Ol Buk blong Momon Stori
Alma I Baptaesem Plante Pipol
I kamaot long Mosaea 16–18.
Abinadae i wan profet. Hem i tijim ol pipol blong oli biliv long Jisas mo blong oli stop blong mekem ol nogud samting. Wan nogud king, King Noa i kros long Abinadae. Noa i no bin wantem blong sakem sin.
Wan man, we nem blong hem Alma, i bin biliv long Abinadae. Hem i ronwe mo i haed long king ia we i kros. Hem i filim sore se hem i mekem ol rong samting, mo hem i sakem sin, semmak olsem we Abinadae i bin tijim.
Plante pipol oli kam harem Alma i tij abaot Jisas Kraes. Alma i tij se sapos oli sakem sin mo folem Jisas, bae oli save baptaes.
Ol pipol oli klap wetem glad. Oli promesem blong mekem ol narawan oli harem gud. Oli promesem blong lavem God mo talem long ol nara pipol abaot Hem. Oli bin rere blong kasem baptaes.
Wan afta wan, Alma i bin baptaesem ol pipol ia. Oli bin hapi tumas se oli pat blong Jos blong Jisas.
Taem yumi baptaes, yumi mekem ol semfala promes we ol pipol blong Alma oli bin mekem. Mo yumi tu i kam pat blong Jos blong Jisas.