Tatalo ma le Manatu Moni I Ai

Carlos Rene Romero, El Salvador

I le 1960, sa ou feiloai ai i se alii talavou i se pati o lē na fai mai ia te au, sa asiasi atu Iesu Keriso i le Atu Amerika ina ua mavae Lona Toetu. Sa ou faapea o se manatu manaia tele, ma sa ou fia iloa atili, o lea na amata ai ona ou suesue i faletusi ma fesilisili i aulotu i tapuaiga eseese i lou nuu o San Miguel, El Salvador.

Na toeitiiti atoa le tolu tausaga o ou saili, ae na leai se mea na ou mauaina. Ina ua ou tauina atu i taitai faalelotu na ou faalogo i le oo mai o Keriso i le Atu Amerika, sa latou fai mai na faaseseina au. Ona sa leai ni faamatalaga na ou mauaina i lau sailiga, o lea na iu ai ina ou talitonu na sao i latou.

I se tasi aso, na o mai ai i lou fale ni faifeautalai se toalua mai Le Ekalesia a Iesu Keriso o le Au Paia o Aso e Gata Ai, ma fai mai sa i ai se la savali taua mo lou aiga. Sa vave lava ona ou fesili i ai, “E te lua iloa pe na afio mai Iesu Keriso i le Atu Amerika?”

Sa fai mai se tasi o i laua, “Ma te molimau atu i lena mea.”

I lena taimi sa ou lagonaina ai se fiafiaga sili i lou mafaufau ma lou loto ma fesili atu, “E Faapefea ona e iloa lena mea?”

Sa ia aveese mai se tusi mai lana ato ma fai mai, “Ua ma iloa na afio mai Keriso iinei ona o le tusi lenei, o le Tusi a Mamona.”

O le mea na tau mai e faifeautalai ia te au i le taimi o le lesona muamua sa ou le mautonu ai, ma sa ou le talitonu i le tala i le faaaliga a le Perofeta o Iosefa e uiga i le Tama ma le Alo.

Ae peitai, sa ou fiafia i le Tusi a Mamona, ma sa faaauau ona aoao au e faifeautalai. I se tasi aoauli sa laua fesili mai ai, “Ua e tatalo ea ina ia iloa ai pe moni mea ua ma aoao atu?”

Sa ou fai atu ia i laua, sa ou tatalo ae e lei maua lava se tali.

“E tatau ona e tatalo ma le manatu moni i ai,” sa la fai mai ai.

Sa ou faitauina le Tusi a Mamona mo ni nai po. Sa ou faitau ma talitonu i le faaali mai o Keriso i sa Nifae. Ae sa ou le talia lava le faaaliga a Iosefa Samita. Sa faaletonu lava lau tauiviga i le loto.

I se tasi po na ou tootuli ai na o au ma tatala atu lou loto i le Atua. Sa ou fai atu ia te Ia, e manaomia ona ou iloa pe na Ia faaali moni mai o Ia lava ia Iosefa Samita. Afai sa Ia faaali mai, sa ou folafola atu ia te Ia, o le a ou papatiso i le Ekalesia ma auauna atu ia te Ia i lou olaga atoa.

Ina ua ou alapo ae i le taeao na sosoo ai, na oo mai le tali ia te au e ala i le Agaga Paia. Sa manino lou mafaufau ma sa faatumulia lou loto i le toafilemu. Mai lena lava taimi e oo mai i le taimi lenei, e lei toe i ai lava se mea na ou le talitonu ai o Iosefa o se perofeta moni a le Atua, ma o le Tusi a Mamona o se tasi molimau ia Iesu Keriso, ma o Iesu Kreiso o lo tatou Faaola ma le Togiola. Ua ou iloa na afio mai Keriso i le Atu Amerika ina ua mavae Lona Toetu. Ua fiafia lou agaga i lenei malamalama ofoofogia na aoaoina ai au e le mana o le Agaga Paia.