O Se Penina Moni
E alala le tusitala i Iuta, ISA.
Sa manao Jetta e ta le piano, ae e mafai ona ia tuua lona aiga?
“O mea laiti ma faatauvaa e faataunuu ai mea tetele” (Alema 37:6).
Sa tosoese e Jetta Pearl Stewart lona pulou ma faapalasi i lalo i le poletito i autafa o Tama. “O le a le penina?” na ia fesili ai ia te ia.
Sa iloa e Jetta e valu-tausaga-le-matua le mea e tau o se penina, ae sa fiafia o ia e faalogo i le tali a Tama. E pei o taimi uma lava, na faamalamalama mai e Tama pe faapefea ona tuputupu ae penina i faisua, o lea vaega i luga o lea vaega, seia oo ina avea i latou ma se maataua susulu, ma le iila.
“O penina e susulu e pei o oe, o la‘u Penina Jetta laitiiti,” na ia fai mai ai, ma ataata. Sa ataata atu foi Jetta. E fiafia o ia e avea ma ana Penina.
I le taumafataga i lena po, na tau atu e Tama ia Jetta sa i ai sana fesili taua mo ia.
“Talu mai lava lou laitiiti, sa i ai sou auala faapitoa i musika,” na fai mai ai Tama. “E te fia aoao e ta le piano?”
Na faalapopoa atu mata o Jetta. “Oka, ioe!”
“O lona uiga o le malaga mamao ese ma nonofo ai ma lou faiaoga mo sina taimi,” le tala a Tina. “E leai se tasi e mafai ona aoaoina oe iinei i Milburn.”
Na mou ese le ataata a Jetta. E lei alu ese lava o ia mai lona aiga mo le sili atu ma se aso. Ma o le a mamao ese …
“Ae e taua mo i tatou e atiina ae a tatou taleni, e tusa lava pe faigata,” o le tala lea a Tama.
Na lue atu le ulu o Tina. “E tatau ona e galue malosi,” o lana tala lea.
O Jetta e fiafia i musika. Ma sa masani lava ona ia manao e ta le piano. Ona oo mai lemu lea, o se ataata i ona foliga. “O le a ou taina le piano!”
Ae o le taeao na sosoo ai, a o vaavaai atu Jetta ia Tama o faapipii le solofanua i le taavale toso, sa ia le lagonaina lava se fiafia. I le aso, ua na o le fefe lava o ia. Sa lei faamoemoeina e ia e tuua vave le aiga.
Sa ae lemu atu Jetta i totonu o le taavaletoso i autafa o Tama.
“Ua e saunia, Jetta Pearl?” na ia fai atu ai.
Sa ia lagonaina le le saunia, ae na luelue le ulu o Jetta. Na tau malua atu le taavaletoso i luma.
Ina ua mavae se taimi, na tilotilo atu Tama ia te ia. “Pe e te iloa lo ma mitamita tele ma lou tina ia te oe?”
Na luelue atu le ulu o Jetta. “Ae faapefea pe afai e te manaomia la‘u fesoasoani i le fale?”
Sa ataata Tama. “O le a mautinoa lo matou misia o oe, ae o se auala lenei ua na o oe e mafai ona fesoasoani ai. O le a e auauna atu i le Tama Faalelagi e ala i le atiina ae o meaalofa ua Ia tuuina mai ia te oe.”
Sa le‘i mafaufau lava o ia faapena. Pe o lana taleni faamusika o se meaalofa moni mai le Tama Faalelagi?
Sa faaauau pea Tama. “O le a faaalu ai se taimi, ae mai lea vaega itiiti i lea vaega itiiti o le a faasolo ina e lelei i le taina o le piano. Ona e mafai ai lea ona auauna atu i le tele o tagata.”
Na lagona e Jetta ua amata ona mou ese atu lona fefe. O le a ia aoao e ta le piano ma auauna atu i le Tama Faalelagi. O le a taufaafefe, ae sa ia iloaina o le a Ia fesoasoani ia te ia.
Na faaivi atu le mata o Tama. “O le lea vaega i lea vaega, o la‘u Penina laitiiti ua amata ona susulu ma iila.”
E pei lava ona fai mai ai Tama, mai lea vaega itiiti i lea vaega itiiti na aoao Jetta e ta le piano. Sa ia aoaoina foi pe faapefea ona taina le okeni.
Ina ua mavae ni nai masina, na toe foi mai Jetta i le fale. O lena aso Sa amata ona avea o ia ma ta okeni muamua lava a Milburn! Sa tata faatopetope lona fatu ao nofo o ia i le okeni tele na galulue le alalafaga e faatau mai mo ia e taina. Sa matagofie tele le okeni sa toetoe lava a fefe Jetta e tago i ai. Sa tatau ona nofo o ia i luga o se tusi ina ia au atu ai i ki o le piano.
Sa fai sana manava lapoa lava ma amata loa ona ta le okeni. Sa faatumulia le potu i le musika, na atoatoa ma matagofie.
Na faasiusiu mata atu Jetta i le faapotopotoga. Sa ataata tagata a o latou pepese. Sa ataata foi Jetta. Sa mamao lava lana tata mai le atoatoa, ae sa ia faaaogaina ana taleni e auauna atu ai.
Ia manatua upu a Tama: “O penina susulu e pei o oe, Jetta Pearl.”
Mai lea vaega itiiti i lea vaega itiiti, sa faia e Tama Faalelagi o ia ia avea o se penina moni.