2015
Sister Spafford Ekar Kōnono n̄an N̄a
Oktoba 2015


Sister Spafford Ekar Kōnono n̄an N̄a

Sandy Howson, Ohio, USA

Ikar ikkure juon ikkure in restaurant online juon bon̄ ke ļeo pāleeō ekar deļo̧n̄tok im ba bwe ej etal im kiki.

“Inaaj deļo̧n̄waj,” Ikar jiron̄ļo̧k e.

“Inaaj tōmak eļan̄n̄e inaaj loe,” ekar ba.

Ikar ikkure ikkure eo me ekar kwaļo̧k aō kōmat riab in m̧ōn̄ā ilo juon riab in restaurant n̄an riab in riwia ro. Ikar kalimjōk kūlaaj in kamputōr eo im ba, “Ekwe, elōn̄ m̧ōn̄ā ko rej itok 15 minit jān kio.”

Bwe in pād, ij aikuj kōttōr, ikar kotak Daughters in My Kingdom bok eo: Bwebwenato im Jerbal eo an Doulul eo an Kōrā ro, eo ekar pād ioon tebōļ eo jān ke ikar bōke ilo Doulul eo an Kōrā. Ikar jino riiti kōmeļele ko im̧aan bok eo. Ilo peij jilu, ikar loe men kein jān Belle S. Spafford, kein kōratimjuon būreejtōn eo eutiej an Doulul eo an Kōrā ro.

“Juon kōrā em̧m̧an rainin, ij tōmak,” ekar jeje, “enaaj lukkuun etale itok limo ko an, etale m̧akūtkūt ko ej kobaļo̧k ie, im enaaj bōk bun̄tōn ko n̄an kapidodoikļo̧k mour eo an, likūt men ko raorōk im̧aan mokta, likūt aorōk ko renaaj ļap aer letok nōbar im eļap kijenmej kaki, im kanemkwoj e jān m̧akūtkūt ko ejjeļo̧k tokjāer” (2011, xiii).

Ijjelo̧kin jeje ko rekwojarjar, ejjan̄in kar lōn̄ juon men eo ekar lukkuun un̄ūr buruwō. Kōrā in eo ekar mej elōn̄ļo̧k jān 30 iiō ko remootļo̧k ekar kōnono n̄an n̄a. Naan kein an eļapļo̧k aer jelet rainin jān tōre eo ekar kōnono kaki.

Ekar mōkaj aō jeļā bwe ij jab aikuj bar ikkure ikkure ko ilo online. Ikar kune kamputōr eo aō, etal im kiki, im ikar jiron̄ ļo̧k ļeo pāleeō kōn kālet eo aō. Raan eo juon ikar jab kōjo̧ kamputōr eo aō. Ijjelo̧kun, ikar bwini jete awa ikar maron̄ kakkuri ilo aō kar ikkure aolep raan.

Ikar ko̧o̧rļo̧k jilu awa juon raan ippān 365 (raan ilo juon iiō) im ajeje kōn 24 (awa ilo juon raan). Ikar bwilōn̄ im jeļā bwe ikar kakkure 45.62 raan ko ilo juon iiō. Awa kein raiboojoj im raan kein remootļo̧k n̄an indeeo. Imaron̄ kar kōjerbali n̄an riiti jeje ko rekwojarjar, joļo̧k iien ko aō ippān ļeo pāleeō im ajri ro nejū, jerbal n̄an ro jet, ak kōļapļo̧k eddo ko aō.

Ritōl ro Routiej an Kabun̄ in ekkā aer kōnono kōn unin kōnono in ilo kweilo̧k eo eļap. Ak ekar jab jelet tok m̧weo im̧ō, im ikar ļōmņak ekar jab jerbal n̄an n̄a.

Ilukkuun kam̧m̧oolol bwe Jetōb Kwojarjar eo ekar jipan̄ eō kile bwe Ritōl ro Routiej an Kabun̄ in—im Belle S. Spafford—rekar kōnono n̄an n̄a.