Karōk in Lo̧mo̧o̧r Eo Juon Men Eaorōk Ekwojarjar kōn Jeļāļo̧kjeņ n̄an Tōl Kōj

Jān Elder Robert D. Hales

Jān Doulul eo an Jonoulruo Rijilōk ro

Elder Robert D. Hales

Kii eo n̄an ad kar tōprak ilo mour eo ad m̧okta ekar jipan̄ jān karōk ko an Jemād. Ej barāinwōt kii eo n̄an ad tōprak ilo mour in.

Ekkā aō kejōkļo̧kjeņ kōn an ajri ro nejin Anij ejjeļo̧k aer kōjatdikdik rej jōbwābwe ilo marok im laļ in ekaam̧jak, jab jeļā lukkuun wōn er, ia eo rekar itok jāne, etke rej pād ioon laļ in, ia eo rej etal n̄ane ālik mour ko aer ilaļ in.

Jej jab aikuj in jōbwābwe. Anij ekar kwaļo̧k tok m̧ool ko an indeeo n̄an uwaake kajjitōk kein. Rej waļo̧k ilo karōk eo An eļap n̄an ajri ro Nejin. Ilo jeje ko rekwojarjar ej ņaetan karōk in āinwōt “karōk in pinmuur,”¹ eo “karōk in m̧ōņōņō,”² im “karōk in lo̧mo̧o̧r” eo.³

The Beeches, by Asher Brown Durand

WŌJKE BEECHE KO, JĀN ASHER BROWN DURAND, © MUSEUM EO EĻAP KŌN JIN̄A KO, PIJA EO: JIN̄A KO, NY, JAB MARON̄ KŌM̧M̧AN KAPEIER

Jān meļeļe im pokake laajrak in karōk ko an Anij, jej kōjparok kōj jān ad jōbwābwe ilo iaļ eo ej tōlļo̧k kōj n̄an Jemedwōj Ilan̄.⁴ Innām, im innām, jemaron̄ ke mour kain mour eo Ej tōl, eo ej mour indeeo eo ej mennin letok eo eļaptata iaan mennin letok ko an Anij.⁵

Mennin letok an mour indeeo eaorōk ļo̧k jān jabdewot kijejeto ko n̄an katak, katakin, im mour kōn karōk in lo̧mo̧o̧r eo. Aolep armej renaaj jerkakpeje im bōk kōjeraam̧m̧an ko an jab wabanban. Bōtaab n̄an bōk mour indeeo—mour eo Anij ej tōltok⁶—ej aorōk in mour kōn karōk in lo̧mo̧o̧r eo kōn aolepān būruwōd, ļōmņak, maron̄, im kajoor.

Meļeļe Karōk in Lo̧mo̧o̧r eo

Ewi jon̄an ad jeraam̧m̧an bwe jemaron̄ jeļā karōk in! Karōk in lo̧mo̧o̧r eo ej juon iaan men ko raorōktata kōn jeļāļo̧kjeņ eo kar leļo̧k n̄an aolep armej kōnke ej kōmeļeļeiki jibadbad eo ejjeļo̧k jem̧ļo̧kin an mour. Eļan̄n̄e ejako, jenaaj lukkuun jōbwābwe ilo marok. En̄in ej etke jon̄ak in an Anij ej n̄an leļo̧k kien ko n̄an ajri ro Nejin “ālkin kar kwaļo̧k im karon̄ er kōn karōk in pinmuur eo.”⁷

Kōņaan eo aō ej n̄an jipan̄ kōj kōjerbal iien in kōn menin eaorōk an jeļāļo̧kjeņ—n̄an meļeļeļo̧k karōk in lo̧mo̧o̧r eo im kōjerbal meļeļe in ilo aolep iien toon wōt ad mour.

Anemkwoj

Kōnke anemkwoj ej aorōk n̄an karōk in, jen jino ijin. Jemād ekar letok n̄an kōj jon̄ak eo n̄an ad jerbal ak makoko in jerbal⁸ ekkar n̄an m̧ool ko an indeeo—m̧ool ko me rej kwaļo̧k wōn E im ta in lan̄.⁹ Eļan̄n̄e jej kōjerbale anemkwoj eo ad n̄an errā kaki im mour kōn m̧ool kein, jenaaj bōk lan̄lōn̄ eo ejjeļo̧k jem̧ļo̧kin. N̄an meļeļeļo̧k, eļan̄n̄e jenaaj kōjerbal anemkwoj eo ad n̄an jab pokake, im jab pokake kien ko an Anij, jej en̄jake en̄taan im būromōj.¹⁰

Anemkwoj ej juon pedped in katak ekitbuuj aolep jepta kein jilu kōn karōk in lo̧mo̧o̧r: mour eo m̧okta, mour in, im mour eo ālkin mej.

Mour eo M̧okta

Āinwōt an kar kōmlet ilo “Baam̧le Eo, juon Naan in Kean̄ n̄an Laļ in,” kōj kajjojo “jetōb jitōnbōro likao im jiron̄ ro nejin jined im jemed ilan̄” ewōr “juon mour kwojarjar im jipadpad ippān.”¹¹ Ilo juon ko̧o̧njeļ ilo mour eo m̧okta, Jemedwōj Ilan̄ ekar kōmeļeļeik kōj n̄an karōk in pinmuur in An.¹² Karōk in ekar pedped wōt ioon katak ko, kakien, im pedped in katak ko raar waļo̧k m̧aantak.¹³ Jekar jeļā bwe eļan̄n̄e bōk menin im ļoor karōk in, jenaaj aikuj in em̧m̧akūt jān im̧aan mejān Jemād im maron̄ mālijjon̄ n̄an kwaļo̧k eļan̄n̄e jenaaj kālet n̄an mour ekkar n̄an kakien im kien ko An.¹⁴ Jekar lan̄lōn̄ kōn iien in em̧m̧an¹⁵ im mour kam̧m̧oolol im rejtake karōk in kōnke ekar letok n̄an kōj iaļ eo n̄an erom āinwōt Jemedwōj Ilan̄ im jolet e mour indeeo.

Ak karōk in ekitbuuj kauwōtata: eļan̄n̄e jenaaj kālet ilo mour in bwe jen jab mour ekkar n̄an kien ko an Anij, im jemaron̄ kar bōk jidik jān mour indeeo.¹⁶ Jemād ekar jeļā wōt ke jenaaj kar wōtlo̧k im jerawiwi ilo ad katak jān en̄jake ko ilo mour in, kōn menin Ekar kōpooj juon Rilo̧mo̧o̧r n̄an lo̧mo̧o̧r jān jerawiwi an aolep ro rej ukweļo̧k im n̄an kōmour jetōb eo im en̄jake ko an jabdewōt eo ej pokake.¹⁷

Cropped portion of Carl Bloch's painting depicting Christ sitting at a table with the two men with whom He walked on the road to Emmaus.

Jisōs Kraist ekar jitōn bōro eo nejin Jemād, eo Ekar kālet e, im Ļaddik eo Nejin ekar ekkapit jān jinoin.¹⁸ Ekar rejtake karōk eo an Jemād im kar uwaak bwe en ad Rilo̧mo̧o̧r ba: “N̄a e, jilkinļo̧k eō.”¹⁹ Ilo wāween in, kar jitōn̄ Jisōs jān Jemād bwen Juon eo ej mour ilo mour in kōn ejjeļo̧k jerawiwi, pinmuur kōn jerawiwi ko ad im en̄taan ko, im maron̄ jerkakpeje n̄an rube tomede ko an mej.

Lucifer, eo jej jeļā kajjeen āinwōt Setan, ekar barāinwōt mour ilo mour eo m̧okta.²⁰ Kōn jet un ko renana ekar kōnanaiki karōk in, pukōt n̄an kakkure anemkwoj an armej, im jum̧ae Jemād.²¹ Āinwōt waļo̧k in juon bōd, Setan im ro rekar ļo̧o̧r e ej jāmin wōr ānbwinnier. Rekar kajejtokjen iien ko aer n̄an bōk koņaer ilo karōk eo an Jemād im kar luuji mejān kajjik eo ekwojarjar.²² Rainin rej tariņae wōt n̄an jum̧ae Anij im pukōt kojkan aer ukōt ļōmņak ko im bōro ko an armej ņae E.²³

Laļ in ekar kōm̧m̧anm̧an im ejaak n̄an ro raar errā kōn karōk eo an Jemād.²⁴ Ijin jej bōk juon ānbwin kar kōm̧m̧anm̧an ilo nememein im jekjek in Anij. Ijin jej bōk mālijjon̄ im kakūrm̧ool. Ijin jej bōk en̄jake eo emennin aikuj n̄an deļo̧n̄e mour indeeo.²⁵

Mour in Kanniōk

Adam and Eve

Anij ekar kōm̧anm̧an Adam im Iv im kobaik er āinwōt ļeo im lio pālele, likūt er ilo Jikin Kallib in Eden, im kakien er bwe ren tim̧oon im orļo̧k.²⁶ Rekar kōjerbal anemkwoj eo aer, Adam im Eve erro jim̧or kar wōtlo̧k jān im̧aan mejān Anij im erom armej wabanban.²⁷ Menin ekar kakūrm̧ool karōk eo an Jemād ilo an kapidodo n̄an er bwe ren maron̄ tim̧o̧o̧n im wōrļo̧k, eo me rekar jab maron̄ kōm̧m̧ane ilo Kallib in Eden.²⁸ Jān kakien in ejjeļo̧k jem̧ļo̧kin, kwojarjar jān kajoor eo an neji ajri ej aikuj in jerbal ilowaan wōt jon̄ak ko kar kōm̧m̧an jān Jemedwōj Ilan̄. Kōm̧m̧an āindein ej letok iien em̧m̧an n̄an lan̄lōn̄ eo ejjeļo̧k jem̧ļo̧kin. Jabdewōt wāween kōjerbale kajoor in ekwojarjar an Anij itulikin jon̄ak ko an Anij enaaj waļo̧k eo eļaptata ejelet būromōj.²⁹

Setan, eo ekōņaan bwe aolep “ren en̄taan āinwōt e,”³⁰ ej kajjieon̄ in bōkļo̧k kōj jān iien kein rem̧m̧an im karōk eo an Jemād. Etke Jemedwōj Ilan̄ ej kōtlo̧k an Setan kapoik kōj? Kōnke Ejeļā bwe jum̧ae ej menin aikuj n̄an eddōkļo̧k eo ad im mālijjon̄ ilo mour in.³¹ Jum̧ae ej letok n̄an kōj juon iien eo ejjeļo̧k wōnāān n̄an oktak n̄an Anij im pedped wōt ilo E. Kōnke em̧m̧an im nana rej aolep iien pād im̧aad, jemaron̄ in kwaļo̧k kōņaan ko an būruwōd jān ad kabwijer juon im dike eo juon.³² Jum̧ae emaron̄ waļo̧k ilo kapo ko an Setan ak barāinwōt ilo mōjņo̧ ko ad make, m̧wil ko m̧wilid remōjņo̧ me rej pād ilo piktok in armej.³³

N̄an jipan̄ kōj kalet men eo ejimwe, Anij ekar kwaļo̧k karōk in lo̧mo̧o̧r in An im Ekar letok kien ko,³⁴ Meram in Kraist,³⁵ im jem̧jerā eo an Jetōb Kwojarjar.³⁶ Aaet ippān men in letok kein aolep, kōj aolep ro ilo laļ in rej kōm̧m̧an jerawiwi, innām kōj aolep ejjeļo̧k ad maron̄ n̄an deļo̧n̄e im̧aan mejān Anij kōn jon̄ak eo ad make.³⁷ En̄in ej unin an karōk in tiriam̧o̧ in An letok juon Rilo̧mo̧o̧r.

Jisōs Kraist ekar itok n̄an laļ in āinwōt Juon wōt Nejin Anij Ejitōn Bōro im Ekar kakūrm̧ool jejjet in ijjitōn̄ eo An jān jilkinļo̧k n̄an ankilaan Jemān ilo men otemjej.³⁸ Ekkar n̄an karōk in tiriam̧o̧ eo an Jemān, wāween ko rekar waļo̧k jān Wōtlo̧k eo rej anjo kōn Jerkakpeje eo an Rilo̧mo̧o̧r eo,³⁹ waļo̧k in bōd in jerawiwi maron̄ eļļā jāni, im m̧ōjņo̧ emaron̄ oktak n̄an kajoor eļan̄n̄e jej leļo̧k kōj make n̄an Pinmuur eo an Jisōs Kraist.⁴⁰

Frontal head and shoulders portrait of Jesus Christ. Christ is depicted wearing a pale red robe with a white and blue shawl over one shoulder. Light emanates from the face.

Pija in Kraist, jān Heinrich Hofmann, letok in C. Harrison Conroy Co.

Jemaron̄ in karbab n̄an mour indeeo eļan̄n̄e jej pokake kien ko. Menin ekitbuuj tōmak ilo Irooj Jisōs Kraist, ukweļo̧k, peptaij, bōk menin letok eo an Jetōb Kwojarjar, im niknik n̄an jem̧ļo̧kin ilo ļoor waanjon̄ak eo an Rilo̧mo̧o̧r.⁴¹ Āinwōt an aorōk, jej aikuj bōk aolep kain̄i kein raorōk an priesthood eo im niknik n̄an jem̧ļo̧kin ilo kōjparok bujen ko rej ekkejel ippāer.

Mour eo Ālkin Mej

Ālkin ad mej, jenaaj jutak juon raan im̧aan Rilo̧mo̧o̧r eo n̄an ekajet.⁴² Kōnke Anij ej tiriam̧o̧, ro rej kōjerbal tōmak eo aer ilo Kraist n̄an ukweļo̧k naaj jeorļo̧k aer bōd im renaaj deļo̧n̄e aolepān men ko an Jemān, ekoba mour indeeo.⁴³ Kōnke Anij ej jab kaljekļo̧k, kajjojo armej eo ejjab ukweļo̧k ej jāmin bōk menin letok eo an mour indeeo.⁴⁴ Kajjojo armej naaj nōbare ekkar n̄an tōmak eo an, ukweļo̧k, ļōmņak, ikdeleel ko, im jerbal ko an.⁴⁵

Mour kake Karōk in Lo̧mo̧o̧r eo ilo Aolep Iien in Ad Mour

N̄e jenaaj meļeļe aolepān kōttōbar eo an karōk in im loe kōj ilowaan, jej bōk juon men eo elukkuun aorōk, aaet emenin aikuj: jibadbad eo n̄an indeeo. Jibadbad eo n̄an indeeo ej jipan̄ kōj ilo aolep kālet ko im m̧akūtkūt ko ad aolep iien. Ej kapen ļōmņak ko ad im ad. N̄e kareel ak meļeļe ko rej kamōjņo̧ kōj ejjeļo̧k jem̧ļo̧kier aer jebool kōj, jej pen im dim.

Āinwōt Elder Neal A. Maxwell (1926–2004) jān Doulul eo an Jon̄oulruo Rijilōk ro ekar katakin: “Ilo an ejjeļo̧k meļeļe in karōk in lo̧mo̧o̧r eo, ekoba ad kar pād ilo mour eo m̧okta im ekajet eo im jerkakpeje eo, kajjieon̄ in meļeļe mour in emake enaaj āinwōt n̄e kwoj alooje wōt m̧ōttan eo kein karuo an juon ikkure jilu ikkure ie.”⁴⁶ Jej aikuj meļeļe ikkure eo kein kajuon (mour eo m̧okta) bwe jen maron̄ jeļā wāween ad kālet kālet ko rem̧m̧an ilo ikkure eo kein karuo (mour in), eo enaaj kalikkar ta eo enaaj waļo̧k ilo ikkure eo kein kajilu (mour eo ālkin mej).

Ekar bar kōmeļeļeik ilo bar juon wāween, meļeļe kōn karōk in lo̧mo̧o̧r eo, kōn jar eo em̧ool, oktak ko jān wāween ad loe, aolep ro ipeļaakid, im kōj make. Meļeļe kōn karōk in ej kalikkarļo̧k visōn eo ad ilo jetōb im ej kōtļo̧k ad loe men ko āinwōt aer lukkuun alikkar.⁴⁷ Āinwōt an Urim im Thummim kōmaron̄ an Rikanaan Josep Smith bōk revelesōn im tōl,⁴⁸ kōn menin jeļāļo̧kjeņ eo kōn karōk in enaaj ke kwaļo̧k n̄an kōj wāween eo “m̧akūtkūt ilo katak im pedped ko rej ekkejelļo̧k ilju im jekļaj, ekkar n̄an anemkwoj in kāālet an kanniōk” Irooj ekar letok n̄an kōj.⁴⁹ Kōn menin, tōmak eo ad enaaj kajoorļo̧k, im jenaaj jeļā wāween jaate iaļ in mour eo ad im kōm̧m̧an kālet ko rejjejet ippān m̧ool eo indeeo.

Erkein rej jet waanjon̄ak ko relukkuun jejjet ilo tōre in ad.

Jibadbad eo an M̧are eo ilo Karōk eo an Anij

illustration of a bride and groom in front of a temple

KŌMEĻEĻE JĀN JAMES JOHNSON

M̧are im baam̧le rej pād ilo ļōmņak n̄an jodiki kōnke Setan ejeļā bwe rej aorōk n̄an bōk mour indeeo—āinwōt aer aorōk in wōt Rikōm̧anm̧an eo, Wōtlo̧k eo, im Pinmuur eo im Jerkakpeje eo an Jisōs Kraist.⁵⁰ Jān an kar likjab in kakkure jabdewōt jurin meram ko an karōk in, Setan ej pukōt n̄an kakkure meļeļe eo ad im m̧are ko ad im baam̧le ko ad.

Ippān karōk in an Jemedwōj Ilan̄ āinwōt juon men ejipan̄ meļeļe, jibadbad eo an m̧are ej lukkuun ļap mejōke. Kien eo bwe jen likūt jemād im jined, eddāp n̄an doon ilo m̧are,⁵¹ im tim̧oon im kobrak laļ⁵² ekōm̧m̧an bwe karōk in An en tōprak. Kōn m̧are jej bōktok ajri in jetōb ro Nejin n̄an laļ in im erom ro M̧ōttan ilo jipan̄ ajri ro Nejin bōk koņaer ilo karōk in An.⁵³

Karōk in an Jemād ej letok n̄an kōj wāween eo n̄an deļo̧n̄e mour indeeo, kain mour eo jined im jemed ro ilan̄ rej tōl. Ilo karok in, “ijoke kōrā e jab anemkwōj jān m̧aan, [ak] m̧aan anemkwōj jān kōrā, ilo Irooj.”⁵⁴ Men eo elukkuun aorōk an mour indeeo ekitbuuj m̧are eo n̄an indeeo an ļeo im lio, eo ej juon iaan m̧ōttan ko kaorōk n̄an ad erom āinwōt jinedwōj im jemedwōj ilan̄.⁵⁵

M̧are ikōtaan juon M̧aan im juon Kōrā

Ilo m̧are ej alikar an lio im leo mour ilo juon wot, āinwōt juon m̧aan im juon kōrā ewōr juon men rāinjuon kake im aorōk ko remaron̄ oktak. Ilo ad em̧m̧akūt m̧aanļo̧k ilo mour in āinwōt ļeo pālele im lio pālele, jej eddōkļo̧k ippān doon, epaakeļo̧k doon n̄an Rilo̧mo̧o̧r eo ilo ad pokake, kōm̧m̧an wujlepļo̧k ko n̄an kōm̧anm̧an ankilaan Anij, im kalōk aelōn̄ in kiin̄ eo An ippān doon. Jān ad jeļā bwe m̧are n̄an indeeo ej juon kien an Anij im bwe E ej kōpooje juon iaļ n̄an kōj n̄an kōttōbrak aolep kean̄ ko An,⁵⁶ jej jeļā bwe m̧are eo ad enaaj tōprak ilo ad ippān doon ilo kōjparok bujen ko jaar kōm̧m̧ani.

Ej itok wōt jān ad būki kain̄i ko an priesthood eo im kālet n̄an kōjparok bujen ko rej ekkejel ippāer ko rej letok n̄an kōj kajoor in drikanij ilo ad jelm̧ae apan̄ ko an mour in.⁵⁷ Kain̄i ko an tampeļ rej letok iood kajoor eo jān ijo eutiej tata im rej kōmaron̄ ad jepļaak n̄an im̧aan mejān Jemedwōj Ilan̄.⁵⁸ Kain̄i in liāp eo ej kōmaron̄ an ļeo im lio pālele eddōkļo̧k ippān doon kōn kajoor eo an Anij im erom juon wōt ippān Irooj.⁵⁹ Jabdewōt wāween ko rej pinej jenkwan kain m̧are rot in ej jāmin naaj kakūrm̧ool jibadbad eo ekwojarjar n̄an kōj ak n̄an epepen in ajri ro Nejin ro rej ļoore.⁶⁰

Kōm̧ad ko im Ikdeleel ko

Kōj kajjojo jej itok n̄an laļ in kōn m̧ōjņo̧ ak apan̄ ko rewaļo̧k ilo jekjek in armej.⁶¹ Meļeļe kōn karōk eo an Anij ej kōmaron̄ ad loe aolep m̧ōjņo̧ ko an armej—ekoba kōm̧ad ko im ikdeleel ko rej jab jejjet ippān karōk eo An—āinwōt rej jidik wōt iien.⁶² Jeļā bwe jaar mour m̧okta jān mour in āinwōt ļaddik im leddik ro nejin jinedwōj im jemedwōj ilan̄ raar eletok maron̄ n̄an ad bōk kadkad eo ad make jān eo jekar jebar jāne. Ej kadkad eo ad in āinwōt juon ļaddik ak leddik nejin Anij—jab m̧ōjņo̧ ko ad ak kōņaan ko ad—bwe em̧ool ej jipan̄ eo in an kadkad eo ad.⁶³

Kōn loļo̧kjeņ in, jej maron̄ kōttar ilo ettā im kijenmej ippān Anij,⁶⁴ lōke bwe jān ad tōmak, pokake, im niknik n̄an jem̧ļo̧kin, m̧wilid im ikdeleel ko ad rej maron̄ erreo, ānbwinnid renaaj maron̄ erreo, im jenaaj m̧ool erom ļaddik im leddik ro nejin Kraist, ewāppen jān Pinmuur eo An.

Jibadbad in ejjeļo̧k jem̧ļo̧kin an karōk in ej bōktok kam̧ool bwe kōn tōmak, raan eo enaaj itok me “Anij enaaj kōm̧rāik jān mejeir; … barāinwōt enaaj ejjeļo̧k en̄taan: bwe men ko m̧okta re jako.”⁶⁵ Kōn “kōjatdikdik emeram”⁶⁶ enaaj kapen kōļmenļo̧kjeņ ko ad im būruwōd im enaaj kōmaron̄ kōj ilo tiljek, tōmak im kōttar wōt Irooj.

Kallim̧ur ko n̄an Ro Otemjej Rej Tiljek im Niknik

Ro otemjej rej jōbwābwe eļan̄n̄e jekjek in mour eo kiiō rej pād ie ak jekjek ko rej bukweļo̧k er jān mour indeeo er rej aikuj keememej bwe “ejjeļo̧k juon ej kōtmāne n̄an bōk edik ļo̧k jān aolep men ko Jemād ekōņaan bwe ajri ro Nejin ren būki.”⁶⁷

Ejjeļo̧k kōjeram̧m̧an enaaj kabōjrake jān eo etiljek. Būreejtōn Lorenzo Snow ekar kwaļo̧k: “Ejjeļo̧k juon Armej Ekwojarjar ilo Raan-ko Āliktata eo ej mej ālkin an mour kōn juon mour etiljek eo enaaj luuji jabdewōt men kōnke ekar likjab in kōm̧m̧ani jet men ko ekar ejjeļo̧k iien kar liļo̧k n̄an ļeo ak lio. Ilo bar juon naan, eļan̄n̄e juon likao ak juon jiron̄ ekar ejjeļo̧k an iien em̧m̧an n̄an m̧are, im rej mour tiljek m̧ae iien eo rej mej, renaaj bōk aolep kōjeram̧m̧an ko an mour ijo ilōn̄ tata im aiboojoj eo me jabdewōt em̧m̧aan ak kōrā renaaj bōke ro ekar wōr aer iien em̧m̧an im kar kam̧oole. Menin em̧ool im em̧m̧an.”⁶⁸

Kallim̧ur ko n̄an Aolep Armej ro Rejeļā Karōk eo im Rej Mour Kake Aolep Iien

One painting depicting a boy writing, with open books on a table, including the scriptures. The father, next to him seated, looks at his work and rests his arm on the back of the boy's chair. A case of books is at viewers left and french doors are at viewers left in background.

Kōj kajjojo im aolepān būruwōd rekar rie karōk eo an Jemād ilo mour eo m̧okta. Jekar jeļā bwe Ej iakwe kōj, im jekar en̄jake kautiej eļap jān An iakwe kōn iien in em̧m̧an n̄an jolet e aolep men ko An, ekoba mour indeeo. Kii eo n̄an tōprak ilo mour eo ad m̧okta ekar jān jipan̄ im karōk eo an Jemād. Ej barāinwōt kii eo n̄an ad tōprak ilo mour in.

Kōn menin kajjitōk eo aō ej bwe ippān doon jej jutak bar juon alen ilo rie karōk eo an Jemād. Menin jej kōm̧m̧ane kōn iakwe aolep, n̄an karōk eo make ej juon waļo̧k in iakwe eo an Anij.

Ilo ad mour kake jeļāļo̧kjeņ in aolep iien an karōk eo an Jemād, mour ko ad renaaj m̧wilaļo̧k meļeļeir. Jenaaj jelm̧ae apan̄ ko kōn tōmak eo eļapļo̧k. Jenaaj bun̄ m̧aanļo̧k kōn m̧ool, meram, kōjatdikdik edim an mour indeeo.

Kakeememej ko

1. Jekab 6:8; Alma 12:25–26, 30, 32; 17:16; 18:39; 29:2; 39:18; 42:11.

2. Alma 42:8, 16.

3. Jarom 1:2; Alma 24:14; 42:5; Moses 6:62.

4. Lale Alma 12:32; bar lale Boyd K. Packer, “The Great Plan of Happiness and Personal Revelation” (Church Educational System broadcast for young adults, Nov. 7, 1993).

5. Katak im Bujen ko 14:7.

6. Lale Harold B. Lee, The Teachings of Harold B. Lee, ed. Clyde J. Williams (1996), 72; bar lale Bruce R. McConkie in Conference Report, April 1970, 26.

7. Alma 12:32; eoon eo eaorōk kar kobaiktok; bar lale eoon 25.

8. Lale 2 Nipai 2:13–16; Katak im Bujen ko 101:78.

9. Lale George Q. Cannon, Gospel Truth: Two Volumes in One: Discourses and Writings of President George Q. Cannon sel. Jerreld L. Newquist (1974), 296.

10. Lale Richard G. Scott, “How to Live Well amid Increasing Evil,” Liahona, May 2004, 102; Robert D. Hales, Return: Four Phases of Our Mortal Journey Home (2010), 33.

11. “Baam̧le Eo: Juon Naan in Kean̄ n̄an Laļ in,” Liaona, Nob. 2010, 129; bar lale Jerbal 17:29; Rom 8:16–17; Hibru 12:9; Ebream 3:18–25.

12. Lale Alma 12:30; bar lale Job 38:4–7; Ebream 3:22–28.

13. Lale 2 Nipai 2:13; bar lale Howard W. Hunter, “To Know God,” Ensign, Nov. 1974, 97; Teachings of Presidents of the Church: Heber J. Grant (2002), 30: “Kajjojo iaan kien [ko] rekar litok n̄an kwaļo̧k jibadbad eo bwe jen maron̄ … karbab im m̧aanjabpopo n̄an jepļaakļo̧k im pād ilo im̧aan mejān Jemedwōj Ilan̄. Jerbal ko im eddo kein emōj karōki n̄an kōm̧m̧an bwe jen āinwōt anij ilo peba in kam̧ool ko ad. Kar karōki n̄an kōm̧m̧an bwe jen Anij, im n̄an jejjet im kakarbab e kōj bwe jān erom … kobaikļo̧k jolet ko ad ippān Irooj im Irooj Jisōs Kraist.”

14. Lale Katak im Bujen ko 136:31; Ebream 3:24–25.

15. Lale Job 38:7.

16. Lale Katak im Bujen ko 88:34–36, 39–40.

17. Lale Aiseia 53:3–5; 2 Nipai 2:8; 9:10–11; 31:21; Mosaia 3:17; Alma 7:11–13.

18. Lale 1 Piter 1:20; Moses 4:2.

19. Ebream 3:27.

20. Lale Aiseia 14:12–16.

21. Lale Moses 4:3–4; bar lale 1:19.

22. Lale Revelesōn 12:7–9.

23. Lale Katak im Bujen ko 10:26–27.

24. Lale Katak im Bujen ko 59:18–19.

25. Lale Ebream 3:24–26.

26. Lale Jenesis 1:26–28.

27. Lale Alma 42:2–6; Moses 4:25, 28–31.

28. Lale 2 Nipai 2:23; Moses 5:11; bar lale Boyd K. Packer, “The Plan of Happiness,” Liahona, May 2015, 26–28.

29. Lale Alma 39:3–5; 41:3–4, 10–15.

30. 2 Nipai 2:27.

31. Lale 2 Nipai 2:11.

32. Lale 2 Nipai 2:26–29; Alma 34:32–35.

33. Lale Jekab 4:7; Ether 12:27; Katak im Bujen ko 62:1.

34. Lale Alma 12:30–32.

35. Lale Moronai 7:16–19; Katak im Bujen ko 88:7, 11–13.

36. Lale 2 Nipai 31:12–14, 18.

37. Lale 1 Jon 1:8.

38. Lale Luk 22:39–42; Katak im Bujen ko 19:16–19.

39. Lale 1 Korint 15:20–23; 2 Nipai 9:10–13; Alma 11:42–45.

40. Lale Alma 42:2–15, 22–31; Moronai 10:32–33.

41. Lale 2 Nipai 31:10–21; 3 Nipai 27:13–22.

42. Lale Jon 5:22; Rom 14:10; Revelesōn 20:12–13; 2 Nipai 9:41; Alma 11:41–44; 3 Nipai 27:14–17, 20, 22.

43. Lale Alma 34:14–17.

44. Lale Mosaia 3:21–27; Hilamōn 14:15–19; Katak im Bujen ko 88:21–24, 29–32.

45. Lale Mormon 3:20–22.

46. The Neal A. Maxwell Quote Book, ed. Cory H. Maxwell (1997), 252.

47. Lale Thomas S. Monson, “Be Thou an Example,” Liahona, May 2005, 113.

48. Lale Josep Smith—Bwebwenato 1:35.

49. Katak im Bujen ko 101:78.

50. Lale D. Todd Christofferson, “Etke Jej M̧are, Etke Jej Baam̧le,” Liaona, Māe 2015, 52.

51. Lale Matu 19:5.

52. Lale Jenesis 9:1.

53. Lale Katak im Bujen ko 93:36–40.

54. 1 Korint 11:11.

55. Lale Dallin H. Oaks, “Apostasy and Restoration,” Ensign, May 1995, 87; bar lale Dallin H. Oaks, “No Other Gods,” Liahona, Nov. 2013, 73.

56. Lale 1 Nipai 3:7.

57. Lale Katak im Bujen ko 84:19–21.

58. Lale Katak im Bujen ko 109:13–26, 38.

59. Lale Katak im Bujen ko 132:1–21.

60. Lale 1 Piter 3:7; Katak im Bujen ko 131:1–4; bar lale Joseph Fielding Smith, Answers to Gospel Questions, 5 vols. (1957–66), 4:197: “Ro rej m̧are ilo tampeļ eo n̄an iien im indeeo rej bōk kōjeram̧m̧an eo an mour ko indeeo. Ij kōmejajaiki mour ko indeeo. Mour indeeo ej mour eo an Anij, en̄in, bwe jen erom̧ āinwōt E. Mour ko indeeo ej meļeļein indeeo ej ļapļo̧k—wōnm̧aanļo̧k, āinwōt an revelesōn eo kwaļo̧k, kōn ine ko n̄an indeeo. Jab m̧are ilo tampeļ eo ej meļeļein m̧ae mej. Mej ej kōjepel—meļeļein ej juon jepeļ eo ejjeļo̧k jem̧ļo̧kin, m̧ae iien ilo juon tōre rej ukweļo̧k im m̧ōņōņō in etal n̄an tampeļ eo im kōm̧m̧an kallim̧ur ko.”

61. Lale Ether 12:27.

62. Lale Ether 12:37.

63. Lale “Baam̧le Eo: Juon Naan in Kean̄ n̄an Laļ in,” 129; bar lale God Loveth His Children (booklet, 2007), 1.

64. Lale Aiseia 40:31.

65. Revelesōn 21:4; bar lale eoon 1–3.

66. 2 Nipai 31:20.

67. D. Todd Christofferson, “Etke Jej M̧are, Etke Jej Baam̧le,” 52.

68. Teachings of Presidents of the Church: Lorenzo Snow (2012), 130. Bar lale Gordon B. Hinckley, “Daughters of God,” Ensign, Nov. 1991, 98: “Jet ro me rej jab m̧are, jān an ejjeļo̧k aer make bōd, rej kajjitōk eļan̄n̄e renaaj aolep iien kariab aiboojoj eo ilōn̄tata ilo aelōn̄ in kiin̄ eo. Ewōr aō lōke bwe ium̧win karōk eo an juon Jemād eo ejouj im juon Ripinmuur eo ekwojarjar, ejjeļo̧k kōjeram̧m̧an eo kwoj wānōk n̄ani naaj jako jān kwe.”