Tokoni ʻa e Kau ʻAposetoló ki ha Ngaahi Puleʻanga Lahi

Hokohoko atu hono ʻoatu ʻe he kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá e ngāue ʻa e Siasí ki he funga ʻo e māmaní. Lolotonga e ngaahi ngāue fakamuimuitahá:

Ne fai ʻe ʻEletā Lāsolo M. Nalesoni mo ʻEletā Niila L. ʻEnitasoni ha faleʻi mo ha fakahinohino ki he Kāingalotu ʻi ʻAositelēlia, Nuʻu Sila, Fisi, Tahiti, Niu Kaletōnia, Tonga, mo Pāpua Niu Kiní. Naʻe lea ʻa ʻEletā Nalesoni ki he fie maʻu ke fakamālohia e fāmilí, pea fakamanatu ʻe ʻEletā ʻEnitasoni ki he kāingalotú ke nau fiefia. Naʻe feʻiloaki ʻa ʻEletā ʻEnitaseni ʻi ha ngāue kehe pē ia mo e kāingalotu mo e kau taki ʻo e koló ʻi he ngaahi feituʻu ʻo e ʻOtu Filipainí ʻa ia ne uesia ʻe ha mofuike mo e ngaahi matangi fakatalopikí.
Naʻe fakatapui ʻe ʻEletā Tāleni H. ʻOakesi ʻa e Senitā Akoʻanga Fakafaifekau Mekisikou Sití. Naʻá ne poupouʻi ʻa e kau faifekaú ke ako mālohi mo fakatapui kinautolu ki he ʻEikí.
Naʻe fakahā ʻe ʻEletā M. Lāsolo Pālati ki he Kāingalotu ʻi he ʻĒlia Saute ʻAmelika Sauté “ʻoku tupulaki e ngaahi foha mo e ʻofefine ʻo Līhaí he ʻahó ni,” ʻo ʻi ai ha kāingalotu ʻe toko 4.5 miliona mo ha temipale ʻe 14 ʻi Saute ʻAmelika. Ko hono fakahoko ʻeni ha kikite naʻe fai ʻe heʻene kui tangata ko ʻEletā Melevini J. Pālati (1873–1939) ʻe hoko ʻa Saute ʻAmelika ko ha ivi mālohi ʻi he Siasí.
Ne poupouʻi ʻe ʻEletā Sefilī R. Hōlani e kāingalotu ʻi Taiuani mo Hongokongo ke hoko e temipalé ko e konga ʻo ʻenau moʻuí ʻaki ʻenau ō maʻu pē ki ai ʻi he lahi taha te nau ala lavá.
Naʻe fakamanatu ʻe ʻEletā Tēvita A. Petinā ki he Kāingalotu ʻi ʻIukanitaá ʻoku nau hoko ko e kau paionia ʻi hono langa ʻo e Siasí ʻi honau fonuá. Naʻá ne fakamanatu ki he kāingalotu ʻi Kēniá e mahuʻinga ʻo hono fakahaaʻi maʻu pē e ʻofá ʻi ʻapí.
Naʻe akoʻi ʻe ʻEletā Kuenitini L. Kuki ʻa e kāingalotu ʻi ʻAmelika Lotoloto ʻa hono mahuʻinga ʻo e ngāue ki he ʻOtuá, ʻiate kinautolu pē, pea ki honau kaungāʻapí.

Ke ʻilo lahi ange fekauʻaki mo e ngāue ʻa e kau ʻAposetoló, ʻalu ki he lds.org/prophets-and-apostles.