Tatou te TALANOA ia Keriso

Faamagaloina o La’u Tane Muamua

Taofia le igoa

O le suesue i le faataitaiga a Keriso e uiga i le alofa ma le faamagalo atu, sa fesoasoani i le faatoilaloina o le tiga na ou lagonaina ina ua tatala la’u faaipoipoga.

Adult woman holding scriptures as she studies. The background is black.

Ina ua tupu ia te a’u se tulaga ou te le’i masani ai, o le feagai ma se teteaga ou te le’i manao i ai, sa ou oo i le tiga ma le teenaina lea ou te le’i oo muamua lava i ai. Sa 40 ma ona tupu tausaga o lo’u matua, [ma] tuua toatasi e faauma le tausiga o la’u fanau talavou, [sa] i ai sa’u galuega tumau, ma totogi le mokesi. Sa ou lagonaina le lofituina, vaivai, ma le popole, ae na matele lava i le faatumulia i le tiga aupito sili ona matuitui ua ou oo i ai.

Ona o lo’u faavae i le talalelei ma lo’u naunau e ola amiotonu, sa ou iloaina ai, e tatau lava ona ou faamagalo atu i la’u tane muamua. Sa ou iloaina sa taua le aua ne’i ou faitio e uiga ia te ia i luma o tamaiti, ae o le a faapefea ona te’a ma a’u na lagona o le teenaina lea sa ou fia tagi ee ai i le ita?

O aso fai soo i taimi ou te ita ai, ou te liliu atu ai i tusitusiga paia, e saili le taitaiga mai le Agaga. Sa ou sailiili ma le filiga i le ao ma le po. Sa manaomia ona ou iloa po o le a se mea e mafai ona ou faia i lenei fetaulaigaala e le masani ai lo’u olaga, e mulimuli i le faataitaiga a le Faaola, e faalogo ma usitai i Lana valaau e mulimuli atu ia te Ia.

A o ou suesue i tusitusiga paia, sa ou tusia i lalo uiga auaumama taitasi o Iesu Keriso, na ou manao e atiina ae i lo‘u lava olaga. Sa ou faamaumauina aoaoga mai tala ma faataoto ia na Ia faasoa mai i le taimi o Lana auaunaga faaletino. Sa ou tusia mea na tautala mai i lo’u loto e uiga i le faamagalo atu. Sa ou tusia ma le maelega i lau api ia faigata ma tofotofoga na feagai ma le Alii ma auala na Ia faatoilaloina ai.

I le aluga o taimi na ou iloaina ai o Ona tiga, sa sili atu ona ogaoga nai lo o a’u, ae sa Ia faamagaloina i latou o e sa faatiga ia te Ia. O Ia o se faataitaiga atoatoa. O lena tamai api, ua tumu i lesona mai le soifuaga o le Alii, na avea ma se punavai o le malosi tele ia te au. Sa avea ma au maea faaola. O le mulimuli ai i Lana faataitaiga, sa ou naunau ai e onosai i ou tofotofoga i le lelei ou te mafaia ai. Sa ou naunau e agai i luma mai i ou tiga.

Sa aoga! O lenei la i ni nai tausaga mulimuli ane, ua faamanuiaina au i le i ai o se sootaga lelei ma lau tane muamua. E ui lava ua toe faaipoipo o ia, ae ua lelei lava ma ua leai se tiga o le ma sootaga i le avea o ni matua i le ma fanau. E ala i le mulimuli i le faataitaiga a Keriso o le le faitioina o ia, sa ou faatoilaloina ai lagona le lelei o le tiga ma le teenaina. Ua mafai ona ou alofa!

Oka se lesona ina a taua na ou aoaoina i le taimi o lenei tofotofoga ogaoga. Ou te faafetai mo le faataitaiga atoatoa a lo’u Faaola. O Ia o lo’u papa ma lo’u faavae. Ma ou te le lagonaina lava le tuua na o a’u. O loo i ai ia te a’u Lona alofa, Lana Togiola, Lana faataitaiga atoatoa, ma le alofa ma faamanuiaga a se Tama Faalelagi peleina.

Faamagalo Atu: O Le Ute o le Talalelei

“O se agaga o le faamagalo atu ma se uiga faaalia o le alofa ma le agaalofa ia i latou o e atonu na faia ni mea sese ia i tatou, o le aano tonu lea o le talalelei a Iesu Keriso. E manaomia e i tatou taitoatasi lenei agaga. E manaomia e le lalolagi atoa. Na aoaoina mai e le Alii. Sa Ia faataitaia [i se ala] e leai se isi lava [tagata] ua ia faataitaia.”

Peresitene Gordon B. Hinckley (1910–2008), “Ao Outou e Ao ona Faamagalo Atu,” Liahona, Nov 1991, 2.

E mafai faapefea ona fesoasoani le suesueina o tusitusiga paia ia i tatou i taimi o tofotofoga?

“E mafai e mau ona faatoafimalieina se agaga vevesi, tuu atu le filemu, faamoemoe, ma se toefuataiga o le talitonuina o gafatia o se tagata e faatoilalo ai luitau o le olaga. Ua i ai ia i latou se mana malosi e faamalolo ai luitau faalelagona pe afai o i ai le faatuatua i le Faaola” (Richard G. Scott, “O Le Mana o Tusitusiga Paia,” Liahona, Nov. 2011, 6).

Mafaufau e fai le mea na faia e lenei tuafafine ina ia manumalo ai i lona tofotofoga: suesue i tusitusiga paia e vaavaai mo uiga auaumama o le Faaola ma isi tagata faamaoni. O a latou faataitaiga e mafai ona fesoasoani ia te oe i ou luitau po o fesili. Afai ua e iloa le autu e te manao e suesue—mo se faataitaiga, “Tumau,” “Faamagalo Atu”, po o le “Onosai”—e mafai ona fesoasoani le Taiala i Tusitusiga Paia e fautuaina atu ni nai mau e amata ai.