O Le Malamalama o le Aso Atoatoa
Saunia e Elder Larry R. Lawrence
O Le Fitugafulu
O le faaputuina o le tele o le malamalama tatou te mafaia o le ki lea i le manuia i le suega o le olaga faaletino.
Ata na tusia e © iStock/Thinkstock
Pe o le a e te‘i i le iloa o lo outou manuia i le olaga e faalagolago lea i le tele o le malamalama e maua a o e i ai iinei? O le faamanuiaina e le o le aofaiga o tupe e te maua, po o le tele o pine e te manumalo ai po o le tele o le lauiloa e te ausia. O le faamoemoega moni o lo tatou olaga o le mauaina o le malamalama.
E faatupulaia o tatou tino faaletino pe a tatou fafagaina i meaai lelei. O o tatou agaga e faapupulaina atili pe a tatou fafagaina i le malamalama. “O le malamalama lava le Atua, ae e leai lava se pouliuli o ia te ia” (1 Ioane 1:5). O lo tatou Tama Faalelagi sa avea foi o se tagata soifua na faasolosolo malie ona alualu i luma seia oo ina avea o Ia ma se tagata e atoatoa le malamalama. E finagalo o Ia ia faapena foi oe ma au ona o le atoatoaga o le malamalama o lona uiga o le atoatoaga o le olioli.
E alofa tele lo tatou Tama Faalelagi ia i tatou, o lea, ina ua tatou tuua lo tatou muai olaga e o mai i le lalolagi, na Ia tuuina mai ia i tatou taitoatasi se meaalofa faamavae: o le Malamalama o Keriso, lo tatou lotofuatiaifo. Ua taua e tusitusiga paia, “O le Agaga e faamalamalamaina tagata taitoatasi i le lalolagi atoa,” (MF&F 84:46).
O le faanaunauga sili o le Tama Faalelagi ia tatou mulimuli i le malamalama sa tatou fananau mai ma i tatou, ina ia mafai ona tatou maua le malamalama atili. A o tatou faaauau pea ona mulimuli i le malamalama ua liligi e lo tatou Tama i luga o i tatou, tatou te maua le malamalama atili ma avea atili ai faapei o Ia.
O le meaalofa o le Agaga Paia—e faaopoopo i le malamalama sa tatou fananau mai ma i tatou—tatou te maua ai se faamanuiaga sili. O se tasi o meaalofa silisili e mafai ona tatou maua i le olaga nei ona e aumaia ai le tele o avanoa mo le mauaina o le malamalama ma le upumoni. A aunoa ma le Agaga Paia, ua pei i tatou o se tagata e savalivali lemu i le fale i le pogisa ma se taiala e na o se moliuila. Pe a tatou talia le talalelei a Iesu Keriso ma ua papatisoina, ua ofoina mai ia i tatou se malamalama susulu ma se taiala e silafia le ala. O lenei ua mafai ona tatou savavali televave ma iloa atu lo tatou ala i le taimi o la tatou malaga agai i lo tatou aiga.
Faateleina i le Malamalama
“O le mea e mai i le Atua o le malamalama lea; ma o ia o lē e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai” (MF&F 50:24).
O loo otooto atoatoa i lenei fuaiupu lo tatou faamoemoega i le lalolagi. O le alualu i luma e faavavau o lona uiga o le faateleina i le malamalama. A o faateleina pea lava pea le susulu o o tatou agaga, ua tatou galulue agai i lena “aso atoatoa” pe a mafai ona avea i tatou faapei o le Atua ma faatasi ma le Atua.
Ata na tusia o le Malumalu o Bountiful Iuta e David Stoker
Mafaufau i lenei manatu faavae o le malamalama i le isi taimi e te auai i se sauniga o le faaeega paia i le malumalu. E amata i se potu e le malamalama tele. A o faateleina lo outou malamalama, o le potu o le a susulu atili. Mulimuli ane o la outou malaga o le a aveina atu outou i le potu selesitila mamalu. O se faatusa o la tatou malaga i le lalolagi lo tatou aafiaga i le malumalu. O mea e faateleina pea lava pea le malamalama seia oo ina tatou ulufale atu i le afioaga o le Alii.
O le malamalama faateleina o se uiga o tagata toetutu selesitila uma. Ina ua faaali atu le agelu o Moronae ia Iosefa i lona potu, sa matauina e le perofeta talavou lena agelu “ona fofoga [sa] pei moni lava o le uila” (Iosefa Samita—Talafaasolopito 1:32). Na faaaoga e Mataio le upu lava lea e tasi e faamatala ai le agelu i le tuugamau o le Alii, na faamaumauina o o latou “fofoga sa pei o le uila” (Mataio 28:3 [tagai foi i le Faaliliuga a Iosefa Samita, Mataio 28:3, vaefaamatalaga a]).
Pe a oo mai le taimi mo i tatou taitoatasi e toetutu ai, e faapefea ona fuafua e le Alii pe tatou te mauaina se tino telesitila, po o se tino terasitila, po o se tino selesitila? E sili atu ona faigofie le tali nai lo le mea atonu e te mafaufau i ai. Afai ua tatou faaputuina ia lava se malamalama faaselesitila i o tatou agaga, o le a tatou toetutu ma ni tino selesitila. Afai pau lava le malamalama ua tatou faaputuina e agavaa ai mo tino terasitila po o le telesitila, o le mamalu lena o le a tatou maua i le Toetu.
Ua faamatala mai e le Mataupu Faavae ma Feagaiga:
“O lo outou mamalu o le a o lena mamalu e faaola ai o outou tino.
“O outou o e e faaolaina e se vaega o le mamalu selesitila o le a outou maua i lena taimi lea lava mamalu e tasi, o se atoatoaga lava” (MF&F 88:28–29).
Pe a tatou tumau ai i le ala lauitiiti ma vaapiapi, ma taumafai e ola i poloaiga ma faaleleia atili i tatou lava, tatou te faaputuina le malamalama. Ae o le a se mea e tupu pe a tatou se ese mai le ala ma solia poloaiga? O le a le mea e tupu i lo tatou malamalama?
O tusitusiga paia ua tau manino mai le uiga o lenei mea: “Ma o ia o lē e lē salamo, o le a aveesea mai ia te ia le malamalama lava lea na ia maua” (MF&F 1:33; faaopoopo le faamamafa). I se isi faaupuga, e ui o nisi tagata e mauaina le malamalama, o isi o le a le mauaina. O Satani e mafai ona aveesea le malamalama i le taimi lava tatou te solia ai le upumoni (tagai i le MF&F 93:39).
O le fesili taua tatou te fai atu o le, pe faapefea ona tatou mafai ona maua le malamalama sili atu ina ia “faateleina pea lava pea le susulu” i totonu o i tatou? Ou te fautua atu ni auala se lima.
Alofa i Isi
O se tasi o auala sili e maua ai le malamalama o le aoao e alolofa e pei ona alofa lo tatou Tama oi le Lagi. Tatou te ta‘ua lenei ituaiga alofa o le alofa mama. Ua apoapoai mai Mamona ia i tatou ia “outou tatalo atu i le Tamā ma le malosi atoa o le loto, ina ia faatumulia outou i lenei alofa” (Moronae 7:48) O le alofa e vave ona aumaia le malamalama atili i o tatou agaga; o le finau ma le loto leaga e aveesea le malamalama.
Ia manatua, o le poloaiga muamua o le alofa i le Alii ma lo tatou loto atoa, agaga, ma le mafaufau (tagai i le Mataio 22:37–38). O le taui mo le alofa i le Atua ma le faamuamua o Ia i o tatou olaga e telē tele. Na aoao mai Iesu, “Afai e tautasi o outou mata i lo‘u mamalu, o le a faatumulia o outou tino atoa i le malamalama” (MF&F 88:67; faaopoopo le faamamafa).
O le poloaiga lona lua o le alofa i o tatou tuaoi e pei o i tatou lava (tagai i le Mataio 22:39). Atonu e sili atu ona faigata le faia o lenei mea ona o o tatou tuaoi e le atoatoa. O le mealilo moni lava i le aoao e alofa i isi e maua i le auauna atu ia te i latou. O le mafuaaga lena e faigofie ai ona tatou alolofa i a tatou fanau, e ui lava e mamao ese mai i latou ma le atoatoa.
O le tele o lou auauna atu, o le tele lea o lou alofa, ma le tele foi lena o le malamalama e te maua. O faifeautalai—e matutua ma e talavou—e atiina ae se malamalama susulu lea e vaaia e isi. I le auauna atu faamisiona e tauia e ala i le tele o le malamalama faaleagaga.
Suesue i Tusitusiga Paia
E leai se auala alo i le aoaoina o upumoni. E tatau ona e faaalu le taimi i le faitauina o tusitusiga paia ma aoaoga a perofeta. Afai e te manao e tuputupu ae faaleagaga, e tatau ona e fafagaina lou agaga e ala i le taumamafa i le upu i aso uma. E tusa ai ma le Mataupu Faavae ma Feagaiga, o le upu moni ua na o se isi igoa mo le malamalama (tagai i le MF&F 84:45).
A o lei tatalaina au tusitusiga paia i aso taitasi, tatalo ia e aoao se mea fou e faaopoopo ai le malamalama i lou agaga. Ona saili lea mo ni manatu fou ma le malamalamaaga. Ia fesili foi ia te oe lava, “E faapefea ona aoga nei mea ou te faitauina i lo‘u olaga?” E tatau ona e naunau e faaalu le taimi pe afai e te manao e maua ai le malamalama atili.
O se punavai e faatatau i le malamalama o o tatou agaga e maua i le taulotoina o mau. Na saunoa mai Elder Richard G. Scott (1928–2015) o le Korama a Aposetolo e Toasefululua, “O tusitusiga paia e pei lava o ni tamai sulu e faamalamalama ai o tatou mafaufau” ma “e mafai ona oo mai se mana maoae mai le taulotoina o mau.”1 O le taulotoina o mau e avea ma se meaalofa e te tuuina atu ia te oe lava—o se meaalofa lea e faaauau le tuuina atu pea lava pea o le malamalama.
Usiusitai i Poloaiga
A o e iloaina poloaiga i tusitusiga paia, alu loa ma usiusitai i ai. Mo se faataitaiga, afai e te faitauina le fautuaga faalelagi e “vave moe” ma “ala po” (MF&F 88:124), e tatau la ona e usiusitai. Afai e te faitauina le Mataupu Faavae ma Feagaiga, ma tau atu i le poloaiga “Aua e te tautala leaga e uiga i lē lua te tuaoi,” (MF&F 42:27), ona tatau lea ona e faaeteete i upu e te fai atu e amata i le taimi nei. A o e aoao upumoni, e tatau ona e faaaogaina e faaputu ai le malamalama.
Afai e te maua le malamalama ae le faaaogaina, e te ono le toe mauaina.
Faalogo i le Agaga Paia
O le faalogo i le Agaga o se tasi o auala na maua ai e Peresitene Thomas S. Monson le tele o le malamalama. Sa ia aoao e mulimuli i uunaiga ma musumusuga e oo mai ia te ia. Ua aoao mai tusitusiga paia, “O tagata uma taitoatasi o e e faalogo i le siufofoga o le Agaga, e o mai i le Atua,” (MF&F 84:47).
Afai e te faamoemoe e maua uunaiga faaleagaga, o le a oo mai. Afai e te galue i ai, o le a e mauaina atili. Afai e tau mai e le Agaga Paia ia te oe e fai se mea e faigata (pei o le taofia o se mausa leaga), ma e faalogo ma usitai i le uunaiga, o le a e maua se maoae o le tuputupu ae faaleagaga ma se faateleina o le malamalama.
Auauna atu i le Malumalu
Pe a tatou mafaufau i malumalu o le Alii, e vave lava ona tatou mafaufau i le malamalama. Mo se faataitaiga, mafaufau i mea na tusia e le Perofeta o Iosefa Samita e uiga i le faapaiaga o le Malumalu o Katelani i le 1836: “O tagata o le pitonuu na taufetuli faatasi mai (i le faalogoina o se leo uiga ese mai i totonu, ma vaaia se afi faaniutu o loo i luga o le Malumalu).”2
E tele naua le malamalama ma le upumoni e tatau ona maua mai i le auaunaga i le malumalu lea e mafai ai ona taua le malumalu o le Iunivesite a le Alii. O le malamalama o le malumalu e sili atu ona aoga i lou agaga nai lo le susulu o le la i lou tino. Mafaufau ia te oe lava ua faamanuiaina pe afai e mafai ona e olioli i lenei malamalama faalelagi i se tulaga fai soo.
Ia Avea o se Malamalama
O malumalu uma, falesa uma, ofisa uma o le misiona, aiga uma o le Au Paia o Aso e Gata Ai, ma tagata uma o le Ekalesia e tatau ona avea o se malamalama i le lalolagi. E pei ona faamanatu atu e Peteru i le Au Paia i ona aso, o le Atua “na valaau ia te outou nai le pouliuli” (1 Peteru 2:9).
Tau ina ia mafai ona tatou faaaluina o tatou olaga atoa i le faaputuina o le tele o le malamalama tatou te mafaia i o tatou agaga o la‘u tatalo lea. O lena faiga o le ki lea i le faamanuiaina i le suega o le olaga faaletino o la‘u molimau lea. Ina ia mafai ona tatou maua le malamalama e ala i le mulimuli i fautuaga o loo i luga o la‘u mau lea.