Jar ilo Iaļ eo Aō ļo̧k n̄an Rotuma
John K. Muaror, New South Wales, Australia
(Rijeje eo emōj an mej.)
Kōmeļeļe jān Allen Garns
“Tima eo Westerland ekar em̧m̧akūt inne,” kōrā eo pāleen ļeo jatū ekar ba ke ej iakiakwe kōm̧ ilo Nadi International Airport ilo Fiji.
Ikar būrom̧ōj im inepata kōn ennaan eo. Tima eo MV Westerland ekar tim̧a eo en kar iten bōkļo̧k kōm̧ n̄an am loļo̧k ļeo jeiū erūtto ilo aelōn̄ in Rotuma. Rotuma enan̄in 375 m̧aeļ ko (600 km) turōk turear in Viti Levu, āne eo ekileptata ilo Fiji. Eļan̄n̄e kwonaaj rumiji tim̧a eo, kwonaaj aikuj in kōttar elōn̄ raan ko ak bōlen emaron̄ elōn̄ wiik ko m̧okta jān an bar itok juon.
Ikar etal n̄an Rotuma iiō eo ļo̧k juon n̄an jipan̄ ļeo jeiū kōkāāle m̧weo imōn bubu, im ikar em̧m̧akūt jān e kōnke ekar wōr juon poktak ejelet jerbal. Kiiō, ikōņaan bar loe bwe in jelm̧ae im jiron̄ ļo̧k e ke ikar bōd.
Juon wiik m̧oktaļo̧k, kōrā eo pāleeō, Akata, im n̄a kom̧ro kar kālōk jān Australia, leddik eo nejin ekar ba bwe Westerland enaaj etal n̄an Rotuma raan eo m̧okta jān am jokļo̧k. Ikar mōkaj im kūrļo̧k opiij eo an tim̧a eo im akweļap n̄an er n̄e remaron̄ karum̧wijļo̧k tūreep eo n̄an bar ruo raan.
“Jaab, kōm̧ij jab maron̄ men̄e kōm̧ kōņaan,” uwaak eo ekar itok. “Rotuma Island Council emōj an kōm̧m̧ane kōppojak ko kōn juon kōjota in karuwainene, im tim̧a eo ej aikuj in jirak āinwōt kar jikejuuļi.”
Juon kōļmenļo̧kjeņ ekar jerjer ilo ļōmņak eo aō, im ikar pepe ippa n̄an jitlo̧k im jar.
“Jemedwōj Ilan̄,” ij jar, “Ilukkuun in kōņaan iuwe ilo tim̧a en n̄an Rotuma. Ij tōmak remaron̄ jab dāpij an jerak n̄an bar juon raan ak ruo, ak Kwe ewōr Am̧ kajoor n̄an kōm̧m̧ane. Komaron̄ ke kōm̧akūt juon dila jabdewōt jikin ilo tim̧a eo bwe en rum̧wijļo̧k tūreep eo bwe in maron̄ iuwe ie? Ij aikuj etal n̄an Rotuma bwe in maron̄ joļo̧k aō bōd ippān ļeo jeiū.”
Ālkin am kar ron̄ kōn nuuj ko rekaburom̧ōjm̧ōj, kōm̧ ar etal n̄an ob eo ej pād iturājet in āne eo. Ijin, kōm̧ ar ron̄ bwe tim̧a eo eaar ioon jorrāān ilo injin eo an im ekar jab jerak. Jemedwōj Ilan̄ ekar uwaake jar eo aō! Ekar waļo̧k, bwe aolepān injin eo—ekar jab juon dila—rekar aikuj in joļo̧k an ettal jikin wāeļ eo.
Āliktata ke tim̧a eo ekar em̧m̧akūt wiik eo tokālik, ikar iuwe ie. Ke ikar tōparļo̧k Rotuma, ikar atbokwoj ļeo jeiū im joļo̧k aō bōd ippān, im jem̧jerā eo am̧ro ekar bar ro̧ltok. Em̧ool ekar juon raan elem̧ōņōņō.
Inaaj aolep iien kam̧m̧oolol kōn en̄jake in aō em̧m̧an ilo jetōb im kōn jepļaaktok eo an gospel eo an Jisōs Kraist. Ej juon naan in kam̧ool bwe kabwilōn̄lōn̄ rej waļo̧k wōt n̄an rainin, bwe Jemedwōj Ilan̄ ej mour im Ej uwaake jar ko ad rem̧ool, bwe jar im jitlo̧k rej ippān doon, im bwe gospel eo ej m̧ool—men̄e ilo juon jikin edik ilo juon aelōn̄ ilo Rotuma.