Te hau i roto i to’u aau
Na Carol F.McConkie
Tauturu matamua i roto i te peresideniraa rahi o te Feia Apî Tamahine
I te va’uraa o to’u matahiti, ua ite au i te peropheta, te Peresideni David O. McKay (1873-1970). Ua haere mai oia no te haamo’a i te hoê fare apî na te Ekalesia i Palmyra, New York, i Marite. Ua haere to’u utuafare i te reira haamo’araa. E rave rahi mau taata ê atu i haere ato’a mai. Ua rahi roa to matou oaoa ia hi’o i te peropheta !
E mea na’ina’i roa vau, no reira e ere i te mea ohie no’u ia hi’o i te mau taata ato’a. Tera râ, ua ti’a noa â ia’u ia ite i te here o te Peresideni McKay. No te hoê noa minuti, ua ite atu vau i to’na rouru uouo e to’na hoho’a mata maita’i. Ua feruri a’era vau e, « tera ïa te huru o te hoê peropheta na te Atua ». Ua tai’o vau i te parau no ni’a i te mau peropheta i roto i te mau papa’iraa mo’a, tera râ, teie to’u taime matamua a ite mata roa ai au i te hoê peropheta e a ore râ, i te hoê noa’tu Huimana faatere rahi. Ua ite a’era vau e, e taata mau te mau peropheta. E ua here ratou ia tatou ! Eita e mo’ehia ia’u te here e te hau ta’u i farii i taua mahana ra.
I te 11raa to’u matahiti, ua farii au i te tahi atu iteraa tei tauturu ia’u ia farii i te hau i roto i to’u aau. Te fatata maira te amuiraa titi, e ua titauhia ia’u ia himene i roto i te pupu himene a te titi. Ua anaanatae roa vau ! Ua oomo vau i te hoê ahu uouo nehenehe roa, e e mea taa ê mau. Te mau paraparau o te himene ta matou i himene, no roto mai ïa i te Ioane 14:27, « E hau ta’u e vaiiho ia outou nei, o to’u nei hau ta’u e hô atu no outou : e ere mai ta to te ao nei horo’a ta’u horo’a ia outou. Eiaha e taiâ to outou aau, eiaha hoi e mata’u ».
Ua putapû roa to’u aau i taua mau parau nei, e mai taua taime ra, ua haamana’o noa vau i te reira. A himene ai au i taua mau parau ra, ua ite au e parau mau te reira. Ua ite au i te Varua maitai ia parau mai ia’u e, ia pee ana’e tatou ia Iesu Mesia, e tauturu te reira ia tatou ia farii i te hau. Mai taua taime ra, i te mau taime ato’a e farerei au i te fifi, e puta mai teie mau papa’iraa i roto i to’u feruriraa, e e horo’a mai i te hau i roto ia’u. Te parau mau ta’u i apo mai i to’u apîraa ua haamaita’i te reira i to’u oraraa taato’a.