O Le Taua na Aumaia ia te Au le Filemu
Robert Swenson, Alapama, ISA
Ata na tusia e Allen Garns
E lima aso ina ua maea lo‘u faauuga o le aoga maualuga, sa ou lesitala ai i le militeli. A o le‘i tuuvaa mo Viatename, sa ou maua ai se uunaiga manino lava o lo’u lesitala o le amataga lea o se malaga faaleagaga.
E lua itula talu ona ou taunuu atu i lau iunite fou, ae papa mai loketi a le fili i le tolauapiga. Na mulimuli mai ai ma se osofaiga o pomu tafaga mamao mai i lena po. Na foliga manaia lava seia oo i le vaiaso lona lua, ina ua maliliu ni nai alii. I le mafaufau manino, sa amata ona ou tomanatu ai i le uiga o le olaga.
E lei umi ae ou feiloai i se taitai o le vaega o helikopa e igoa ia Graig Stephens. I se tasi aso na oo ai i le mataupu faalelotu. Na ia fai mai o ia o se tagata o Le Ekalesia a Iesu Keriso o le Au Paia o Aso e Gata Ai ma fesili mai pe ou te fia iloa atili. E ui lava o o‘u matua e le o ni tagata o le Ekalesia, sa latou aoao au i le faatuatua ia Iesu Keriso.
I lena afiafi i se lafitaga gaogao, na faitau mai ai e Graig le lesona muamua. O le mea na taua i lo‘u mafaufau e le o le lesona po o le ala lea sa ia tuuina mai ai ae o le faamaoni ma le lotomaulalo o lenei fitafita talavou.
I ni nai aso na sosoo ai, na aoao mai ai e Graig ia te au isi lesona. A uma lesona taitasi ma te tootutuli i le tatalo. Na te fesili mai lava i taimi uma ou te tatalo, ae sa le mafai ona foliga mai ou te mafaia. Ou te manatua le le mautonu i nisi o mataupu ma aoaoga faavae, ma sa tonu loa ou te le toe fia faalogo e uiga i le Ekalesia. Na faaaluina e Graig le aso na sosoo ai e sue ai se tasi e mafai ona talia a‘u fesili.
Ina ua pogipogi, sa ia aumaia se pailate helikopa—o se faifeautalai ua maea le misiona—mai le isi au e vaai au. O lenei uso na taliina au fesili ma molimau mai na te iloaina e moni le Ekalesia. Ona ia fai mai lea ua ou saunia mo le papatisoga e pei o soo se tasi sa ia vaai i ai i se isi lava taimi. Sa le mafai ona ou fai atu se upu. Ina ua uma lana tala, sa ou mafaufau, “E te iloa se mea, e sa‘o o ia.”
I se taimi puupuu mulimuli ane, a o ou saofai i lo‘u lafitaga ma faitau le Tusi a Mamona, sa ou filifili e fai e pei ona faasino mai e tusitusiga paia ma ole atu i le Atua, pe moni le Tusi a Mamona (tagai i le Moronae 10:4–5). Sa punou lo‘u ulu, ma tuu atu la’u talosaga i le Alii. Sa lei umi ona ou faia ae ou lagonaina se lagona e le mafaafitia o le mafanafana ma le filemu ou te lei lagonaina lava muamua. Sa ou iloaina sa tali mai le Atua i la‘u tatalo. Na ou iloa e moni le Tusi a Mamona. I le iloaina e moni le Tusi a Mamona, na ou iloaina o Iosefa Samita e tatau ona avea o se perofeta. Mulimuli ane, sa ou papatiso i le Fagaloa o Tonkin.
A o ou aluese mai le vai o le papatisoga, sa ou maua se lagona o le mama atoatoa. Sa lei matagofie faapea muamua le olaga. Na malaga mo le faitau afe o maila i se sone o le taua, ae mulimuli ane ou maua le filemu sa sailia e lo‘u agaga.