Iven Sapos Yu Stap Fraetfraet

Elda Jose A. Teksira

Blong Olgeta Seventi

Elda Jose A. Teksira

Trastem Lod, mo bae Hem i blesem yu long ol hadwok blong yu blong serem gospel.

shy missionary

Taem mi wan niu misin presiden long Brasil, mi bin stap intaviu long sam elda. Mi bin askem wan blong tokbaot hem long mi.

“Mi mi stap fraetfraet,” hem i talem. Hem i stap wari se fraetfraet blong hem i stap blokem hem blong givim seves.

Mi askem: “?Yu ting se Lod i save helpem yu blong stap wan gudfala misinari nomata long hemia?”

“Mi biliv se Lod i save mekem eni samting.”

“Be olsem, letem Hem i helpem yu. ?Yu ting se yu save mekem hemia?”

“Mi ting se,” hem i talem.

Mi mas konfes se taem hem i wokbaot i go, mi tingting long miwan: “Mi hop se bae i wok.”

Sam wik i pas mo i no longtaem afta ol sem misinari oli kam bakegen blong gat intaviu. Long taem ia kompanion blong fraetfraet elda ia i talem: “Presiden, mi no save se yu talem wanem long hem, be hem i wok. Hem i kam gud blong toktok long ol man.” Mekem se mi stap glad finis se bae mi mitim hem bakegen.

Taem hem i kam long ofis blong mi, hem i stap lukluk leg blong hem.

“Mi gat sam gudfala nius,” hem i talem. “Mi stap fraetfraet yet, be mi askem Lod blong helpem mi. Afta mi openem maot blong mi mo stat blong toktok. ?Mo yu save wanem? Mi mekem evri taem naoia. Mi no save tingbaot wanem mi stap talem. Wanem we i gud tumas, i we ol pipol oli laekem. Oli filim Spirit. Oli storian long mi mo oli storian long wanem mi bin talem long olgeta.”

Mi bin sapraes blong luk olsem wanem misinari ia i jenis bigwan taem hem i bin putum tras blong hem long Lod. Hem i kam wan gudfala tul blong mekem plante pipol oli kam hapi.

Stap Winim Fraet

Taem yumi serem gospel, samtaem yumi fraet smol. Be semmak olsem misinari ia i soem, Lod bae i lidim yumi sapos yumi trastem Hem. Tabu Spirit bae i helpem yumi save wanem blong talem (luk long 2 Nifae 32:2–3), mo taem ol pipol oli filim Spirit, plante taem oli mekem folem. Plante oli tingting plante long wanem yumi stap biliv long hem mo oli wantem save moa.

Bigfala Glad

Mi gat wan testemoni se Papa long Heven bae i lidim yumi long ol hadwok blong yumi blong serem gospel, mo long rod ia, bae yumi filim wan bigfala glad. Wanem we i tru, i we, glad ia bae i no stap nomo wetem yumi naoia, be tu, long wol we i stap kam. (Luk long D&C 18:16.) Hemia i wan gudfala risen blong kamaot long gudfala ples blong yu, mo mekem wan samting, iven sapos yu fraetfraet.

Trifala Kaen Fraet we Yu Save Winim

I gat fasin blong stap fraetfraet, mo i gat trifala narafala fraet we mi save long olgeta se i mekem se sam long yumi i stap talem: “Mi fraet se sapos mi tokbaot gospel, bae mi lusum ol fren blong mi.” Tangkyu tumas we, wetem fet, yumi save winim olgeta fraet ia.

1. Mi no save inaf.

   Sapos yu no gat inaf save long gospel, ol fultaem misinari oli save helpem yu. Oli save tijim yumi abaot mesej blong Kambak blong Gospel, helpem yumi blong mekem fet blong yumi long Lod Jisas Kraes i kam strong moa, helpem yumi blong andastanem wanem i fasin blong sakem sin mo olsem wanem blong praktisim long laef blong yumi, mo from wanem baptaes mo presen we i Tabu Spirit oli impoten. Wan nara bigfala ples blong kasem save, hem i insaed long buk ia, Prijim Gospel blong Mi. Bae mi leftemap tingting blong evri yang man mo yang woman blong gat wan kopi mo mekem i kam pat blong evri dei stadi wetem ol skripja.

2. Mi neva mekem hemia bifo.

   Sapos yu no gat inaf eksperiens, !praktisim hemia wetem ol misinari! Oli save helpem yu blong save wanem blong talem, o wanem blong no talem long samfala situesen. Taem yu stap spendem taem wetem ol misinari, bae yu filim lav we oli gat long gospel mo ol fren blong olgeta. Oli gat paoa long tingting blong serem gospel; oli save helpem yu blong mekem sem samting.

3. Mi fraet blong serem gospel.

   Taem yumi serem testemoni blong yumi, yumi stap helpem ol fren blong yumi blong oli luk ol samting we oli hae moa, mo oli stat blong respektem yumi mo lavem yumi long wan defren wei. Hemia i hapen plante taem. Plante yang pipol oli talem: “Mi bin fraet, be mi toktok long fasin blong stap ones, fren blong mi i stat blong trastem mi mo askem moa kwestin.” Yumi no sapos blong fraet blong serem wan samting we yumi gat. Hem i sas tumas from se hem i kam long God. Mo, ?wanem nao wan nara wei we i gud moa blong soem lav long ol fren blong yumi? Hem i blong serem wetem olgeta wanem we yumi save se i tru.