2015
Aō Pukot M̧ool eo
Oktoba 2015


Aō KAPPUKŌT M̧ool eo

Rijeje eo ej jokwe ilo California, USA.

Aolep iien kar katakin eō ke ejjeļo̧k Anij, ak iaar kālet bwe in pukōte kōn jeļā eo aō make.

Pija
illustration of young men and a woman talking

Kōmeļeļe jān Dan Burr

Rūtto ļo̧k ilo laļ eo an RiAsia me rejjab tōmak ilo jar, aolep iien eaar wōr aō kōņaan n̄an erom juon armej eo eļap an wōnm̧aanļo̧k, ak eaar ejjeļo̧k jabdwōt pedped in katak ko ak m̧ool ko an mour indeeo n̄an tōl eō. Ilo laļ eo aō, “wōnm̧aanļo̧k” meļeļein eaikuj m̧weie ak kajoor.

Jinō im jema raar katakin eō aolep iien ke ejjeļo̧k Anij. N̄an er, kabun̄ ak Anij eaar ejjeļo̧k tokjān im ej n̄an armej ro wōt rem̧ōjņo̧. Eto aō ļōmņak ippa make kōn menin. Raar katakin eō bwe in jab leke jabdewōt ak en n̄a make. Kōn menin ke ej em̧m̧an detta wōt iaar kōmaat aō n̄an katak im lukkuun kate eō kōn jerbal ko reļļap.

Jinō im jema eaar ļap aer kōtmene ilo n̄a. Raar kōņaan bwe in kate eō ilo grade ko aō aolep iien. Eaar kabūrom̧ōj eō n̄e ij lo an mejāer inepata ak ron̄jake aer akweel n̄an doon n̄e ej nana grade ko aō. Ippān ļo̧k jerbal eo aō ilo jikuuļ, ij kōm̧m̧an iien n̄an kōm̧m̧ani homework ko aō ilo weekend bwe in pād wōt ilo A.

Men̄e ālkin aō kadedeļo̧k kōttōbar ko aō iaar kōllajraki, iaar en̄jake wōt ke ewōr men eo eļap ļo̧k en pād ilo mour eo aō. Ilo m̧wilaļ in būrowō, iaar lukkuun jeļā bwe ewōr men en eļap ļo̧k.

Juon raan ikar jeke ilo būruwō bwe in pukōte n̄an eō make eļan̄n̄e elukkuun wōr juon Anij. Eļan̄n̄e Ej mour, ikōņaan jeļā ta eo Ej kōņaan bwe in kōm̧m̧ane ak eļan̄n̄e kabun̄ ejjeļo̧k tokjān kar kōm̧anm̧an in kōļmenļo̧kjeņ an armej. Ikar jab mijak n̄an bōk juon ak ruo iaan uwaak kein. Ij aikuj jeļā m̧ool eo.

Ilo ejja tōre eo wōt, iaar jino epaake ļo̧k juon iaan ro ilo tiim in basketball eo aō etan Taylor. Juon jibbon̄ iaar kajjitōk bwe in uwe ippān n̄an jikuuļ. Eaar ba em̧m̧an, ak ij aikuj in mejin mour bwe in etal ippān ļo̧k n̄an jemenere. Iaar m̧ōkaj in ba em̧m̧an, jab jeļā ta eo. Eaar em̧m̧an ippa jemenere, kōnke eaar ļap aō en̄jake jān ta eo iaar ekkatak.

Tokālik, Taylor eaar ba bwe in etal ippān ļo̧k im jar ippān. Kar jinoin iaar ļōmņak kabun̄jar ejalimo̧ jidik im nana, ak kar kōm̧akūt eō kōn juon en̄jake eaenōm̧m̧an me iaar en̄jake ilo iien jar eo.

Ijoke, iaar jab lukkuun jeļā bwe en̄jake eo eaar itok jān Anij. Ekōjkan aō jeļā bwe eaar jab itok jān eō make? Ekōjkan aō jeļā bwe iaar jab kōm̧m̧an en̄jake in n̄an eō make?

Ālkin elōn̄ aetwerōk ko, iaar jibadōk ļo̧k jinen Taylor n̄an pukōt juon uwaak. Eaar jiron̄ eō ke imaron̄ in lo uwaak ko aō itok jān riiti jeje ko rekwojarjar im jar kōn uwaak ko me ij pukōti. Iaar jar im jab bōk jabdewōt uwaak im kar abwiin pokake ruuļ ko im kien ko me iaar jeļā kaki. Elōn̄ iien ij illu. Iaar kōņaan juon kabwilōn̄lōn̄ ak an Anij waļo̧k ak jet kabwilōn̄lōn̄ ko me ren kam̧ool ke ewōr Anij. Ilo m̧ool, iaar kōņaan juon naan in kam̧ool. M̧ool in ke, toon wōt aō jar, toon wōt aō en̄jake iakwe ilo mour eo aō. Toon wōt aō ļo̧o̧r kien ko, m̧ōņōņō ej ļapļo̧k ilo n̄a. Toon wōt aō riiti jeje ko rekwojarjar, eļapļo̧k revelesōn ij būki. Jidik kōn jidik, naan in kam̧ool eo aō ej ļapļo̧k, āinwōt an aļ tak ilo jibbon̄.

Eaar bōk ruo iiō ko n̄an kālet n̄an peptaij im juon membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata. Men̄e iaar mour kake elōn̄ jon̄ak ko im pedped in katak ko m̧okta ļo̧k, imaron̄ ba kiiō ke em̧ōj aō lo m̧ool eo ejjeļo̧k jem̧ļo̧kin: Anij ej mour. Jisōs ej RiKraist eo, ad Rilo̧mo̧o̧r im Ripinmuur. Lan̄ ko rej bar juon alen peļļok. Juon rikanaan an Anij ej etetal ioon laļ in rainin. Pinmuur eo an Jisōs Kraist em̧ool. Anij ej lukkuun jeo̧rļo̧k an aolep rijerawiwi ro bōd. Imaron̄ in jab lukkuun kapeel ak jeļā āinwōt ro jet, ak jeļāļo̧kjeņ eo ippa eļap.