O Le Olioli o le Galuega o Talafaasolopito o Aiga
Saunia e Elder Quentin L. Cook
O Le Korama a Aposetolo e Toasefululua
Mai se saunoaga, “Our Father’s Plan Is about Families,” na tuuina atu i le Konafesi o Talafaasolopito o Aiga a le RootsTech i le 2015, i le Aai o Sate Leki, Iuta, i le aso 14 o Fepuari, 2015. Asiasi i le RootsTech.org e aoao atili ai e uiga i le konafesi a le RootsTech i le 2016.
Ua faamanino mai e le folafolaga a Elia e faapea, ua i ai ia i tatou taitoatasi se matafaioi i augatupulaga na muamua atu ia i tatou ma tupulaga e mulimuli mai ia i tatou.
Ia aua lava nei galo o talafaasolopito o aiga—ma sauniga o le malumalu ua mafai ona faia ai—o se vaega taua o le galuega o le faaolataga, ma o le auai ai i lenei galuega paia mo e ua maliliu, e faamanuia ai olaga o e o loo soifua. E faamalosia ai lo tatou faatuatua i le, ma le tuuto atu i le talalelei, e fesoasoani tatou te tetee atu ai i faaosoosoga, e aumai vavalalata faatasi ai o tatou aiga, ma faamalolosia ai a tatou uarota ma siteki.
Ou te manao e faamamafa atu le “su’e, ave, ma le aoao” o le galuega o talafaasolopito o aiga. O le su’e, o lona uiga ia faaaoga le uepisaite a le FamilySearch po o le O Lo’u Aiga: O Tala e Aumaia Faatasi ai i Tatou tamaitusi1 e su’e ai le igoa o le tasi pe sili atu foi o ou tuaa po o a latou fanau. Ona ave lea o nei igoa i le malumalu, po o le faasoa atu [o na igoa] i isi ina ia mafai ona latou avea. (Afai e mafai, ia o i le malumalu o se aiga.) O le mea mulimuli, aoao lou aiga ona aoao lea o isi ia faia foi lena mea.
Ata na tusia e Brad Teare; ata na tusia e Welden C. Andersen, Alexander Borges ma Les Nilsson
O le fuafuaga a lo Tatou Tama e faatatau i aiga, ua faatusaina i se laau tele. Ina ia ola ma tupu le laau, e manaomia ai uma ona aa ma lala. E faapena foi le tatau ona tatou fesootai atu i o tatou aa—o tatou matua, matua o matua ma isi tuaa—faapena foi i o tatou lala—o a tatou fanau, fanau a fanau, ma isi fanau. O loo faaaoga e ni nai mau faagaeetia le talafaatusa o se laau ma aa ma lala e faatusa i le aiga (tagai i le Isaia 11:1; Iakopo 5).
O Le Misiona a Elia
Na valoia e le perofeta o Malaki, i le tusi mulimuli o le Feagaiga Tuai, se taimi o le a toe foi mai ai i le lalolagi ia Elia le perofeta “a o lei oo mai le aso o Ieova e sili ma le matautia … [e] faaliliuina loto o matua i fanau, ma loto o fanau i o latou matua, nei ou alu atu ma ou taia le nuu i le faafanoga” (Malaki 4:5–6).
Ina ua faaali mai le agelu o Moronae i le [taulealea] e 17 tausaga le matua o Iosefa Samita i le 1823, na ia sii mai nei lava fuaiupu e tasi mai le Malaki ae na eseese lo latou tuuina mai. Na fai mai Moronae i lena po o Setema:
“Faauta, o le a ou faaali atu ia te outou le Perisitua, e ala i le lima o Elia le perofeta, ae lei oo mai le aso tele ma le matautia o le Alii.
“… Ma o le a ia totoina i loto o fanau folafolaga na faia i tamā, ma o le a liliu atu loto o fanau i o latou tamā. Afai e lē faapea, o le a faaumatia atoa le lalolagi i lona afio mai” (Iosefa Samita—Talafaasolopito 1:38–39).
E faafa ona ta’u mai e le agelu o Moronae ia upu a Malaki i le taulealea o Iosefa.
Vaai faalemafaufau pe ana faapea, na pau le mea sa tatou iloa e uiga i lenei perofeta maoae, o mea ia sa iloa e Iosefa Samita mai i le Tusi Paia. Mai lena tusi o tusitusiga paia ua tatou iloa ai, sa soifua Elia i se vaitaimi o le atuatuvale, toeitiiti lava 900 tausaga a o lumanai le soifua mai o Keriso. O le au amioleaga e toalua o Aapo ma Isabela, sa nofotupu i le amioleaga o se tupu ma se masiofo i Isaraelu, sa uunaia le mataupu o le tapuai i le atua sese o Paala ma le fasiotia o perofeta a le Alii, faapea ai ma isi tagata.
O Elia o se perofeta maoae. E taliaina e le au Kerisiano ma le au Iutaia i le lalolagi atoa le tala ia Elia i le Feagaiga Tuai.
Ua tusia i tusitusiga paia le ala na faasaoina faavavega ai le soifua o Elia, ma le ala na ia faasaoina ai se fafine ua oti lana tane mai le oge, ma faatu mai lana tama tama mai le oti (tagai i le 1 Tupu 17). O loo faamatala e Elia le ala na faamautinoa atu ai ia te ia e “se leo filemu ma le itiiti” e faapea, sa le na’o ia i lona tuuto atu ia Ieova (tagai i le 1 Tupu 19:4–14). Mulimuli ane, na liuaina Elia ma aveina atu i le lagi e aunoa ma le tofo i le oti (tagai i le 2 Tupu 2:7–12).
Faamatalaga mai le O Le Liuaina, saunia e Carl Heinrich Bloch
E na o faaaliga i onapo nei, na faaali mai ai le matafaioi atoa a Elia. O ia le perofeta mulimuli na umiaina le mana faamau o le Perisitua Mekisateko a o lei oo i le vaitaimi o Iesu Keriso. Faatasi ai ma Mose, sa faaali atu o ia i le Faaola ma Peteru, Iakopo, ma Ioane i le Mauga o Liua i le taulotoaiga o taimi (tagai i le Mataio 17:1–4; Mareko 9:2–5). I le avea ma se elemene taua o le Toefuataiga, sa faaali mai ai Elia ia Iosefa Samita ma Oliva Kaotui i le 1836 i le Malumalu o Katelani. O iina, sa ia toe fuatai mai ai ki o le mana o faamauga, o le taimi lenei mo faamauga o aiga i lenei tisipenisione, o le faataunuuga o le valoaga a Malaki (tagai i le MF&F 110:13–16). Ona na auina mai Elia i lenei tisipenisione, ua avanoa ai le atoatoaga o le faaolataga i e o soifua ma e ua maliliu.
O le misiona a Elia ua faafaigofieina e le mea ua ta’ua i nisi o taimi o le agaga o Elia, lea na aoao mai e Peresitene Russell M. Nelson, o le Peresitene o le Korama a Aposetolo e Toasefululua, o “se faamaoniga o le Agaga Paia e molimau mai i le natura paia o le aiga.”2 O le pogai lena e masani ai ona tatou ta’ua faaaliga a le Agaga Paia e faatatau i le talafaasolopito o aiga ma galuega faalemalumalu o le agaga o Elia.
O i latou o e ua maliliu muamua atu ia i tatou, tatou te faitau i le Mataupu Faavae ma Feagaiga e faapea “o i tatou e aunoa ma i latou e lē mafai ona faaatoatoaina; pe mafai foi ona faaatoatoaina i latou e aunoa ma i tatou” (MF&F 128:18). O le a le uiga o lenei mea? Tatou te maua le tali i tusitusiga paia:
“Ma o lenei, o’u uso e, ma tuafafine pele e ma alofaina, tuu mai ia te a’u e tauina atu ia te outou o mataupu autu nei e faatatau i e ua maliliu ma e o ola e lē mafai ona tatou ala māmā atu ai i luga, e faatatau i lo tatou olataga. Ona o lo latou olataga ua tatau ma taua tele mo lo tatou olataga, e pei ona faimai Paulo e faatatau i tamā—e faapea e lē mafai ona faaatoatoaina o i latou e aunoa ma i tatou—pe mafai foi ona faaatoatoaina i tatou e aunoa ma o tatou tagata maliliu” (MF&F 128:15; faaopoopo le faamamafa).
“O lo latou olataga ua tatau ma taua tele mo lo tatou olataga” o le faaolataga o le aiga atoa o tagata e felagolagoma’i ma fesootai—e pei o a’a ma lala o se laau tele.
Fai se Faatasiga mo le Gafa o le Aiga
O fuafuaga ma faamoemoega faaleaiga e tatau ona i ai i le pito i luga o a tatou lisi o mea e ave i ai le faamuamua. O le a latou puipuia lo tatou taunuuga paia. Mo le amataina e aiga o a latou galuega o talafaasolopito o aiga, ou te luiina i latou e fai le mea ou te ta’ua o se “Faatasiga mo le Gafa o le Aiga.” E tatau ona avea lenei mea o se taumafaiga faifai pea. E mafai e tagata uma ona aumai i nei faatasiga ia talafaasolopito, tala, ma ata o le aiga o loo i ai, e aofia ai meatotino faapelepele a matua o matua, ma matua. O le tamaitusi O Lo’u Aiga e mafai ona faaaogaina e fesoasoani e faamaumau ai faamatalaga, tala, ma ata o le aiga, lea e mafai ona sii atu i le Gafa o le Aiga i luga o le FamilySearch.org.
Ae peitai, o lenei taumafaiga e le mafai ona faia i le na o se taimi se tasi. E manaomia ai le maelega i le olaga atoa. Mo i latou o loo sailia ni auala e sili atu ona aoga e faamamalu ai le aso Sapati o se aiga, o le faanatinatia o lenei galuega paia o se auala lelei lea [e faamamalu ai].
O le nofoaga autu o talafaasolopito o aiga o le aiga. E tatau ona tatou fesoasoani i o tatou tagata talavou e atiina ae se fiafia i lenei galuega. O le toatele o o tatou tagata talavou ua uma ona faaliliuina o latou loto i o latou matua. E fiafia o tatou tagata talavou e aoao e uiga i olaga o tagata o aiga—po o fea na latou o mai ai ma pe na faapefea ona latou ola. O nisi e matuai fiafia lava i le galuega, o lea e galo ai ia i latou le taimi ma e faanoanoa pe ua oo i le taimi e faamuta ai.
E fiafia tagata talavou i tala ma ata, ma o le taimi nei ua faifogie ona latou maua le tomai faatekinolosi e faasao ai na mea e manatua i le Gafa o le Aiga i luga o FamilySearch.org. E mafai ona latou su’ea tagata o le aiga o loo manaomia sauniga o le malumalu e ala i se aafiaga fou faatoa faamatuu mai o le “record-hinting [talafaamaumau-faaiteite]” i luga o le FamilySearch.org.3
O nei talafaamaumau e faaiteite mai i tagata o aiga, ua mafai ona tupu ona o taumafaiga faasinoupu [indexing] a tagata o le Ekalesia i le lalolagi atoa. O nei talafaamaumau—ma e faitau miliona i latou—o le a fesoasoani e te maua ai tuaa e toatele o e atonu e lei sosooina atu i lou aiga, ma o e e manaomia ona faataunuu sauniga mo i latou i malumalu. O isi talafaamaumau mai le lalolagi atoa ua i ai le tekinolosi faaiteite i luga o uepisaite ua aofia ai le, Ancestry.com, Findmypast.com ma le MyHeritage.com, lea e mafai ona faaaoga fua e tagata uma o le Ekalesia.
E ui o le nofoaga autu o talafaasolopito o aiga o le aiga, ae o le a faaauau pea ona tuuina atu e le Ekalesia ia nofoaga autu o talafaasolopito o aiga, lea e mafai ai e aiga ona maua faatasi o latou tuaa, ma mafai ona faaaoga le Initoneti pe afai e le faigofie ona maua i le fale.
O tagata agavaa uma o le Ekalesia o vaitausaga 12 ma luga atu, e mafai ona maua se pepa faataga o le malumalu e faatapulaa ona faaaoga, e faataunuu ai papatisoga mo e ua maliliu pe a uma se faatalanoaga ma se tasi pe toalua o taitai faale-ekalesia. O lenei mea e aofia ai uma ma tagata fou liliu mai.
O se fiafiaga le i ai o se pepa faataga ua sainia lea e mafai ona e faaali atu i soo se malumalu. O se pepa faataga ua tuuina mai ai foi ma se puipuiga paia. I le avea ai ma Peresitene o le Korama a Aposetolo e Toasefululua, na saunoa ai Peresitene Boyd K. Packer (1924–2015):
“E leai se isi galuega e sili atu ona avea ma puipuiga i lenei Ekalesia nai lo galuega o le malumalu, ma le sailiga o talafaasolopito o aiga lea e lagolago i ai. E leai se isi galuega e sili atu ona faaleleia ai faaleagaga. E leai se isi galuega o loo tatou faia tatou te maua atili ai le malosi. E leai se isi galuega e manaomia ai se tulaga maualuga atu o le amiotonu.
“O a tatou galuega i le malumalu e ufitia ai i tatou i se ufifatafata ma se puipuiga, i le avea ai ma ni tagata taitoatasi faapea ma se nuu.”4
O la Tatou Matafaioi i o Tatou Tuaa
O le talafaasolopito o aiga o se mataupu faaleaiga, ae e le o tagata uma o le aiga e tutusa le tulaga latou te feagai. O le toatele o o tatou tuaa ua maliliu ae le’i faaipoipoina pe maua ni fanau. O nisi ua tatala faaipoipoga, ae o isi ua faafia ona faaipoipo. O le toatele sa i ai ni fanau sa i ai manaoga faapitoa po o e na maliliu o laiti. E tofu tagata uma ma se tala.
O tagata uma lava, soifua po o ua maliu, o le e mafai ona faamasinoina mo ana lava amioga, e manaomia le faamanuiaga o sauniga paia o le malumalu, ma e mafai ona tatou fesoasoani i tagata o o tatou aiga ia latou mauaina. E le afaina pe e te nofofua, pe o lau tane po o le ava e le toaga i le lotu, po o oe lava foi ia e le toaga i le lotu, po o se tagata foi o le Ekalesia, e mafai foi ona e fesoasoani i le faaolataga o agaga. E le toe i ai se galuega e sili atu le taua, faamalieina, ma le matagofie.
Ata na tusia e Robert Barrett
O le taitai o lenei galuega o lo tatou Alii ma le Faaola, o Iesu Keriso. Ina ua mavae Lona maliu, sa Ia tatalaina le faitotoa i le falepuipui lea na taofia ai tagata ua maliu:
“Sa faatutu e ia mai totonu o e amiotonu, ana au ma tofia avefeau, ua faaofuina i le mana ma le pule, ma sa tofia i latou e o atu ma avatu le malamalama o le talalelei ia te i latou o e sa i ai i le pouliuli, i agaga lava o tagata uma. …
“Ma sa o atu avefeau filifilia e talai atu le aso talitali o le Alii ma folafola atu le saolotoga i e ua faatagataotauaina o e ua noanoatia, e oo lava ia i latou uma o e ua fia salamo mai ia latou agasala ma talia le talalelei” (MF&F 138:30–31).
E faigofie lava la tatou savali, ae e loloto. E le manaomia ai se faigalauga maotua po o mataupu faavae faigata. E faatatau i le i ai o se loto momomo ma se agaga salamo, ma se tautinoga e mulimuli i lo tatou Faaola.
I le avea ai ma se Aposetolo a le Alii o Iesu Keriso, ou te folafola atu, afai e te vaavaai i tala atu o noataga o le olaga nei ma le olaga faitino, ae fesoasoani ia i latou o e e le mafai ona fesoasoani ia i latou lava, o le a faamanuiaina oe i le vavalalata atili ma le olioli i lou aiga, faapea ma le puipuiga faalelagi ua tuuina mai ia i latou o e e faamaoni i Lana galuega.
Ua faamanino mai e le folafolaga a Elia e faapea, ua i ai ia i tatou taitoatasi se matafaioi i augatupulaga na muamua atu ia i tatou ma tupulaga e mulimuli mai ia i tatou. Talosia ia maua e outou o matua, le autalavou, ma tamaiti le olioli ma ia faamanuiaina i isi vaega uma o lou olaga a o e faataunuuina le matafaioi na auina mai le lagi, ina ia auai i le galuega paia mo e ua maliliu.