Pis Insaed long Hat blong Mi
I kam long Karol F. MakKonki
Fas Kaonsela long Yang Woman Jeneral Presidensi
Taem mi gat eit yia, mi bin luk profet, Presiden Deved O. MaKei (1873–1970). Hem i bin kam blong dediketem wan niu bilding blong Jos long Palmaera, Niu Yok, YSA. Famli blong mi i go long dedikesen. Plante pipol oli bin kam tu. !Mifala evriwan i glad tumas blong luk profet!
Mi bin smol mekem se i had blong mi lukluk raon mo luk evri pipol. Be mi bin save filim lav blong Presiden MaKei. Blong wan minit nomo, mi luk waet hea blong hem, mo fes blong hem we i kaen. Mi tingting: “Wan profet blong God i luk olsem nao.” Mi bin ridim abaot ol profet insaed long ol skripja, be hemia i bin fas taem blong mi blong luk wan profet o eni nara Jeneral Atoriti. Mi bin luksave se ol profet oli ol ril pipol. !Mo oli lavem yumi! Bae oltaem mi tingbaot lav mo pis we mi bin filim long dei ia.
Taem mi bin gat 11 yia, mi bin gat wan nara eksperiens we i bin helpem mi filim pis long hat blong mi. Stek konfrens i stap kam kolosap, mo bae mi singsing long stek kwaea. !Mi glad tumas! Mi bin werem wan naes waet sot mo mi filim spesel tumas. Singsing we bae mifala i singsing long hem i kamaot long Jon 14:27, “Mi putum pis blong mi i stap wetem yufala. Mi nomo mi givim pis ya long yufala. Mo pis ya we mi mi givim i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.”
Ol toktok ia oli tajem hat blong mi, mo mi bin tingbaot olgeta stat long tetaem ia. Taem mi bin singsing long ol toktok ia, mi save se oli tru. Mi filim se Tabu Spirit i talem long mi se blong folem Jisas Kraes, i helpem yumi blong filim pis. Stat long taem ia, wanem jalenj we mi gat, skripja ia i kam long maen blong mi mo i givim pis long mi. Trutok we mi bin lanem taem mi yangfala i bin blesem mi ful laef blong mi.