Ol Senia Kapol: Oli Nidim, Oli Blesem, mo Oli Lavem Olgeta
Ol kapol oli faenem se blong givim seves long wan misin, i no hevi, i no sas, mo oli glad moa long hem bitim we oli bin ting long hem.
“?Yu save kam mo help?”
Hem i wan kwestin we Jeral mo Lona Malmros blong Wasington, YSA, tufala i bin ansa long hem bifo. Oli bin talem yes taem we foma bisop blong olgeta, we i bin wan misin presiden, i bin askem tufala sapos yufala i save givim seves wetem hem long Wes Indi. Tufala i talem yes bakegen taem we stek presiden blong tufala i bin singaotem tufala blong mekem wan seves misin long hedkwota blong Jos long Sol Lek Siti, Yuta, YSA, mo wok wetem kompiuta mo ol wokman longwe.
Taem foma bisop mo misin presiden, Rid Robison, oli singaotem hem olsem wan presiden blong misinari trening senta long Akra, Gana, hem i askem tufala Malmros blong help bakegen.
“Mitufala i save se mitufala i save trastem Lod,” Elda Malmros i talem. “Mekem se mitufala i disaed blong trastem Hem bakegen.” Tufala i talem yes, komplitim ol rekomendesen fom, kasem koling blong tufala, mo i no longtaem afta, tufala i bin stap long Gana.
Stap Givim Seves Olsem Wan Kapol
Ol eksperiens blong tufala Malmros i soemaot samfala prinsipol abaot ol senia kapol we oli stap givim seves long misin we plante i no andastanem gud:
-
I gat tufala kaen misin. (1) Presiden blong Jos i singaotem ol senia kapol blong givim seves taem oli stap nomo long hom blong olgeta bakegen, o longwe long hom. (2) Wan stek presiden i singaotem ol Jos Seves Misinari kapol blong fulumap ol lokol o rijin nid long haftaem blong ogleta, stat long 8 kasem 32 aoa long wan wik. Tufala i stap nomo mo givim seves nomo long homples blong olgeta, be samtaem, oli save givim seves longwe long hom.
-
Oli leftemap tingting blong ol misin presiden blong faenem ol kapol we oli save mitim ol nid long misin blong olgeta, mo ol kapol oli save talem wanem oli laekem blong mekem. “Mifala i no save talem se ol kapol oli save jusum stret wok we oli wantem wok long hem long misin,” Elda Jefri R. Holan blong Kworom blong Olgeta Twelef Aposol i eksplenem. “Wan koling i wan koling. … Be mifala i storian wetem ol senia kapol blong mifala long saed blong ol wok we oli laekem blong mekem, mo oli lukluk long saed blong evri samting blong letem olgeta oli givim seves long weaples, mo long wei we oli wantem givim seves.”1
-
Ol misin presiden oli kaonsel wetem ol kapol long bes wei blong yusum skil blong olgeta mo wanem oli save mekem. “Blong gat eksperiens we i gat moa mining olsem wan senia kapol,” Presiden Robison i talem, “yu nid blong gat janis blong wok long ol eria we yu laekem tumas long hat blong yu, mo long ol ples we yu gat wan level blong skil we i mekem se yu filim se yu gat wan samting blong givim.”
Eksampol, Presiden Robison i bin save se Elda Malmros i toktok Franis, mo hemia i help from se plante man Afrika oli toktok Franis. “Mi gat visen long hem we i stap wok blong stretem ol travel mo wok long ol visa,” Presiden Robison i talem. “Be taem hem i kam, mi filim se hemia i no stret intres blong hem. Mekem se mi invaetem hem blong yusum skil blong hem long saed blong kompiuta. Hem i sevem plante aoa mo aoa. Elda Malmros i stap helpem tu ol misinari, speseli olgeta we oli toktok Franis, i mekem rere ol nem mo mekem ol tempol wok blong ol famli blong olgeta. Sista Malmros, wan helt asisten we i gat pepa blong hem, oli putum hem blong wok wetem misin dokta mo nes.
Hem I Mekem Rod I Rere
Semmak olsem ol Malmros, ol nara kapol oli faenem se taem oli trastem Lod, Hem i mekem rod i rere. Hemia nao i hapen long Alvin mo Korazon Rita blong Kawit, Kavite, long Filipin.
“Tu yia bifo mitufala i disaed blong givim seves, mitufala i stat blong putum tugeta ol strong plan blong famli bisnis blong mitufala,” Elda Rita i eksplenem. “Boe mo gel blong mitufala i graduet finis long yunivesiti, mo tufala i save mekem wok ia, be mitufala i stap tingting se hu nao bae i stretem ol bisnis problem, mo olsem wanem nao ol kastoma blong mitufala bae oli akseptem plan blong mitufala.”
Sista Rita i wari tu se bae hem i livim olfala mama blong hem i stap. “Mi fraet we bae mifala i lusum hem taem bae mifala i stap longwe,” hem i talem. “Mi filim tu se mi no naf long jalenj ia blong tijim gospel.”
Tufla i kasem kaonsel wetem bisop blong tufala mo wetem wan kapol we tufala i go long misin finis long Davao. “Olgeta evriwan oli serem testemoni blong olgeta se Lod bae i lidim wanwan kapol blong save olsem wanem blong lukluk long ol bisnis blong hom, famli blong tufala, mo mane blong pem misin blong tufala,” Sista Rita i talem.
Elda Rita i talem: “Taem mitufala i stap lukaotem daereksen, toktok i stretem fraet blong mitufala—bisnis blong mitufala i go gud nomata long samfala jalenj, mo ol kastoma blong mitufala oli talem se oli glad mo oli givim sapot, mo famli blong mitufala i kam kolosap moa tugeta blong tekem kea long sik mama blong mifala. Mitufala i stat blong andastanem se Lod bae i rili helpem mitufala.”
Rita kapol i save givim seves naoia long saed blong memba mo lidasip sapot long Filipin Kagaya se Oro Misin.
Yu Save Mekem Plante Samting
Sam kapol oli stap askem olgetawan long saed blong problem blong helt we i save blokem olgeta, be i no Kit mo Jenilin Mauerman blong Yuta, YSA. Sam yia i pas, fo manis afta we tufala i mared long Los Anjeles Kalifonia Tempol, Oli singaotem Kit long ami mo i go long faet. Olsem wan lida blong ami, hem i wokbaot long fored blong ol nara soldia, taem wan graon bom i faerap. Hem i lusum tufala leg blong hem. Taem hem i kasem haos, Jenilin i ron i go long saed blong hem.
Kit i talem: “Mi save se mi no nid blong wari from se mitufala i gat wan mared we i no save finis. Waef blong mi i sapotem mi oltaem i kam. Hem i stap sapotem mi yet tedei.”
Taem Sista Mauerman i finis wok, tufala i disaed blong go long wan misin. Be, ?olsem wanem long Elda Mauerman we i no gat tufala leg blong hem, bae i wan problem? “I gat yet ol samting we mi no save mekem,” hem i talem. Be i gat fulap samting we mi save mekem; from hemia, mitufala i bin save se bae i gat wan ples blong mitufala.
Taem mitufala i fulumap ol rekomendesen fom, hem i tikim wan bokis we i talem se hem i bin wok long ami. I no longtaem afta, Jos Ami Rilesen i ringim olgeta. “Mi gat wan ID kad we bae i letem mitufala blong go insaed long ol kamp blong ami, mekem se oli askem raet blong mitufala blong sendem nem blong mitufala blong lukluk long ol ami rilesen misin.”
Oli singaotem tufala Mauerman blong go long misin long wan kamp blong ami long Not Karolina, YSA. Elda Mauerman i rimemba: “Saen long get i talem: ‘Fort Brag, Hom blong Ami blong Ea.’ Taem ol gad oli welkamem mitufala wetem moto blong Ami blong Ea ‘!I Go Kasem En!’, i bin fas taem we mi bin harem moto ia afta plante yia. Mi filim se mi stap hom, nomata mi neva bin go long Fort Brag. Mi bin save se misin koling blong mitufala i go stret long mitufala mo Lod i bin gat tingting long mi.”
“Mitufala i tijim ol lesen long fasin blong dipen long yumiwan mo fasin blong stap gogohed mo abaot fasin blong mekem mared i kam strong moa,” Sista Mauerman i talem. “Long fas ples, mitufala i no bin wantem serem stori blong mitufala, be mitufala i faenem se taem mitufala i serem, i mekem fulap samting i defren. Ol soldia mo waef o hasban blong olgeta oli lukluk mitufala mo talem, ‘Sapos yutufala i save mekem, mifala tu i save mekem.’”
Tufala Mauerman i gat gudfala eksperiens long Not Karolina, mekem se tufala i askem blong givim seves bakegen. Tedei, tufala i travel 64 km aot long hom blong tufala long Orem i go long Sol Lek Siti, tu taem long wan wik blong givim seves long Jos Ami Rilesen ofis. Tufala i tijim tu ol senia kapol long misinari trening senta long Provo, long wan ples we oli faenem se long kolosap evri grup, i gat wan we i bin winim ol bigfala jalenj blong save givim seves.
Ol Lanwis blong Wol
Randi mo Lu Elen Romrel blong Yuta, oli singaotem tufala long Brasil Kiuba Misin, tufala i bin wari. Nomata we Elda Romrel i bin go long misin long Brasil olsem wan yang misinari, hem i fogetem olsem wanem blong toktok lanwis blong Potugal. Mo Sista Romrel i no save lanwis blong Potugal. Be, Elda Romrel i stadi mo traehad mo i tekembak samfala skil blong hem i gobak, mo Sista Romrel i gro. Wetem wan yukalele tu.
Sista Romrel i talem se: “Mi no rili plan blong tekem i go,” be Elda Romrel i gat insperesen blong tekem i go, mo i gud tumas blong luk se yukalele ia i mekem wanem. Taem mitufala i stap tijim ol investigeta mo wok wetem ol memba we oli lesaktiv mo felosipim olgeta, hem i bin wan gud taem blong yusum yukalele ia blong mekem ol pipol oli singsing long ol hym. Mifala i lanem lanwis, mo ol hym oli tekem wan strong spirit wetem olgeta.”
Nomata skil blong lanwis Potugis i stap kam antap yet, hem i lanem gud miusik finis. “Miusik i tekem ol pipol oli kam tugeta,” hem i talem. “Iven sapos mi no andastanem evri samting we oli talem long taem blong wan visit, taem mifala i singsing, mifala i joen wanples.” Taem oli askem tufala blong toktok long ol skul abaot Holidei blong Amerika blong Talem Tangkyu, tufala Romrel i singsing ol singsing blong talem tangkyu—wetem yukalele ia. Mo Sista Romrel i yusum tu wan nara tul blong miusik, wan piano, blong go wetem ol hym long jos.
?Be olsem wanem long lanwis Potugis? “Iven sapos yu no toktok gud long lanwis, blong lanem samfala toktok i help bigwan,” hem i talem. “Blong talem Halo nomo mo sekhan long ol pipol i mekem bigfala samting. Letem olgeta oli save se yu stap gohed blong lanem. Mekem i simpol mo dipen long Spirit.” Mo Spirit, i tru, i wan nara lanwis we evriwan i save serem.
Stap long Hom mo Givim Seves
Pol mo Mar Jin Lewis, blong Yuta, we tufala i go long tri misin finis, (Palmaera Niu Yok Tempol; Hong Kong Jaena Tempol; mo Kroesia Sebia, mo Slovenia wetem ol seminari mo institiut). Tufala i stap rere blong go long wan nara misina taem we stek presiden blong tufala i askem: “?Bae yutufala i glad blong givim seves long ples ia nomo, long stek blong yutufala nomo, mo sapotem misin we yumi stap long hem?”
“Mitufala i niu long ples ia, mo i wan gudfala janis” Sista Lewis i talem. “Mitufala i wok wetem ol yang elda mo sista, wok kolosap wetem misin presiden, go long ol distrik mo eria miting, mo wok wetem ol wod misin lida.” Oli visitim tu ol investigeta mo olgeta we oli lesaktiv.
“Mifala i mitim ol gudfala pipol we bae mitufala i neva mitim,” Sista Lewis i talem, “mo tu, sam we oli go longwe long rod. Blong luk olgeta oli kambak, kasem ol odinens, mo go long tempol i wan gudfala blesing.”
“Plante kapol, taem oli tingting blong wok long wan misin, oli wari se wanem bae i hapen long haos blong olgeta mo trak blong olgeta, mo wanem bae oli mestem wetem famli blong olgeta,” Elda Lewis i talem. “Mitufala i bin save stap long haos blong mitufala, mo draevem trak blong mitufala. Oli leftemap tingting blong mitufala blong go long ol famli aktiviti, sapos oli no blokem mitufala blong mekem misinari responsabiliti blong mitufala. Mo mitufala i bin save stap long taem we wan apupikinini i bon.”
Ol Blesing blong Famli
Long nara han, Jil mo Kent Sorensen, we oli blong semfala stek ia, tufala i talem se wan long bes wei blong mekem famli blong olgeta i kam strong moa i blong go long misin longwe long hom blong olgeta. Sista Sorensen i talem: “Wan long ol stamba eskius we ol kapol oli givim blong no go long misin i, ol apupikinini, ol mared pikinini wetem ol hadtaem, ol gel we oli gat bel, mo ol olfala papa o mama—mo fulap moa. Famli i wan fas samting long lukluk long hem, mo yu misim olgeta evri dei. Be blong go long wan misin, i sendem wan strong mesej se misinari wok i impoten tu.”
Mo tu, Elda Sorensen i talem: “I gat fulap wei naoia blong toktok wetem famli, mekem se yu save jekem olgeta evri taem.”
Misinari wokbaot blong tufala Sorensen i stat tri yia i pas, taem bisop blong tufala i askem tufala blong mekem ol faeasaed wan taem long wan manis blong ol kapol we oli tingting blong go long misinari seves. “Afta we oli tokbaot hemia oltaem, !mitufala i mas go nomo!” Sista Sorensen i talem. Tufala i kasem koling blong go long misin long Kuk Aelan, long ples we ol bubu blong Jil oli go long misin 50 yia i pas.
Tedei, wetem sam narafala wok moa, oli askem tufala blong tijim ol Baebol klas long ol skul.
“Mitufla i tokbaot se Kraes hem i bigfala ston,” Elda Sorensen i talem. “Mitufala i givim ol studen wan smol ston mo leftemap tingting blong olgeta blong stap strong olsem wan ston, we oli strong long Kraes. Naoia, evri ples we mitufala i go long hem, ol pipol oli talem ‘!Strong olsem Ston!’ taem oli luk mitufala.
Kam mo Help
Sapos yu stap tingting long wan fultaem misin, o wan Jos Seves misin, evri kapol ia bae oli askem semfala kwestin we Presiden Robison i askem Jeral mo Lona Malmros: “?Yu save kam mo help?” Mo bae oli talem long yufala, se nomata olsem wanem nao yu stap tekpat, promes ia i stap nomo: Oli nidim yu, yu save givhan, mo bae oli lavem yu mo bae yu gat blesing.