Ang Ginoo Namulong og Kalinaw ngari Kanako
Trisha Tomkinson Riggs, Arizona, USA
Ang among anak nga babaye nga si Carlie nagkasakit pipila na ka adlaw, ug ako nagtuo nga subaw ra. Apan sa dihang ang iyang mga simtoma nagpadayon, nagsugod na ko og hunahuna nga basin mas seryoso na kini.
Ang akong mga kahadlok nakumpirmar ug migrabe nga didto mi sa doktor—nadayagnos si Carlie og type 1 diabetes. Paingon na siya ngadto sa pagka-diabetic coma ug kinahanglang dad-on dayon ngadto sa ospital. Nag-ampo ko sa akong kasingkasing nga mokalma lang ko ug ang mga doktor makahimo sa pagtabang kaniya.
Sa dihang miabut mi sa emergency room, ang mga doktor ug mga nurse nagdali sa pag-atiman naningkamot sa pagluwas kaniya. Mihangyo ko sa Langitnong Amahan sa kahupayan ug kalinaw.
Sa gutlo sa kahilom, ang akong bana ug ang iyang amahan mihatag ni Carlie og panalangin sa priesthood. Sa iyang panalangin, ang akong bana misiguro kaniya nga kabubut-on sa iyang Langitnong Amahan nga siya mabuhi. Nagsugod ko sa pagbati og kalinaw.
Human sa daghang mga oras nga nagtan-aw sa mga doktor nga mitusok og mga dagum, mi-testing ug misusi ni Carlie alang sa kalamboan, gikapoy ko. Dili na kaayo samok ang iyang kwarto pagka-1:00 sa buntag. Wala ko mahibalo unsay mahitabo, dili ko makatulog, ug gibati nako nga nag-inusara.
Nagkuha ko og kopya sa Basahon ni Mormon nga gidala sa akong igsoon babaye sa ospital ug nag-ampo nga ang mga kasulatan makahatag sa kasiguroan nga akong gikinahanglan. Ang basahon naabli ngadto sa Alma 36:3. Samtang nagbasa ko, akong gibati nga ang Ginoo nagsulti nako: “ako nasayud nga kinsa ang mobutang sa ilang pagsalig diha sa Dios pagabuligan sa ilang mga pagsulay, ug sa ilang mga kasamok, ug sa ilang mga kasakit, ug pagabayawon sa katapusan nga adlaw.”
Sa ikaduhang higayon nianang gabhiona, gibati nako ang kalinaw. Nasayud ko nga ang Langitnong Amahan naghunahuna gayud kanamo. Gusto Siya nga ako masayud nga anaa Siya ug nga ako kinahanglang magbaton og hugot nga pagtuo diha Kaniya.
Samtang namalandong ko sa mga panghitabo nianang adlawa, nakahunahuna ko kon giunsa kami sa pagpanalangin sa Ginoo. Gibati nako nga dad-on dayon si Carlie ngadto sa doktor. Luwas kaming miabut sa ospital. Daling miabut ang mga naghupot sa priesthood aron ipahigayon ang panalangin.
Sukad nianang adlawa nagsige na lang mi og balik-balik sa pagsusi sa blood sugar ug nag-andam og ikatimo basin moubos ang iyang sugar. Nakat-unan namo sa unsa nga paagi makaapekto ang diabetes sa lawas. Ang sakit ni Carlie nagpadayon nga usa ka pagsulay, apan nakat-on mi nga mosalig sa atong Langitnong Amahan matag adlaw.
Kana nga adlaw sa ospital gusto ko nga dili na mausab, apan usa kini nga ako mapasalamaton sa kahangturan. Adlaw kadto sa pagkat-on, sa paggamit sa hugot nga pagtuo, sa pagbati og pasalamat. Nakat-unan nako nga ang Langitnong Amahan nagtan-aw sa matag usa sa Iyang mga anak ug nga Siya tinud-anay nga mosuporta sa atong mga pagsulay.