Ol Kwestin mo Ansa
“Oli stap jikim mi long skul from mi mi wan LDS. Mi save se mi nidim blong stanap from bilif blong mi, !be hem i had tumas! ?Olsem wanem nao mi save gat strong tingting?”
Yu talem stret ia se i nidim fasin blong gat strong paoa long tingting blong fesem situesen ia. I tru we Jisas Kraes i givim komanmen long yumi blong girap mo saenaot, blong laet blong yumi i kam wan flag long evri nesen (luk long D&C 115:5). Be blong gat strong paoa long tingting blong saenemaot laet blong yumi i save, o i no save minim blong tokbak long olgeta we oli stap jikim yu.
Long tufala kes ia, yu save letem wanem i kam agensem yu blong i givim insperesen long yu blong kam gud moa. Taem yu wokhad blong mekem testemoni blong yu i kam strong moa, yu save developem kaen kwaet paoa long tingting ia we bae i helpem yu blong tokbak, o blong gohed nomo blong mekem wanem we i raet iven sapos ol narawan oli stap jik.
Taem man i jikim yu, i save mekem yu kros, be tingbaot se yu save prea blong jareti i fulumap yu blong mekem se ol narawan oli save filim lav blong Kraes tru long yu (luk long Moronae 7:48). From se evri situesen i defren, lukaotem Spirit blong i lidim yu blong save olsem wanem blong ansa wetem fasin olsem hemia blong Kraes long evri situesen.
Dipen long situesen, maet i moa gud blong toktok long praevet wetem olgeta we oli jes jikim yu, o jes no wantem save long ol nogud toktok mo gohed blong laef folem ol bilif blong yu. Sapos ol narawan oli no intres blong lisin long wanem yu gat blong talem, eksampol blong yu blong stap kaen, stap fogiv, mo stap tru, bae i mesej we i moa gud we yu save sendem.
Soem Tru Paoa long Tingting
Olgeta we oli stap jikim yu, bae oli no save stop from se yu gat strong tingting blong askem olgeta blong stop, be oli save stop taem yu soem strong paoa long tingting blong yu blong laef folem huia yu—wan Lata-dei Sent. Bifo yu save, bae i saenaot long yu se Papa long Heven i agri wetem yu, mo wetem hop, bae i openem ae blong olgeta long gospel ia we i kambak we i stap long laef blong yu.
Braet U., 17 yia, Imo Stet, Naejeria
Faenem Paoa long Ol Stamba Prinsipol
Fasin blong prea mo livim kakae oli impoten from se oli helpem yu blong save fesem ol jik mo ol jalenj long skul, semmak olsem Jisas Kraes i fesem fulap jik taem Hem i bin stap long ples ia, long wol. Bae oli helpem yu blong developem moa lav mo moa fasin blong save wet longtaem wetem ol pipol.
Wolta K. 15 yia, Jayen, Peru
Lod I Lid tru long Prea
Blong wan longfala taem mi mi wan memba nomo insaed long skul blong mi. Olgeta fren blong mi we oli kolosap long mi oli andastanem mi, be ol nara fren long skul oli stap jikim mi. Wan dei, mi bin prea mo filim nid blong toktok wetem wan long olgeta we i pusum ol narawan blong jikim mi. Mi bin eksplenem se mi no kros long hem, be mi askem hem blong hem i respektem mi semmak olsem hem i wantem mi respektem hem. Afta we hem i harem storian blong mitufala, wan long ol tija blong mi i stap difendem mi oltaem taem hem i luk se bae wan samting bae i hapen. Mi save se Lod God bae i stap wetem yu taem yu stap toktok wetem ol pipol ia.
Sanela, 14 yia, Panganisan, Filipin
Bildimap Testemoni blong Yu.
Faswan, kasem wan tru testemoni abaot ol trutok we yu wantem serem wetem ol narawan. Afta, gat lav long ol pipol we oli stap jikim yu mo no traem blong raorao, from se God i no sapotem ol raorao (luk long 3 Nifae 11:29). Wanem i moa impoten i we yu traehad blong gat Spirit i stap wetem yu oltaem. Spirit bae i helpem yu blong gat moa lav mo moa paoa long tingting, mo bae Hem i mekem se toktok blong yu i gat paoa.
Julia F. 19 yia, Hesi, Jemani
Lavem Enemi blong Yu
Mi bin fesem semmak situesen. Sapos yu gat fet mo putum tingting blong yu i stap daon, bae Lod i blesem yu wetem paoa mo fet we yu nidim blong lavem ol enemi blong yu mo blesem olgeta we oli stap sakem nogud tok agensem yu. mo bae yu save prea from olgeta. (luk long Matiu 5:44). Bae mi leftemap tingting blong yu blong luklukgud insaed long ol skripja blong kasem ansa long wei blong stap strong. Prea taem yu filim se yu stap yuwan wetem bilif blong yu. Rom 8:31 i talem se: “?Taem yumi stap tingbaot ol samting ya, bambae yumi talem olsem wanem? God i stap wetem yumi, mo i no gat man nating we i strong moa we bambae i save agens long yumi.” !Yu gat God we i stap long saed blong yu! Eni samting i posibol.
Regan T. 15 yia, Yuta, YSA
Yu No Fraet
Tokbaot relijin blong yu plante moa, o minim blong mekem samting blong tokbaot relijin blong yu. Mi bin fesem sem situesen mo mi bin raetem: “Mi Lavem blong Stap Wan LDS” long skulbag blong mi. Taem mi mekem olsem, mi bin openem doa long plante janis blong mekem misinari wok mo soem ol pipol se mi no fraet blong letem olgeta oli save se mi mi wan LDS. Wanem samting yu mekem, no letem narawan i mekem yu. Prea from olgeta mo prea from yuwan. I no longtaem bae yu luk se sapos yu lukluk nomo blong sevem sol blong ol narawan, bae yu no save fraet blong letem olgeta oli save trutok abaot gospel blong Papa blong yumi.
Savana P. 14 yia, Teksas, YSA