Seia Tatou Toe Feiloai
Maoae Moni
E le manaomia ona tatou vaai mamao e iloa ai toamagumagu e le o matauina ma ua faagaloina o le olaga i aso taitasi.
Talu ai e le o utuva lo tatou faalogo pea i le faauigaga e le lalolagi o le manuia ma le maoae, ua malamalama lava, atonu e tele taimi tatou te faia ai ni faatusatusaga i le va o ituaiga tagata ua tatou i ai ma ituaiga tagata ua i ai isi, pe e foliga mai o loo i ai, faapea foi ma le va o mea ua tatou maua ma mea ua maua e isi. … E masani ona tatou faatagaina faatusatusaga lē talafegai e faatamaia ai lo tatou fiafia, pe a mafua ai ona tatou lagona le le faamalieina po o le le agavaa po o le le faamanuiaina. O nisi taimi, ona o nei lagona, e faapea ona taitai atu ai i tatou i le sasi ma nopiai i o tatou toilalo ae faagalogalo i vaega o o tatou olaga atonu o i ai elemene o le maoae moni. …
… E moni o loo aofia ai mea e ao ona faia ina ia mafai ona avea ai ma se tamā lelei po o se tina lelei, ae, i le vaaiga lautele, o loo i ai foi le faitau afe o mea laiti ma galuega o auaunaga ma le ositaulaga, o loo faavae ai le tuuina atu po o le foai atu o le ola o se tasi mo isi ma mo le Alii. E aofia ai le mauaina o se malamalamaaga i lo tatou Tama o i le Lagi ma Lana talalelei. E aofia ai le aumaia o isi i le faatuatua ma fegalegaleaiga i Lona malo. O mea nei e le masani ona amanaia pe faaeaea i ai le lalolagi. …
E moni lava e le manaomia ona tatou vaai mamao e iloa ai toa e le o matauina ma ua faagaloina o le olaga i aso taitasi. O loo ou tautala e uiga ia i latou ua outou silafia ma i latou ua ou iloa o e faia ma le le leoa ma i taimi uma ia mea e tatau ona latou faia. O loo ou tautala e uiga ia i latou e avanoa i taimi uma ma naunau i taimi uma. O loo ou faatatau atu i le lototoa e masani ai o le tina o lē—o le a nofo ma tausi se tamaitiiti mai i lea itula ma lea itula, i le ao ma le po—po o le tagata e i ai manaoga faapitoa o loo tauivi ma mafatia e aunoa ma se faasēā. O loo ou faaaofia ai i latou o e e volenitia i taimi uma e foai atu [o latou] toto. … O loo ou mafaufau ia i latou o e atonu e le avea ma ni tina ae ui i lea o loo “faatina” i tamaiti o le lalolagi. O loo ou tautala ia i latou o e e i ai i taimi uma e alofa atu ma faafailele.
O loo ou tautala atu foi e uiga i faiaoga ma tausi soifua ma faifaatoaga ma isi o e faia le galuega lelei o le lalolagi, o e aoao ma fafaga ma faalavalava, e le gata i lea, ae o e foi, e faia le galuega a le Alii—o i latou o e sii ae ma alofa atu. O loo ou faasino atu ia i latou o e faamaoni ma agalelei ma galulue malosi i a latou galuega o aso faisoo, ae o i latou foi o ni auauna a le Matai ma leoleo o Ana mamoe. …
Ia i latou o e o loo faia le galuega masani a le lalolagi, ae o loo tau mafaufau i le taua o mea ua latou ausiaina; ia i latou o e galulue malosi o lenei Ekalesia, o e o loo faalauteleina le galuega a le Alii i le tele o auala le leoa ae taua; ia i latou o e o le masima o le lalolagi ma le malosi o le lalolagi ma le ivitu o atunuu taitasi—ia te outou, tau lava o le faailoa atu o lo matou faamemelo. Afai tou te tumau e oo i le iuga, ma afai tou te lotototoa i le molimau ia Iesu, o le a outou ausia le maoae moni ma o le a [outou] nonofo i le afioaga o lo tatou Tama o i le Lagi.