Mafuaaga e Taua ai le Faauuga o le Inisitituti
E mafai ona faaleleia atili lou aoaoina o le talalelei a o e aveina ia vasega faavae fou e fa o le inisitituti.
“O le mea ua tatou manaomia nei o le tupulaga silisili o talavou matutua i le talafaasolopito o le Ekalesia,” o le saunoaga lea a Elder M. Russell Ballard o le Korama a Aposetolo e Toasefululua i le autalavou matutua i le konafesi aoao ia Aperila 2015. “O talavou matutua ua tatau ona lesitala i se inisitituti o mataupu faalelotu. O vasega … inisitituti o le a maua ai le paleni o lou olaga ma faaopoopo atu ai i le aotauina o oe i le poto salalau, e ala i le tuuina atu ia te oe o se isi avanoa e faaalu ai se taimi e suesue ai tusitusiga paia ma aoaoga a perofeta ma aposetolo.”1
Ina ia faalolotoina malamalama o le talalelei o talavou matutua, faamalolosia a latou molimau ma tautinoga ia Iesu Keriso, ma maua le taitaiga faaletagata lava ia mo o latou olaga, ua faamamafaina ai e le polokalama o le inisitituti le manaomia ona faaleleia atili le aoaoina o talavou matutua uma. O lenei faaleleia atili ua atagia mai i ni auala tetele se tolu: e ala i le ofoina atu o ni kosi faavae fou se fa, ma e ala i le tuuina atu o le faataua sili atu i le faauu mai le inisitituti, ma e ala i le valaauliaina o tamaiti aoga uma e faia se matafaioi aoga sili atu i o latou aoaoga faaleagaga e ala i le faamaeaina o faitauga atofaina ma faavasegaga o le aoaoina.
O a ia vasega faavae fou e fa?
E ui o le a faaauauina pea ia vasega e pei o le Feagaiga Tuai, Feagaiga Fou, o le Tusi a Mamona, ma le Mataupu Faavae ma Feagaiga, ae o ni vasega faavae fou se fa ua avea nei ma ogatotonu o galuega fai o le inisitituti. Ua aofia ai le (1) Jesus Christ and the Everlasting Gospel [O Iesu Keriso ma le Talalelei e Faavavau], (2) Foundations of the Restoration [O Faavae o le Toefuataiga], (3) The Eternal Family [O Le Aiga e Faavavau], ma le (4) Teachings and Doctrine of the Book of Mormon [O Aoaoga ma Aoaoga Faavae o le Tusi a Mamona]. E pei ona fautuaina mai e igoa, o nei vasega faavae e talanoaina ai aoaoga faavae autu, talafaasolopito, ma aoaoga o le talalelei, e pei ona maua i tusitusiga paia ma saunoaga a perofeta soifua.
“[O nei vasega faavae fou] e mafai ona taitai atu ai i suesuega loloto o tusitusiga paia, nai lo o kosi e aoao faasolo ai tusitusiga paia atoa pei sa i ai i le taimi ua mavae,” o le tala mai lea a Brent L. Top, o le faaao o aoaoga faalelotu i le Iunivesite o Polika Iaga. Na faaopoopo mai Chad Webb, o le pule mo Seminare ma Inisitituti o Mataupu Faalelotu, “O tusitusiga paia e latalata lava le fesootaiga, ma a o latou tuputupu ae faatasi, o loo i ai ni malamalamaaga loloto ma malamalama ma malosiaga lea e sau mai i se suesuega o tusitusiga faavae uma.”2
E ioe i ai le tamaitai talavou lenei: “Sa ou mafaufau i le tele o mea e mafai ona ou aoaoina moni e uiga i le Toefuataiga lea ou te lei iloa, ae sa ou maua se malamalama i mataupu faavae ma autu e faatatau i ai, lea ou te lei faia muamua lava. O le kosi e aofia ai autu e pei o faaipoipoga autaunonofo, perisitua i alii agavaa uma, ma le Fasiotiga Tagata Faalealofa i Mountain Meadows. O nei talanoaga a le vasega na ou maua ai faamatalaga na faavae i le faatuatua nai lo le masalosalo. O le kosi e faatatau ai foi le Toefuataiga i mea e tutupu i le taimi nei, o lea na ou iloa ai o au moni lava o se vaega o le Toefuataiga. E le na o le Perofeta o Iosefa Samita, Peresitene Polika Iaga, ma isi paionia. O au foi!”
Aisea e tatau ai ona ou faia le faauuga o le inisitituti o se sini?
O faamatalaga nei a nisi o tamaiti aoga e uiga i le faauu mai le inisitituti:
“Sa ou faia se sini ia faauu mai le inisitituti, ma e ui ina sa ou faia ni osigataulaga se tele, na tauia au i le malamalama, atamai, ma se molimau malosi atu.”
“Ina ua uma le faauuga, sa ou lagona le malosi sili atu ma saunia mo ni aafiaga fou. O le a ou faamalosiau foi i isi ia faauu.”
“O le faauuga sa o se ausiga faaleagaga o loo uunaia ai pea au i luma i lau sini o le faaolataga e faavavau.”
A o e faaleleia atili lou aoaoina e ala i le galue agai i le faauuga, o le a e iloa ai ona faamuamua le suesueina o le talalelei ma faaleleia atili lou atamai i le talalelei. O le a e vaai ai i le lalagaina faatasi o nei upumoni i se ielalaga maoae o le molimau. Aua o le mea lava ia, o le faauuga o le inisitituti e faatatau moni i lou avea ma [tagata] malosi atu faaleagaga.