Te reo o te feia mo’a i te mau mahana hopea nei
Eiaha e pupuhi !
Ua tape’ahia te i’oa
Ua parahi maua o Bob i roto i to maua pereoo muto’i, a tia’i noa ai i te ohipa e tupu mai i ni’a i te purumu. Ua haamata maua i ta maua moemoeraa e piti hora na mua’tu i muri a’e i to maua iteraa i te pereoo i faa’itehia mai na roto i te radio faaara a te muto’i.
Te parau ra te faaararaa e, « te ha’uti ra te Stickup ». « E piti tane, e pupuhi ta raua toopiti. I itehia raua i roto i te hoê pereoo pua tou. Te parau ra te mau ite, e mea iria tera na tane e e pupuhi raua ».
E rave rahi eiâraa e te mauhaa pupuhi tei tupu i taua vahi ra i te mau taime i ma’iri, e noa’tu ta matou mau haaraa tuutuu ore, ua ora noa te feia eiâ. Ua pee ê teie mau mana’o i to’u feruriraa i te taime a ite atu ai au e piti tino i te haereraa mai i rapae i te hoê fare i ni’a i te purumu poiri e ua ou’a atura i roto i te pereoo pua tou. I teie nei, te tere mai nei ratou i to maua pae.
Na ô a’era vau e, « te ani atu nei i te pupu paturu ». « Te tere nei te feia iino i te pae apato’erau mai te vahi tei reira maua ».
To maua pupu paturu, e piti muto’i huna faito tivira i roto i te hoê pereoo tapa’o-ore-hia, ua tere raua na mua i te pereoo o te feia iino, area maua o Bob ra, na muri mai ïa. I muri a’e i te tomoraa to matou na pereoo e toru i ni’a i te hoê araturu, ua tape’a ta’ue to maua pupu paturu ma te tarava te pereoo i ni’a i te araturu i mua i te pereoo pua tou, e ua tapea maua i muri mai, no te aua i te feia iino. Fatata i tera iho taime, ua tapea te pereoo e ua haamo’e na tino ia raua.
« Hare i rapae i te pereoo ma te tuu i te rima i ni’a i te upoo ! » Ta’u ïa faaueraa i muri a’e i to’u haereraa i rapae i to’u pereoo. Aore hoê taata i pahono mai.
Ma te ineine no te pupuhi, ua faaue faahou vau e, « Hare i rapae i te pereoo ma te tuu i te rima i ni’a i te upoo. A haere i teie nei ! »
Ua ti’a a’era te taata faahoro i ni’a e ua fariu maira i ni’a ia’u. Ua ite au i te hoê tao’a anaana i te anaparaa i roto i to’na na rima.
Puta mai nei ta’u haapiiraa muto’i e te mana’o tumu ia pupuhi no te paruru i to’u ora. Tera râ, i ni’a a’e i te aehuehu o taua taime ra, ua faaroo a’era vau i te hoê reo. E reo marû tera râ, e reo pautuutu e te mana rahi : « Eiaha e pupuhi ! »
Ua feruri au e pupuhihia mai au, tera râ, ua tia’i au i te hoê taata i roto i te pereoo ia pupuhi na mua. Aita râ, ua afa’i te taata faahoro i to’na na rima i ni’a, faatetei a’era i ni’a a’e i to’na upoo i te mea i hoho’a i te pupuhi, e ua faatopa i to’na na rima i ni’a i to’na turi.
« Eiaha hoê taata e ha’uti ! » To’u ïa reo a horo atu ai au i te pereoo ra. « Eiaha e ha’uti ! »
E au taua taime ra, mai te hoê ha’utiraa i roto i te afata teata—tae roa’tu i te taime a ite ai au e, teie na taata iino i roto i te pereoo, e piti ïa na tamahine apî ua pohe roa i te ri’ari’a. Te mea ta’u i mana’o e, e pupuhi, e ere ïa i te pupuhi, e pitara hatua râ no te parahiraa.
Ua ite a’era matou e, ua tipee na tamahine i te pereoo o to raua na hoa tamaroa. Aita hoê a’e iteraa to raua no ni’a i te huru o teie na taata.
« Ua mana’o vau e, ua pohe oe e Cal ! » Ta Bob ïa i parau mai ia’u i muri a’e ra. « Ua fatata roa vau i te tutu’i. Aita vau i ite e no te aha aita vau i tutu’i ».
Na muto’i huna i roto i te pereoo tapa’o-ore-hia, te reira ato’a ta raua parau, noa’tu e aore hoê a’e i faaroo i te reo, maori râ o vau ana’e. Ua ite au e, na te mana ana’e o te ra’i i faaora i taua na tamahine ra e piti i te pohe e i na muto’i e maha ia rave i te hoê hape ri’ari’a. Na teie ohipa i tupu i horo’a mai ia’u i te iteraa papû e, e nehenehe e e toro mai to tatou Metua i te ao ra i te rima no to tatou maita’i.