Ua Ou Iloa o Loo Soifua Lou Faaola
E alala le tusitala i Filipaina.
Ina ua tuua i matou e matou matua, na matou iloaina o Iesu Keriso o le a le faia lena mea.
Ata na tusia e Brian Call; faamatalaga mai Keriso ma le Faitulafono Mauoa Talavou, saunia e Heinrich Hofmann
Ina ua 14 ou tausaga, na tuua e lo’u tama lo matou aiga, ma sa faamalosia lo’u tina e sola ese mai le atunuu. Sa tuua i matou ma nai o’u tei laiti e toatolu, Ephraim, 9 tausaga; Jonathan, 6; ma Grace, 3 (ua suia igoa). Sa leai se mea na saunia i matou mo lenei suiga faafuasei. Mo le taimi muamua, sa tuua ai na o matou.
Na ofo mai aiga lautele e aveina i matou taitoatasi, ae afai matou te o e nonofo ma i latou, o le a vavaeeseina i matou. O se filifiliga faigata. E faapefea ona mafai ona matou teena la latou fesoasoani agalelei? Ae i le taimi lava e tasi, e faapefea ona mafai ona matou tuueseina le tele o tausaga o le taaalo, talie, tausiga o le tasi ma le isi, ma vaavaai i le tuputupu ae o le tasi ma le isi?
I le amataga, na matou teena ma ou tuagane la latou fesoasoani, ma mafaufau e mafai ona ou galue e tausia i matou ma mafai ona matou nonofo faatasi. Ae na matou iloaina e le mafai ona matou tuuina atu le tausiga i lo matou tuafafine laitiiti, ma o lea, faatasi ai ma loimata i o matou mata, na matou faatagaina o ia e alu.
Mo ni nai masina na sosoo ai, sa ou galue ai o se vali fale e faatau ai meaai mo o’u uso ma au. Sa le lava lou totogi e totogi ai pili mo le eletise ma le vai, o lea sa matou ola ai e aunoa ma na mea.
E ui lava i lenei tofotofoga, ma le faitatala o isi na o mai faatasi, e lei faavaivai ai lo matou faatuatua. I po uma, ou te faapotopoto mai Ephraim ma Jonathan e faataamilo i le lamepa e faitau le Tusi a Mamona. Ou te ootiina le vavae ina ia faaitiitia ai le asu, ae e tatau lava ona matou fufuluina o matou isu ua lanu uliuli i le taimi e uma ai ona matou faitau. Peitai sa matua aoga lava.
O le faitauina o le Tusi a Mamona na latalata atili atu ai ia Keriso. A uma ona matou faitau, matou te tootutuli i lalo faatasi ma feauauai i le faia o a matou tatalo. Sa matou ole atu mo le faamafanafanaga i lo matou faafitauli na foliga mai e aunoa ma se vaifofo. Na uma ona matou faitauina le tusi, ma o lo matou faatuatua ia Iesu Keriso na sili atu le tuputupu ae malosi.
I se tasi aso sa ou sau ai i le fale ua le lava mai le galuega ma faapau atu au lava i lo matou moega pito i lalo. O le tepa ae i luga, sa ou vaai ai i se pepa o loo faapipii ai i lalo o le moega i luga ae o au. Na faapea mai: “Ua Ou Iloa o Loo Soifua Lo’u Faaola!” O lou uso Jonathan na tuuina iina. E maeu le latalata atu o tamaiti i le lagi e oo lava i se tamaitiiti Peraimeri e mafai ona avea o se mea faigaluega i le auina mai o se savali mai le Atua e faamafanafana ai se loto ma se mafaufau mafatia.
O lenei molimau na lagolagoina au ina ua ou iloaina ou te le mafai lava ona tuuina atu mea matou te manaomia ma sa tatau ona matou tuua lo matou aiga. O Jonathan sa ave e nonofo faatasi ma le itu o le aiga o lo’u tina, ae o maua ma Ephraim sa ma filifili e nonofo faatasi ma isi o matou matua matutua, ona o i latou o ni tagata o le Ekalesia. I lo la aiga matou te vave feala e fai feau i le fale a o lei amataina le aoga, ona tausia lea o lo matou tama matua i le tuneva o le po. Sa matuai faavaivai tagata lava. Ae ui i lea, na silafia i matou e le Alii, ma na matou toaaga i le Ekalesia.
O taimi uma lava sa ou lagonaina ai le fiu, sa ou toe manatua le taimi faapitoa sa ou maua ma nai ou tei a o matou faitau mai le Tusi a Mamona faataamilo i se lamepa. Ou te iloa o Keriso sa i ai i tafatafa o i matou i na taimi faigata. Mai le taimi na tuueseeseina ai lo matou aiga mai le tasi ma le isi, sa Ia le tuulafoaia i matou. “Ou te iloa o loo soifua lou Faaola!”
O lenei, i ni tausaga mulimuli ane, o loo i ai pea le ata o na upu mai luga ae o lo‘u moega i lo’u loto ma le mafaufau. O lena savali na fesoasoani ia te au ma lo’u uso o Ephraim i o ma tausaga o le auauna atu faamisiona, ma a o taumafai nei e ola i ni faaipoipoga faaselesitila.
Semanu ou te misia le tele o mea i lo’u olaga pe ana ou masalosalo nai lo le faalagolago ia Keriso. E tusa lava po o le a le faigata o le olaga e i ai, e lei faigata tele lava mo le Faaola, lea na puapuagatia i Ketesemane. E mafai ona ia lagolagoina le olaga o se tasi i le fuaiupu e tasi. Na te silafia mea uma mai le amataga e oo i le iuga. E sili atu ona mamana Lana faamafanafanaga nai lo soo se lototiga e mafai ona aumaia e lenei olaga. E ala i Lana Togiola, e leai se faafitauli tumau—na o le faamoemoe faifai pea, alofa tunoa, filemu, ma le alofa. Talitonu ia te au, ou te iloa! Ou te iloa o loo soifua lou Faaola!