Tamaitai Talavou
Saunia e Bonnie L. Oscarson
Peresitene Aoao o Tamaitai Talavou
Ou te folafola atu ia te outou tamaitai talavou a o outou taumafai ia faamasani i uso i lau uarota, o le a latou faamanuiaina o outou olaga ma o le a avea oe o se faamanuiaga ia i latou. Puna vae lua i totonu ma ia tuu atu ia latou iloa ua e saunia e avea ma tagata toaga o se tasi o faalapotopotoga aupito tuai ma tele a tamaitai i le lalolagi. O oe o se vaega taua o le galuega o le faaolataga i aso e gata ai, ma ona o se afafine e tausia-feagaiga a lou Tama Faalelagi, ua e sauni e faia lau vaega i le fausiaina o le malo o le Atua i le lalolagi. Saunia oe lava e oo i se mea matagofie lava.
O a Mea e Mafai Ona Faia e Lora e 18 Tausaga le Matutua?
A o e vaavaai solo i le potu o le Aualofa e tumu i tamaitai o vaitausaga uma, ia fai atu le fesili, “O le a se Mea e mafai ona ou aoaoina mai i nei tamaitai ofoofogia?” A o e tatalaina lou mafaufau ma lou loto, o le a e ofo i le faauoga o le a fausia faatasi ma tuafafine o e matutua atu nai lo oe ae e i ai le tele o mea e faasoa mai o le poto masani ma le atamai.
O a Mea e Mafai Ona Fai e Taitai o Tamaitai Talavou?
E tatau i ou uiga faaalia o le avea ma se tagata toaga o le Aualofa ona maua ai se uunaiga tele i lagona o tamaitai talavou i lau vasega. E mafai ona e faasoa atu ni aafiaga patino o loo faaalia ai le auala na faamanuiaina ai oe po o le auala na faamanuiaina ai olaga o isi e ala i le auai i le Aualofa. E tatau ona outou uunaia ma fesoasoani i Lora e 18 tausaga le matutua ia avea le agai mai i Le Aualofa o se mea fiafia.