Testemoni blong Itan
Man we i raet i stap long Yuta, YSA.
I luk olsem se evriwan i gat wan testemoni, be Itan i no gat.
“Lisin, lisin. Bae Tabu Spirit i toktok kwaet long yu. Lisin, lisin long kwaet smol voes (Children’s Songbook, 106).
Itan i sidaon long taem blong sering taem mo lukluk i go long bes fren blong hem Sam i stap serem testemoni blong hem. Fren blong hem, Sara, i stap sidaon antap long stan, i stap wet long taem blong hem. Sam i tokbaot wan seves projek we hem i bin mekem. Hem i gat wan testemoni long saed blong givim seves. Sara i talem testemoni blong hem long saed blong ol famli. Tija blong Itan tu i bin serem testemoni blong hem. Hem i tokbaot tempol wok. Evriwan long olgeta oli testifae se Jos i tru. I luk olsem se evriwan i gat wan testemoni, be Itan i no gat.
“?Mi gat wan testemoni long saed blong wanem?” Itan i askem hemwan.
Hem i tingtingbak long sam yia i pas, taem hem mo ol fren blong hem oli bin baptaes. Praemeri tija blong hem, Sista Kolda, i bin givim wan toktok long saed blong Tabu Spirit.
“Tabu Spirit i save givim yu wan filing we i bon insaed long hat blong yu. Hem i save helpem yu blong save wanem we i tru,” tija i talem. “Mo hemia nao wei we yu kasem wan testemoni long saed blong wanem yu stap biliv long hem.”
Itan i traem blong mekem wanem we i raet blong hem i save filim Tabu Spirit. Hem i ridim ol skripja mo prea. Be hem i neva gat filing ia we i mekem hat i bon olsem ol pipol oli tokbaot. ?Hemia i minim se hem i no gat wan testemoni?
Kwestin ia i stap nomo long hed blong Itan ful nekis dei. Hem i stap tingbaot hemia yet taem we hem mo Sam, tufala i stap ron long sketbod afta long skul. Hem i stap askem hemwan long olsem wanem hem i save askem Sam long saed blong samting ia.
Nao Itan i talem: “!Hey Sam! Yu yu bin fraet taem yu bin talem testemoni blong yu yestedei?”
Sam i jiamaot long sketbod blong hem mo wokbaot long gras. Hem i sidaon nao i talem: “No, no tumas.” “Mi bin serem testemoni blong mi long famli naet bifo.”
Itan i joenem hem mo i putum sketbod blong hem long leg blong hem. “?Be olsem wanem nao yu save se yu gat wan testemoni?”
“Mi bin prea mo mi bin filim gud long hemia.”
Itan i agri wetem hed blong hem mo i holem wan wil long han blong hem. Hem tu i wantem filim olsem.
Long naet ia, taem haos i tudak mo i kwaet, Itan i nildaon long saed blong bed blong hem blong prea.
Hem i talem: “Papa long Heven, plis helpem mi blong gat wan testemoni. Helpem mi blong save se Jos i tru. Se Josef Smit i wan profet. Mo se Buk blong Momon i tru.”
Long medel blong prea blong hem, Itan i stop. Hem i tingting smol taem. Afta i askem hemwan: “Hey, be ?mi save wan samting finis o no yet?”
Mo afta, wan filing we i kwaet, i gat pis i kam long hem. I no wan strong filing we i bonem hat blong hem. Be Itan i bin save se, hemia nao i Tabu Spirit.
Wan tingting i kam long maen blong Itan: “Mi save se mi save.” Taem tingting ia i kam long hem, hem i bin luksave se hem i bin filim filing blong pis ia bifo.
Eni taem we hem i stap ridim Buk blong Momon, hem i bin filim se i gud mo i stret. Nao, hem i bin save se filing ia i Tabu Spirit we i stap testifae long hem. Taem hem i go long Jos, mo hem i filim se i gud mo i stret blong stap long jos, hemia tu i bin Tabu Spirit we i toktok long hem. !Hem i bin kasem wan testemoni finis!
Hem i no bin save evri samting naoia. Be hem i bin save se Tabu Spirit i tru mo i save helpem hem blong gohed blong bildimap testemoni blong hem.
Itan i stat blong prea bakegen. Be long tetaem ia, hem i blong talem tangkyu.