Ko Hono ʻOmi ʻo e Palaimelí ki ʻApí
ʻOku Tau Hoko Ko e Kau Mēmipa ʻo e Siasí ʻo Fakafou ʻi he Papitaisó mo e Hilifakinimá
ʻOku nofo ʻa e tokotaha naʻá ne faʻú ʻi ʻIutā, USA.
Ako lahi ange ki he kaveinga ʻo e Palaimelí ki he māhina ní!
Ne foki loto-mamahi mai ʻa Maliela mei he akó. Naʻe fehuʻi atu ʻene faʻeé ʻoku fai ʻene tō matalaʻiʻakau he ngoué, “Ko e hā e meʻa ʻoku hokó?”
Naʻe pehē mai ʻe Maliela “Ne palōmesi mai ʻa Sonia te ma vaʻinga pea naʻe ʻikai te ne fai ia. Naʻá ne tō hifo he kelekelé ʻo ofi ki he Fineʻeikí.
Naʻe pehē e Fineʻeikí, “ʻOku ou kole fakamolemole atu. ʻOku mahuʻinga ke fai pau ki he palōmesí. ʻI hoʻo papitaiso pea hilifakinimá he uike kahaʻú, te ke fai ai ha niʻihi ʻo e ngaahi palōmesi mahuʻinga ʻaupito, ʻoku ui ko e ngaahi fuakavá.”
Naʻe ʻeke ange ʻe Maliela, “Moʻoni? Naʻá ne fiefia ke papitaiso.
Naʻe tuku ʻe he fineʻeikí ha ngaahi matalaʻi ʻakau lanu engeenga ʻi he kelekelé. “ʻOkú ke palōmesi ke talangofua ki he ngaahi fekaú. ʻOkú ke palōmesi foki ke ʻai kiate koe ʻa e huafa ʻo Sīsū Kalaisí. Ko e hā e talaʻofa ʻa e Tamai Hēvaní kapau te ke fai ʻa e ngaahi meʻá ni?”
Naʻe fakakaukau ʻa Maliela ki he meʻa naʻá ne akó ʻi he Palaimelí. “Te u lava ke maʻu e Laumālie Māʻoniʻoní.”
Ne pehē ange e Fineʻeikí, “ʻOku moʻoni ia.” “Te ke toe hoko foki ko ha mēmipa ʻo e Siasí ʻo Sīsuú. Te ke tauhi fēfē hoʻo palōmesi ke talangofua ki he ngaahi fekaú?”
Naʻe pehē ʻe Maliela, “Te u lava ʻo angaʻofa, pea tala e moʻoní. ʻOku ʻuhinga ki he hā hono ʻai kiate au e huafa ʻo Sīsuú?”
Naʻe pehē ange e Fineʻeikí, “ʻOku ʻuhinga ia ke ke feinga ke hangē pē ko Iá mo fai e meʻa ʻokú Ne finangalo ke ke faí. Ko e hā te ke lava ʻo fai ke hangē ko Sīsuú?”
Naʻe vilohi ʻe Maliela ha matalaʻi ʻakau vāleti ʻi hono ʻuluʻuluʻi tuhú. Naʻá ne pehē ange, Te u lava ʻo nofo mo e taʻahine foʻou ʻi he akó. Pea te u lava ʻo feinga ke angalelei kia Sōnia.
Naʻe pehē ange ʻe he Fineʻeikí, “Ko ha ngaahi fakakaukau lelei ia. ʻI he taimi te ke maʻu ai e sākalamēnití, te ke lava ʻo manatuʻi hoʻo ngaahi palōmesí.”
Naʻe malimali ʻa Maliela. “ʻOku ou ʻilo mo ha palōmesi ʻe taha—ke fuʻifuʻi e matalaʻi ʻakaú koeʻuhí ke lava ʻo tau maʻu ha ngoue fakaʻofoʻofa!”