Auaunaga i le Ekalesia
Sa Ma Filifili e Auauna Atu
E alala le tusitala i Bavaria, Siamani.
Sa tauivi lou toalua ma le kanesa, ae sa ma’ua taliaina e aunoa ma le faalotolotolua le valaau e auauna atu i le Malumalu o Frankfurt Siamani.
Ata na tusia e Ben Sowards
I le aso 12 o Tesema, 1994, sa ma maua ai se valaau i le telefoni mai le Aai o Sate Leki. Sa faapea mai se leo agalelei, sa fia saunoa mai Peresitene Thomas S. Monson, a’o auauna ai i le taimi lena o se Fesoasoani Lua i le Au Peresitene Sili, ia i ma’ua.
“Ua finagalo le peresitene o le Malumalu o Frankfurt Siamani e valaau oe e avea ma ona fesoasoani ae o lou faletua e avea ma se fesoasoani i le faatina o le malumalu,” o le saunoaga lea a Peresitene Monson i lo’u toalua o Gerhard. Ona faailoa mai lea e Peresitene Monson ni atugaluga e uiga i le soifua maloloina o lo’u toalua.
E 11 tausaga o tauivi Gerhard ma le kanesa o sela papa’e o le toto. E ui lava i lena luitau, sa valaauina lava i ma’ua e le Alii, ma sa ma’ua tali atu ioe e aunoa ma le faatali.
Ina ua ou faamavae mai la’u galuega e saunia e auauna atu, sa fesili mai lo’u pule, “Pe mafai ona ou taofia oe pe a ou siia lou totogi?”
“Leai, e tatau ona ma o,” sa ou tali atu ai, ma ta’u atu ia te ia, sa ma folafola atu i le Alii o le a ma auauna atu i se misiona. “Sa ma fuafuaina e auauna atu mo ni tausaga se lua, ae ou te le iloa pe o le a ola pea lo’u toalua i lena taimi.”
Ina ua faia se siaki masani a Gerhard a’o le’i atoa se lua vaiaso mulimuli ane, sa fai mai le fomai ia te ia, “Nofo iinei; e maualuga lava le tulaga lamatia e te oti ai [pe a e alu].”
Sa faateteleina le faaletonu o le tulaga o lona soifua maloloina. Sa matuai o ma faanoanoa lava, ma sa le mafai ona ma iloa, pe o le a faapefea ona faataunuu lo ma’ua valaauga, ae sa tumu i ma’ua i le faatuatua, faamoemoe, ma le faamautinoaga. Sa ma’ua tuu atu mea uma i aao o le Alii. Afai na i ai Sana galuega mo i ma’ua, o le a Ia faia foi se auala mo i ma’ua e faataunuu ai.
I le aso 2 o Ianuari, 1995, sa ma’ua o ai i le ma misiona. Na faafuasei ona ou iloaina ia mea na ou tuua: o lo’u tina, la’u fanau, fanau a la’u fanau, la’u galuega, lo’u fale, ma la’u togalaau. Ae o le aso na sosoo ai sa ma’ua saunia e auauna atu i le Malumalu o Frankfurt, lea na avea ai se po pogisa o se aso fou matagofie mo i ma’ua. O mea uma sa popole ai i le olaga i aso uma, sa o ese atu ma i ma’ua.
I lenei nofoaga paia sa ma maua ai le alofa, malamalama, faamoemoe, fiafia, talitonuina, mafanafana, saogalemu, puipuiga, ma le filemu lea e susulu mai i lo tatou Faaola. A o ma’ua auauna atu, sa ma feiloai ai i tagata lelei mai le tele o atunuu. E ui ina eseese gagana sa latou tautatala ai, ae sa fusia i matou i le gagana o le alofa. O le ma auaunaga i le malumalu na ma matuai fiafia ai lava.
O le agaga o le malumalu ma le malosi o le Atua na sapasapaia ai si o’u toalua mo masina e 26. I se tasi aso a’o lei leva ona faamalolo i ma’ua mai lo ma valaauga i le malumalu, sa alu ai Gerhard i le falema’i mo lona togafitiga masani. O le taimi la lenei, sa taofi ai o ia iina e fomai. I ni nai masina mulimuli ane, sa toe foi atu ai o ia i lona aiga i le lagi.
Pe a ou toe tepa i tua, ou te mafaufau i na tausaga o auaunaga i le malumalu o se meaalofa mai le lagi—o le auauna atu faatasi ma lo’u toalua i le maota o lo tatou Tama agaalofa, a’o ma faataunuuina la ma’ua folafolaga e auauna atu faatasi i se misiona. Ou te faafetai ma lo‘u loto atoa mo lena aafiaga.