Ang Langitnong Amahan Motubag sa Akong mga Pag-ampo
Dihay daghang mga higayon nga ang Langitnong Amahan midungog ug mitubag sa akong mga pag-ampo. Ang akong unang mahinumduman niini sa dihang ako nag-edad og kwatro. Nawala ang mga block nga gusto nakong dulaan. Misulod ko sa akong kwarto ug miluhod aron mag-ampo. Gihangyo nako ang Langitnong Amahan sa pagtabang nako sa pagpangita sa akong mga dulaan. Gitubag diha-diha ang akong pag-ampo—nakit-an nako ang mga block sa pikas kwarto.
Usa sa labing importante nga panahon nga akong nasinati nga natubag ang pag-ampo mao ang uban sa akong tibuok pamilya. Pipila ka bulan pagkahuman sa misyon sa akong ig-agaw nga si Christian, nagdrayb siya sa lawom na nga gabii sa dalan sa bukid. Siya ug laing sakyanan nagkabangga. Ang laing drayber maayo ra, apan ang akong ig-agaw gidala ngadto sa ospital sakay sa helicopter.
Dunay grabeng kadaut sa tibuok kalawasan ni Christian. Na-coma siya, ug ang doktor nagtuo nga dili na siya makamata. Ang among pamilya nakahukom nga magpuasa. Ang akong mga ginikanan, mga igsoong babaye, mga apohan, mga iyaan, mga uyoan, ug ang akong tanang mga ig-agaw nagpuli-puli sa pagpuasa alang ni Christian. Nagpuasa ko panahon sa ting-eskwela. Kinahanglan kong mopasabut sa akong magtutudlo ug mga kauban sa klase nganong wala ko maniudto nianang adlawa. Wala nako panumbalinga nga dili mokaon sulod sa usa ka adlaw tungod kay nagpuasa ko alang sa akong ig-agaw.
Gitubag sa Langitnong Amahan ang among mga pag-ampo, ug si Christian nakamata gikan sa iyang pagka-coma. Wala gihapon siya maulii sa hingpit, apan miarang-arang na siya. Nasayud ko nga dugay pang maulian si Christian. Nag-ampo gihapon mi alang kaniya. Posible ang tanan uban sa tabang sa Langitnong Amahan.
Paghulagway pinaagi ni Dan Burr