woman we oli ting se save blong olgeta i bigwan inaf finis. Hem i had tumas blong tijim wan we i talem se hem i save evri samting.
From se hem i tingting long saed ia, mo hem i wantem blong stap lanem samting ful laef blong hem, Presiden Henri B. Aering, Fas Kaonsela long Fas Presidensi i talem: “Mi wan pikinini yet, mo mi gat fulap samting blong lanem. Plante man i save tijim wan samting long mi.”2 Taem hem i givim koling long mi blong kam wan Jeneral Atoriti, Presiden Aering i tijim mi wan impoten lesen. Hem i talem se taem hem i harem wan i talem wan stori we hem i bin harem bifo finis, o i yusum wan skripja we hem i save gud, hem i askem hemwan: “?From wanem Lod i poenemaot hemia bakegen long mi?” mo “?Wanem moa nao i stap blong mi lanem yet long stori ia o skripja ia?” Sapos yumi wantem se yumi kam antap blong no muvmuv tumas long saed blong spirit, bae yumi wantem blong lanem samting mo bae yumi gat inaf tingting i stap daon blong akseptem blong wan narawan i lidim yumi, nomata hamas yia yumi gat mo nomata wanem eksperiens yumi gat.
Hem i rili joes blong yumi. Yumi save lisin long advaes, mo mekem folem advaes we ol lida blong Jos oli givim long yumi, speseli olgeta lida we yumi sastenem olsem ol profet, ol sia, mo ol reveleta; yumi save mekem folem ol advaes we yumi kasem long papa mo mama, mo long ol fren we yumi trastem,—o no mekem. Yumi save luklukgud blong stap olsem ol man o woman we i lanem samting long ful laef—o no mekem. Yumi save kam antap blong no muvmuv long saed blong spirit—o no mekem. Sapos yumi mestem mo no kam antap long fasin blong no muvmuv tumas, bae yumi kam olsem Vasa—wan bot we i no flot.
Givim Seves long Ol Nara Man
Nambatri, blong lidim ol tingting blong yumi long ol nara man, blong kea long ol nara man, mo blong givim seves long ol nara man, i mekem se yumi kam antap long fasin blong no muvmuv tumas long saed blong spirit.
Taem we i no save finis i stap klia long fored taem yumi lukluk nomo long ol nara man taem yumi traem blong helpem ol pikinini blong Papa long Heven. Mi faenem se i isi moa blong kasem insperesen taem mi stap prea blong faenemaot olsem wanem mi save helpem ol nara man bitim we taem mi stap prea blong miwan nomo.
Yumi save biliv se long samtaem long fiuja bae yumi stap long wan moa gud ples blong save help. Long ril laef, taem hem i naoia. Yumi mekem mistek sapos yumi ting se bae i moa gud blong help taem bae yumi gat moa taem, moa mane, o moa long eni samting blong save givim seves long ol nara man. Nomata wanem situesen blong yumi, yumi gat wan joes. ?Bae yumi helpem ol nara man o nogat? Yumi no pasem wan bigfala tes blong laef long wol ia sapos yumi jusum blong helpem olgeta we oli stap long nid. Mo, sapos yumi help, yumi kam antap long fasin blong no muvmuv tumas long saed blong spirit.
Mekem Jisas Kraes I Fandesen blong Yumi
Ol smol pikja mo ol foto blong sip oli kam long © lublubachka/Thinkstock, MicheleBolero/Thinkstock, David Harding/Thinkstock
Nambafo, laswan, mo i moa impoten, fasin blong yumi blong no stap muvmuv tumas long saed blong spirit i kam antap folem hamas yumi putum Jisas Kraes i stap olsem fandesen blong yumi.
Sapos i no gat Kraes, bae yumi stap olsem wan sip ia, we wef i saksakem olbaot. Bae yumi no gat paoa from se sel blong yumi i no gat. Bae yumi stap muvmuv tumas, speseli long taem blong strong win, from se yumi no gat angka. Yumi no gat ples blong go long hem o stamba tingting from se yumi no gat wan samting blong stiarem yumi wetem. Yumi mas mekem Kraes i fandesen blong yumi.
Blong save fesem, winim, mo rere from ol win we oli kam krosem yumi, from ol taed we oli kam krosem yumi long laef, yumi mas obei long ol komanmen blong God, yumi mas gat tingting i stap daon, yumi mas wantem mekem samting, mo yumi mas gat strong tingting blong lanem samting long ful laef, mo putum Jisas Kraes i fandesen blong laef blong yumi. Sapos yumi mekem olsem, bae yumi kam antap long fasin blong no muvmuv tumas long saed blong spirit. Bae yumi no olsem Vasa. Bae yumi save gobak long wan sef haba, we yumi kasem ples we yumi wantem go long hem.