2015
Kajjitōk ko im Uwaak ko
Oktoba 2015


Kajjitōk ko im Uwaak ko

“Ke jinō ekar nan̄inmej, kōm̧ ar jitlo̧k im jar kake, bōtaab ekar mej. Ewi wāween aō pukōt aenōm̧m̧an ilo menin?”

Iien in ekabūromōjmōj ilo mour ņe am̧. Ejim̧we ke bwe en wōr kam̧ooļ im uwaak n̄an kajjitōk ko am̧ rellōn̄: “Etke ekar jab mour? In ke bar loe e? Ewi waween bwe in wōnmaanļo̧k wōt ak ilo an jab pād ituru?

Gospel eo an Jisōs Kraist ej letok jim̧or kaenōm̧m̧an im uwaak ko. Irooj ekar kallim̧ur, “em̧ōņōņō ro aolep rej būrom̧ōj, bwe naaj kaenōm̧m̧an er” (3 Nipai 12: 4). Pukōt Jetōb Kwojarjar, bwe E eo Rikaenōm̧m̧an.

Kwōj iuwōta eļan̄n̄e rōkar ron̄jake jar ko am̧. Kakkije ilo kōjatdikdik: Jemedwoj Ilan̄ aolep iien ej ron̄jaki jar ko ad. Jeje ko rekwojarjar im rikanaan ro rej mour rej kallim̧uri kōj bwe em̧ool menin. Ke Irooj ekar ba n̄an Josep Smith ej bar āinwōt iiook waj eok: “Bwe jar ko am im jar ko an ro jeiūm̧ im jatūm rekar wanlōn̄tak ilo lo̧jiln̄ū” (K&B 90:1). Ak jej aikuj keememej bwe Jemedwōj Ilan̄ ej uwaak jar ko ad kōn mour indeeo eo ej ļōmņak kake (lale Aiseia 55:8–9). En̄in unin ad ļoor waanjon̄ak eo an Rilo̧mo̧o̧r eo ilo kajjitōk kōn kōjeram̧m̧an ko ak lukkuun kajjitōk kōn bōro em̧ool bwe en ankilan wōt (lale Luk 22:42).

Men̄e epen, mālijjon̄ in emaron̄ erom juon iien n̄an am̧ eddōkļo̧k. Komaron̄ katak bwe en wōr am̧ tōm̧ak ilo karōk eo an Anij, men̄e meļeļe eo bwe jinōm ekar jab ājmourļo̧k. Aet kwaar kōņaan bwe en mour wōt. Ak mālijjon̄ eo an mour in ej n̄an lōke ilo Anij iien otemjej—eļaptata n̄e eļap an pen. Eļan̄n̄e kwoj lōke E, “aolep men ko naaj jerbal ippān doon n̄an em̧m̧an eo ami” (K&B 90:24).

Mej ej M̧ōttan Karōk in Lo̧mo̧o̧r Eo

Ekkar n̄an karōk in m̧ōņōņō eo an Jemedwōj Ilan̄ n̄an kōj, jepļaakļo̧k eo ad n̄an im̧aan Mejān ej pedped ioon mej im jerkakpeje eo, eo enaaj jipan̄ ukōt kōj jān nememen kanniōk n̄an nememen jetōb. Kwōj aikuj wōt bōk m̧ool in ke mej ej m̧ōttan wōt karōk in im tōmak bwe juon raan kwonaaj bar juon alen pād ippān jinōm. Jeļā bwe jinōm ej pād ilo laļ eo an jetōb im bwe ej kōttar eok.

David M., 18 an iiō, Western Kasai, Democratic Republic of Congo

Epād ilo Laļ eo an Jetōb

Jinō ekar bōk nan̄inmej in kānjer ruo iiō rem̧ootļo̧k. Iaar jab kōņaan lo an en̄taan, im iaar kōņaan bwe in kar jipan̄ e. Im men̄e jinō ekar em̧m̧anļo̧k an mour, ekar pen wōt n̄an n̄a. Jinōm ej pād ilo juon jikin eo ejjab maron̄ en̄jake metak ak en̄taan. Epen ilo am̧ jab bar lo e, ak kwōj jab make iaam. Epan jemļo̧k an iakwe eok, im Jemedwoj Ilan̄ ej iien otemjej pād ijen n̄an kotak eok ilo iien am̧ būromōj. Koban atajināmjen n̄an jidik. Jisōs Kraist ekar en̄taan kōn metak ko an laļ in, ejeļā am̧ en̄jake im ta eo kwoj pād kake. Kōm̧m̧ane āinwōt aō kar kōm̧m̧ane ilo iien aō ioon mālijjon̄: etal n̄ane E im Enaaj kōmeraikļo̧k eddo ko am̧.

Shilon W., 18 an iiō, Chihuahau, Mexico

Baam̧le Eo Am̧ Renaaj Bar Koba Ippān Doon

Jinō ekar mej ke ej 12 wōt aō iiō. Tōre eo ijan̄in kar membōr Kabun̄ in. Ke ekar nan̄inmej, ikar lukkuun jar bwe jinō en ājmour. Eļap aō kar tōmak, im iaar lōke ilo Anij kōn kōjatdikdik bwe ājmour eo an enaaj kar jepļaaktok. Kabūromōjmōj bwe ekar jab mour jān nan̄inmej eo an. Iaar kajjitōk etke ekar tin mej ilo an dik wōt im iļo̧k jān eō ke ij juon jodikdik wōt. Ikar illu im pād ilo juon tōre eo iaar pere ke ewōr Anij. Kiiō ke ij membōr in Kabun̄ in, imeļeļe kōn karōk in lo̧mo̧o̧r eo. Ijeļā bwe ej kōttar eō im bwe baam̧le eo am renaaj bar koba ippān doon.

Inaê L., 19 an iiō, Minas Gerais, Brazil

Mālijjon̄ Ko Rej Katakin Kōj

Jinō ekar mej jilu iiō ko rem̧ootļo̧k. Jemdoon eo am ippān Jemedwoj Ilan̄ im Rilo̧mo̧o̧r enaaj eddōkļo̧k eļan̄n̄e kwōj erre ļo̧k n̄an er ilo iien am̧ aikuj. Kwonaaj loe bwe mālijjon̄ in, komaron̄ jorrāān jān e, ak emaron̄ bar juon kōjeraam̧m̧an. Jar n̄an Jemed ilo Lan̄ kōn aenōm̧m̧an im kam̧ool in uwaak. Lōke karōk eo an Irooj n̄an eok. Jeļā bwe Jemedwōj Ilan̄ ejeļā ia eo jej iļo̧k ie ļo̧k im ta eo jej aikuji n̄an topar ijeņ. Irooj ej iakwe eok im ekōņaan bwe kwōn lan̄lōn̄. Mālijjon̄ kein ad rej n̄an katakin kōj im kōm̧m̧an bwe jen kajoor.

Meghan B., 18 an iiō, Ontario, Canada

Kwonaaj Loe E Bar Juon Alen

Jibū ekar mej ke jinō ekar 17 an iio. Baam̧le eo ekar jar im jitļo̧k kake e jejjo wiik ko m̧okta jān an kar mej. Ekar bar bōk kōjeraam̧m̧an eo an priesthood. Men eo de eo ekar leļo̧k n̄an jinō aenōm̧m̧an ej ilo an jeļā bwe enaaj kar bar lo jinen ilo mour eo tok juon. Kōttōbar eo an jinō ej n̄an mour jim̧we bwe en erreo n̄an an bok kōjeraam̧m̧an in. Iburom̧ōj bwe ijāmin bar maron̄ ioon e ilo mour in, ak ij erre m̧aanļo̧k n̄an iien eo jenaaj bar ioon doon.

Cari R., 15 an iiō, Utah, USA