O Lou Aafiaga Faafaifeautalai na Toeitiiti Lava a Misi
E alala le tusitala i Sergipe, Pasila.
Sa ou manao e faasoa atu le talalelei, ae po o ai o au uo e ono fia faalogo i ai?
Ata na tusia e Michael Mullans
Mo se sini o le Alualu i Luma o le Tagata Lava Ia, sa amata ona ou tatalo ina ia maua se aafiaga faafaifeautalai. Sa ou taumafai e mafaufau po o ai o au uo o le a sili ona manao e auai i le Ekalesia.
Na mavae atu masina, ma sa ou faapea o le a ou le maua se aafiaga sa ou sailia—seia oo ina ou feiloai ia Peleta. O lona tausaga muamua lea i le matou aoga.
A o faagasolo pea le tausaga, sa oo ina avea i maua ma se uo mamae i le aoga, ae sa lei tau lava lou mafaufau e valaaulia o ia i le lotu, seia oo ina valaaulia e se tasi o au uo ia Peleta i lana lotu. Sa ou mafaufau, “Ou te le talitonu! Sa tatau ona ou mafaufau i lena mea.”
O le vaiaso na sosoo ai sa fai mai Peleta sa fiafia e alu i le lotu a le ma uo ma e toe fia alu i ai. Sa ou mafaufau, “Ua ou faiaina.” E le faapea o se tauvaga, ae sa ou manao e ave atu le talalelei i fanau a le Tama Faalelagi.
I le taimi lena na toe faafou ai lo matou falelotu ma sa fuafuaina e toe faapaiaina i ni nai masina. Sa tufa mai e le epikopo ni tusi valaaulia mo se fale tatala ma le faapaiaga. Sa ou valaauliaina au uo uma o e sa nonofo latalata i le falelotu. Na pau lava le tagata na taliaina o Peleta. Sa ou fiafia lava.
I ni nai aso a o lei oo i le fale tatala, na fai mai ai Peleta atonu o le a le mafai ona alu ona sa lei manao i ai lona tina. Sa ou le fiafia, ae sa ou malamalama, ma fai atu i ai, o le a i ai isi avanoa e aoao ai e uiga i le Ekalesia.
Ae peitai, i le fale tatala, sa ou tei i lou vaai ai iina ia Peleta. Sa talanoa o ia i lona tina, o lē na iu ina faatagaina o ia e alu. Sa ou faafeiloai atu o ia i faifeautalai. Sa ma o i potu taitasi i le falelotu ma faalogologo i se faamatalaga puupuu o faalapotopotoga taitasi o le Ekalesia. Mulimuli ane, na ma o atu ai i le fale faafiafia ma aumai ni tamaitusi e uiga i le Toefuataiga, talafaasolopito o aiga, faaipoipoga e faavavau, ma isi autu o le talalelei. Na fai mai Peleta, “Ou te talitonu i le mea lenei!”
I le Aso Sa sa auai o ia i le lotu. I le Aso Gafua sa auai o ia i se galuega fesoasoani o Mamona Lima Fesoasoani.
O le fatu na totoina i le loto o Peleta, sa tuputupu ae i aso taitasi e mavae atu. Sa amata ona suia ona mausa ina ia ogatasi ma polaoiga ma sa lei umi ae papatisoina.
O le taimi nei, i ni nai tausaga mulimuli ane, e fai mai lava o ia e uiga i lona fiafia i le mauaina o le talalelei moni, ma lona faafetai ona sa ou fesoasoani i lona mauaina.
O le tele o taimi e faigata ai ona talanoa i tagata e uiga i le talalelei, ae afai tatou te tatalo, suesue i tusitusiga paia, faalogo i le Agaga Paia, ma naunau e talanoa atu i se tasi, o le a fesoasoani le Alii ia i tatou.