Na o le Lua Papatisoga?
Thomas R. Coleman, Kansas, ISA
Ata na tusia e Allen Garns
A o ou auauna atu o le peresitene o le Misiona a Kuatemala Aai o Kuatemala, sa ma maua ai ni nai faifeautalai fou. A o ou faailoa atu au lava i nei faifeautalai, sa ou faamatala atu ia i latou le tala i lou liliu mai ma [lou] papatisoga.
Sa ou faamatalaina o Elder David Tree ma Wayne Matthews sa aoaoina au i le talalelei ina ua iva ou tausaga ma ou nofo i Glendive, Montana, ISA. Sa ave atu au e faifeautalai e toalua ma se tagata o le Paranesi a Glendive i Williston, Dakota i Matu, ISA, i se aso malulu i le 1957, ina ia mafai ona ou papatiso i le faatanoa mo papatisoga a se falelotu iina.
Ina ua uma ona faamatala atu lau tala, ma ou faatalanoaina faifeautalai fou, sa fai mai se tasi o i latou, o Elder Benjamin Pixton, ia te au, o lona tamamatua ia David Tree. Oka se faatei ina a manaia! Sa papatisoina e Elder Tree se tamaitiiti e iva tausaga le matua i Glendive, Montana, ma o le toeitiiti 50 tausaga mulimuli ane, na valaauina ai lena tamaitiiti e avea ma peresitene o le misiona a le atalii o lona afafine.
Ina ua o mai matua ma matuamatutua o Elder Pixton e ave o ia i le faaiuga o lana misiona, sa ou maua le fiafia i le toe feiloai ai ia David Tree. I le taimi o le matou feiloaiga, sa ou faaali atu ia te ia le Tusi a Mamona—ma se savali ma le folafolaga na ia tusia—lea na ia tuuina mai ia te au i le aso na ou papatiso ai.
Sa fai atu le tina o Elder Pixton ia te ia, sa lei talanoa tele lona tama e uiga i lana misiona. Sa ia lagonaina, sa lei faamanuiaina tele o ia ona sa na o le toalua ni tagata na ia papatisoina: o se tamaitai nofofua ma se tamaitiiti e iva tausaga le matua.
I le agaga faafetai sa ou fai atu ai ia te ia, ona o ana taumafaiga, na iu ai ina auai uma lou aiga i le Ekalesia, ma o maua ma lou uso, faatasi ma o ma atalii e toaiva, na auauna atu faamisiona. Ona o lana auaunaga faafaifeautalai, sa ou fai atu ai, e le mafaitaulia tagata na aoaoina i le talalelei ma auai ai i le Ekalesia.
E toatele ni alii lelei, agavaa, ma tuuto na umia le perisitua, sa vaaia au i tausaga o lou tamaitiiti ma lou talavou, e amata atu ia Elder Tree ma lana soa o Elder Matthews. O le a ou faafetai e le aunoa ona sa laua aoaoina au i le talalelei a Iesu Keriso ma aumai au i le malo o le Alii, lea ua le mafuatiaina ona Ia faamanuiaina ai au.