Ol Gospel Stori blong Evri Dei Laef
Prishud: Wan Angka we I Tru
I Kam long Elda L. Tom Peri (1922–2015)
Blong Kworom blong Olgeta Twelef Aposol
Toktok ia, Elda L. Tom Peri i bin rere long hem long 28 Mei 2015, tu dei bifo hem i ded, blong serem wetem ol yangfala prishud holda.
Paoa we i bigwan moa bitim evri paoa long laef blong mi, i prishud blong God. Mi biliv se bae i wan tru angka long yufala, ol yang man. Be blong hem i gat paoa long laef blong yufala, yufala i nidim blong andastanem prishud ia mo yusum.
Ol Fas Eksperiens wetem Prishud
Mi bin groap long wan gudfala ples long Logan, Yuta. Taem mi smol boe, mi no gat wari, o no sot long saed blong kaekae, selta o edukesen. Mo maet from se laef i bin isi, mi bin nidim wan samting blong hang long hem blong i stap olsem wan angka long mi.
Long mi, angka ia i bin prishud blong God. Mi bin stap long wan defren kaen situesen taem mi bin stap groap. Oli bin singaotem papa blong mi i kam bisop taem mi gat wan yia nomo, mo hem i bin stap olsem bisop blong 19 yia. Help blong hem long saed blong spirit olsem wan papa i bin helpem mi bigwan.
Mi ting se mi bin luk fored blong kasem Aronik Prishud long namba 12 betdei blong mi. Mi tingbaot spesel dei ia taem mi filim han blong papa blong mi antap long hed blong mi taem hem i odenem mi. Afta long hemia, mi muv i go tru long ol ofis blong Aronik Prishud mo mi kasem ol koling we mi bin laekem tumas.
Blong pasem sakramen, i wan samting we i spesel tumas long mi. Yu save luk ol pipol oli putum strong tingting blong obei long Lod, mo obei ol komanmen blong hem taem oli tekem ol saen blong bodi mo blad blong Hem.
Stap Groap long Prishud mo Andastanem Samting
Taem we taem i stap go, mi winim sekendri skul blong mi, mo afta wan yia long yunivesiti, mi kasem koling blong go long misin. Mi laekem evri minit blong misin ia mo mi laekem ol kompanion blong mi. Wan long ol kompanion ia i bin wan paoa long mi. Mi lanem fulap samting long hem taem mitufala i stap mekem responsabiliti blong mitufala.
From se kantri i bin stap long wo, taem mi gobak hom afta long misin, mi joenem Marin Kop blong Yunaeted Stet. Taem we wo i finis, mi gobak long yunivesiti, mi mared, mo mi statem wan famli. Ol sakses blong mi long wok oli tekem mi i go long plante ples raon long Yunaeted Stet. Mi lanem plante samting long ol ples ia, taem mi givim seves long plante koling blong prishud. Nao mi kasem Boston, Masajuset, we mi bin stap olsem wan stek presiden. Taem mi bin stap long ples ia nao, oli bin singaotem mi i kam wan asisten blong Olgeta Twelef, mo afta, afta 17 manis, oli singaotem mi long Kworom blong Olgeta Twelef Aposol.
Ol Lesen we Mi Lanem Olsem Wan Aposol
?Wanem nao mi bin lanem olsem wan memba blong Kworom blong Olgeta Twelef Aposol?
Mi bin lanem we i gat wan gaed, wan angka, mo wan proteksen long prishud.
Prishud i bin stap bifo kam kasem tedei. Bifo Adam i kam long wol, hem i bin gat prishud. Taem ol pikinini blong Adam oli go olbaot wetem prishud, i bin gat nid blong oganaesem olsem wanem nao bae oli pasem prishud. Lod i bin mekem hemia taem hem i bin singaotem Ebraham blong prisaed ova long famli blong hem we i gat ol man we oli kasem prishud. Oganaesesen ia i bin gohed anda long Aesak mo Jekob, we nem blong hem i bin jenis i kam Isrel afta.
Plante handred yia afta, ol pikinini blong Isrel oli stap olsem prisena. Lod i bin sendem Moses blong mekem oli kam fri, be taem hem i bin mekem olsem, oli soem se oli no rere, olsem wan pipol, blong kasem Melkesedek Prishud. Mekem se oli stap nomo, oli gat Aronik Prishud kasem taem we Sevya i bin kam.
Mi luk se i gud blong luk wanem Sevya i bin mekem fastaem taem Hem i statem seves blong Hem long wol ia. Hem i oganaesem Melkesedek Prishud. Hem i singaotem twelef Aposol mo i tijim olgeta ol loa mo oda blong prishud. Hem i singaotem Pita blong i kam jif Aposol, mo long wei ia i setemap laen blong atoriti insaed long Jos blong Hem. Long dei ia mo tedei, Jisas Kraes nao i jusum jif Aposol blong Hem blong i prisaed ova long Jos, mo Sevya nao i lidim hem long ol prishud diuti blong hem.
So, prishud i gat wan daerek laen we i kamaot long Lod mo Sevya i go tru long jif Aposol mo ol nara Aposol, mo long ol nara man we oli kasem prishud insaed long Jos. Oli givim ol ki blong atoriti i go long Ol Aposol, mo folem hamas we ol ki ia oli stap long wol ia, bae Lod Hemwan i stap lidim yumi. Daereksen blong heven i protektem yumi mo i talemaot gud long yumi se Jos bae i no save aot long trutok. Bae i folem gud nomo from se i no ol man blong wol ia we i stap lidim Jos ia. Lod nao i lidim.
Lanem Ol Doktrin blong Prishud
Advaes we i moa bigwan long ol narawan we mi save givim long yufala, ol yang man, i blong yufala i stadi long ol doktrin blong prishud, blong yufala i andastanem paoa we yufala i gat blong yusum prishud blong yufala, mo lanem olsem wanem prishud ia i save blesem laef blong yufala, mo tu, laef blong ol narafala man.
Mi promesem yufala se sapos yufala i lanem ol doktrin blong prishud mo mekem ol prishud diuti blong yufala, prishud bae i stap olsem wan tru angka we bae i holemtaet yufala i stap sef mo bae i tekem bigfala glad i kam long yufala. Stap wan prishud kworom we i tru. Go aot long ol fren blong yufala mo tekem olgeta i kam long kworom blong yufala. Krietem wan fasin blong stap olsem brata insaed long kworom blong yufala, wan fasin we bae i stap olsem wan fandesen we i stap oltaem long laef blong yufala.